ເມື່ອບໍ່​ດົນ​ຜ່ານ​ມານີ້, ທີ່ອ່າງເກັບນ້ຳວັງແຄນຄໍາ ໄດ້ດໍາເນີນການແຂ່ງຂັນຊ່ວງ​ເຮືອເປັນເວລາ 2 ວັນ ໂດຍເປັນກຽດເຂົ້າຮ່ວມຂອງທ່ານນາງ ບຸນທະວີ ດວງລາສີ ຮອງເລຂາພັກແຂວງ, ມີ​ອະດີດການນໍາຂອງແຂວງ, ດາດີດການນໍາຂອງເມືອງ, ​ພ້ອມ​ດ້ວຍ​ແຂກ​ຖືກ​ເຊີນ​ຈາກ​ພະ​ແນກ​ການ​ອ້ອມ​ຂ້າງ, ຕ່າງແຂວງ, ພາກສ່ວນທຸລະກິດ ຕະຫຼອດຮອດມວນຊົນເຂົ້າຮ່ວມຮັບຊົມຢ່າງຫຼວງຫຼາຍ.

ທ່ານ ສົມໃຈ ອຸ່ນຈິດ ເລຂາພັກເມືອງ ເຈົ້າເມືອງລະຄອນເພັງໃຫ້ຮູ້ຈຸດປະສົງຂອງການຈັດງານຊ່ວງເຮືອໃນປີນີ້ວ່າ: ການ​ແຂ່ງ​ຂັນ​ຊ່​ວງ​ເຮືອ​ປີນີ້ ຈັດ​ຂຶ້ນ​ເພື່ອຂໍ່ານັບຊົມເຊີຍວັນຊາດ​ທີ 2 ທັນວາ ຄົບຮອບ 45 ປີ, ວັນເກີດປະທານໄກສອນ ພົມວິຫານ ຄົບຮອບ 100 ປີ, ຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນ, ທັງ​ເປັນການອະນຸລັກຮັກສາຂະນົບທໍານຽມຮີດຄອງປະເພນີ ແລະ ວັດທະນະທໍາອັນດີງາມຂອງຊາດ ກໍຄືຂອງທ້ອງຖິ່ນໄວ້ໃຫ້ໝັ້ນຄົງ, ສ້າງສາຍສໍາພັນຄວາມສາມັກຄີອັນແໜ້ນແຟ້ນ ລະຫວ່າງກົມກອງ-ຫ້ອງການ, ບ້ານ ແລະ ພໍ່ແມ່ປະຊາຊົນບັນດາເຜົ່າ ເພື່ອປູກຈິດສໍານຶກໃຫ້ໄວໜຸ່ມ-ເຍົາວະຊົນ ຫັນມາຫຼິ້ນກິລາເພື່ອສຸຂະພາບ ແລະ ຫ່າງໄກຈາກຢາເສບຕິດ, ທັງເປັນການສົ່ງເສີມການທ່ອງທ່ຽວ ແນໃສ່ການດຶງດູດນັກທ່ອງທ່ຽວ ເພື່ອສ້າງລາຍຮັບໃຫ້ພໍ່ແມ່ປະຊາຊົນໃນທ້ອງຖິ່ນໃຫ້ນັບມື້ນັບຫຼາຍຂຶ້ນ.

ເຮືອທີ່​ເຂົ້າຮ່ວມ​ການ​ແຂ່ງ​ຂັນປີນີ້, ມີເຮືອມາຈາກພາຍໃນເມືອງ, ຕ່າງເມືອງ ແລະ ຕ່າງແຂວງ ​ລວມທັງໝົດ 36 ລໍາ. ໃນນັ້ນ, ປະເພດ 8 ສີພາຍຊາຍ 16 ລໍາ, ຍິງ 8 ລໍາ, ປະເພດ 12 ສີພາຍຊາຍທົ່ວໄປ ມີ 12 ລໍາ, ຜ່ານການແຂ່ງຂັນ ທ່າມ​ກາງ​ສຽງ​ເຊຍ​ອັນ​ສະ​ໜັ່ນ ​ຊຶ່ງ​ມີຜົນ​ການ​ແຂ່ງຂັນ​ດັ່ງ​ນີ້, ປະເພດ 8 ສີພາຍຊາຍ ທີ 1 ເຮືອ​ຊ່ວງ​ຈາກ​ຫ້ອງ​ການ​ກະ​ສິ​ກຳ​ເມືອງ​ລະ​ຄອນ​ເພັງ, ໄດ້ຮັບເງິນສົດ 2 ລ້ານ ກີບ ພ້ອມຂັນ 1 ໜ່ວຍ, ທີ 2 ຕມ ປາກ​ຕະ​ພານ ໄດ້ຮັບເງິນສົດ 1 ລ້ານ 5 ແສນກີບ ພ້ອມ​ຂັນ 1  ໜ່ວຍ, ທີ 3 ຫ້ອງ​ການ​ສຶກ​ສາ​ທິ​ການ ແລະ ​ກິ​ລາ​ເມືອງ​ລະ​ຄອນນ​ເພັງ,ໄດ້ຮັບເງິນສົດ 1 ລ້ານກີບ ພ້ອມ​ຂັນ 1 ໜ່ວຍ, ປະເພດ 8 ສີພາຍຍິງ ທີ 1 ເຮືອ​ຊ່ວງ​ປາກ​ຕະ​ພານ ໄດ້ຮັບເງິນສົດ 2 ລ້ານກີບ ພ້ອມຂັນ 1 ໜ່ວຍ, ທີ 2 ບ້ານ​ນາ​ໂພ​ສີ, ໄດ້ຮັບເງິນສົດ 1 ລ້ານ 5 ແສນກີບ ພ້ອມ​ຂັນ 1 ໜ່ວຍ, ທີ 3 ໂຮງ​ຊາຍ​ທອງ ໄດ້ຮັບເງິນສົດ 1 ລ້ານກີບ ພ້ອມ​ຂັນ 1 ໜ່ວຍ ແລະ  ເຮຶ​ອຊ່ວງປະ​ເພດ 12 ສີພາຍຊາຍທົ່ວໄປ ທີ 1 ໜູ່ມ​ສາ​ລະ​ວັນ, ໄດ້ຮັບເງິນສົດ 3 ລ້ານກີບ ພ້ອມຂັນ 1 ໜ່ວຍ, ທີ 2 ຫ້ອງ​ການ​ສຶກ​ສາ​ທິ​ການ ແລະ ​ກິ​​ລາ​ເມືອງ​ລະ​ຄອນ​ເພັງ ໄດ້ຮັບເງິນສົດ 2 ລານກີບ, ພ້ອມ​ຂັນ 1 ໜ່ວຍ ທີ 3 ເຮືອ​ຊ່ວງ​ເຈົ້າ​ແມ່​ແກ້ວ​ມັງ​ກອນ, ໄດ້​ຮັບ​ເງິນ​ສົດ 1 ລ້ານ 5 ແສນ​ກີບ ພ້ອມ​ຂັນ 1 ໜ່ວຍ.

ໃນ​ຕອນ​ທ້າຍ​ຂອງ​ພິ​ທີ ທ່ານ ເຈົ້າເມືອງລະຄອນເພັງ ​ໄດ້​ມອບລາງວັນຊະ​ນະ​ເລີດ​ ແລະ ​ຮອງ​ຊະ​ນະ​ເລີດມອບໂດຍ​ ທ່ານ ໄຊຊະນະ ສີສະຫວັດ ຮອງເຈົ້າເມືອງ​ລະ​ຄອນ​ເພັງ. 

ພາບ-ຂ່າວ: ສິດຕາ ເພັດວົງສາ