ໜັງສືພິມ ປະຊາຊົນ

ຜູ້ວ່າການ ທຫລ ພົບປະຮັກສາການເຈົ້າແຂວງຄຳມ່ວນ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 15/12/2020 13:28:57 ຈຳນວນຢ້ຽມຊົມ 2472 ຄັ້ງ

ທ່ານ ສອນໄຊ ສິດພະໄຊ ກຳມະການສຳຮອງສູນກາງພັກ ຜູ້ວ່າການທະນາຄານແຫ່ງ ສປປ ລາວ ພ້ອມຄະນະ ໄດ້ພົບປະ ແລະ ປຶກສາຫາລືວຽກງານ ກັບທ່ານ ວັນໄຊ ພອງສະຫວັນ ເລຂາຄະນະພັກແຂວງ ຮັກສາການເຈົ້າແຂວງຄໍາມ່ວນ ທີ່ຫ້ອງວ່າການປົກຄອງແຂວງດັ່ງກ່າວ

ເມື່ອວັນທີ 14 ທັນວາ ນີ້, ເນື່ອງໃນໂອກາດທີ່ທ່ານໄດ້ຮັບໜ້າທີ່ເປັນເລຂາຄະນະພັກແຂວງ ຮັກສາການເຈົ້າແຂວງຄໍາ ມ່ວນ.

ການພົບປະກັນຄັ້ງນີ້, ທັງແຂກ ແລະ ເຈົ້າພາບ ໄດ້ຕີລາຄາສູງ ຕໍ່ໝາກຜົນແຫ່ງການເຄື່ອນໄຫວຂອງທັງ 2 ຝ່າຍໃນຜ່ານມາ ແລະ ສືບຕໍ່ກັນຮ່ວມມື ປະກອບສ່ວນເຂົ້າໃນການແກ້ໄຂບັນຫາຂໍ້ຄົງຄ້າງທີ່ຕິດພັນກັບວຽກງານທະນາຄານ ແລະ ສະຖາບັນການເງິນຈຸລະພາກຢູ່ແຂວງຄຳມ່ວນໃຫ້ດີຂຶ້ນເປັນກ້າວໆ ແນໃສ່ເພື່ອນຳໃຊ້ແຫຼ່ງທຶນທະນາຄານ ແລະ ສະຖາບັນການເງິນຈຸລະພາກ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງຄຳມ່ວນ ເຮັດໃຫ້ປະຊາຊົນ ມີຊີວິດການເປັນຢູ່ດີຂຶ້ນເປັນກ້າວໆ.

ໄລຍະດຽວກັນນີ້, ທ່ານ ຜູ້ວ່າການທະນາຄານແຫ່ງ ສປປ ລາວ ຍັງໄດ້ພົບປະໂອ້ລົມກັບບັນດາສາຂາ-ໜ່ວຍບໍລິການທະນາຄານທີ່ດຳເນີນທຸລະກິດຢູ່ແຂວງດັ່ງກ່າວ ຊຶ່ງໃນປັດຈຸບັນມີ 5 ສາຂາທະນາຄານ, 23 ໜ່ວຍບໍລິການ (ລວມໜ່ວຍບໍລິການ ທະນາຄານຮ່ວມພັດທະນາ,

ນະໂຍບາຍ, ພັດທະນາລາວ ສາຂາຫຼັກ 20 ແລະ ທະນາຄານອິນໂດຈີນ; 4 ໜ່ວຍແລກປ່ຽນ, ຕູ້ຝາກເງິນ 1 ຕູ້ ແລະ ຕູ້ ATM 51 ໜ່ວຍ; ມີຍອດຊັບສິນທັງໝົດເພີ່ມຂຶ້ນ 22,52% ທຽບໃສ່ 10 ເດືອນປີ 2019, ຍອດສິນເຊື່ອທັງໝົດ 395,35 ຕື້ກີບ ທຽບໃສ່ປີ 2019

ເພີ່ມຂຶ້ນ 15,24%; NPLs ກວມອັດຕາສ່ວນ 2,11% ຂອງຍອດສິນເຊື່ອທັງໝົດ ເມື່ອທຽບໃສ່ປີ 2019 ຫຼຸດລົງ 69,47%; ສາຂາທະນາຄານທຸລະກິດ ສາມາດສ້າງລາຍຮັບທັງໝົດ 351,01 ຕື້ກີບ, ສົ່ງຜົນໃຫ້ການດໍາເນີນທຸລະກິດກໍາໄລ ຈໍານວນ 71,10 ຕື້ກີບ (ເດືອນ 10 ປີ 2009 ກໍາໄລ 17,62 ຕື້ກີບ) ທຽບໃສປີ 2019 ກໍາໄລເພີ່ມຂຶ້ນ 303,46%.

ທ່ານ ຜູ້ວ່າການທະນາຄານແຫ່ງ ສປປ ລາວ ຍັງໃຫ້ກຽດຊີ້ນຳພະນັກງານທະນາຄານ ໂດຍຮຽກຮ້ອງໃຫ້ທຸກຄົນເສີມຂະຫຍາຍຜົນງານທີ່ຕັ້ງໜ້າ; ແກ້ໄຂບັນຫາອ່ອນ, ຂໍ້ຄົງຄ້າງໃນຜ່ານມາ ໂດຍສະເພາະແມ່ນ ສະໜອງແຫຼ່ງທຶນໃຫ້ຖືກເປົ້າໝາຍ, ຫຼີກເວັ້ນການປ່ອຍສິນເຊື່ອທີ່ຂາດການວິເຄາະ-ວິໄຈ ແນໃສ່ເຮັດໃຫ້ປະຊາຊົນບັນດາເຜົ່າໄດ້ມີທຶນຮອນເຂົ້າໃນການຜະລິດ, ທຸລະກິດ ແລະ ການບໍລິການ ຕາມແນວທາງຂອງພັກ ແລະ ລັດຖະບານ.