ງານພົບປະ ພາຍໃຕ້ຫົວຂໍ້ ລາວສະກາຍເວ ຢາກໃຫ້ທຸກທ່ານໄດ້້ບິນ

ງານພົບປະ ປະຈຳປີ 2020 ພາຍໃຕ້ຫົວຂໍ້ “ລາວສະກາຍເວ ຢາກໃຫ້ທຸກທ່ານໄດ້້ບິນ ” ໄດ້ຈັດຂຶ້ນເມື່ອວັນທີ 11 ທັນວາ ຜ່ານມາ ທີບໍລິສັດ ລັດວິາຫະກິດ ລາວເດີນອາກາດ ,ໂດຍການເປັນປະທານຂອງທ່ານ ສີວຽງທອງ ກອນນີວົງ ຜູ້ອຳນວຍການໃຫຍ່ບໍລິສັດ ລັດວິສາຫະກິດ ລາວເດີນອາກາດ ຊຶ່ງມີພະນັກງານຈາກ ອົງການຈັດຕັ້ງທັງພາກລັດ ແລະ ເອກະຊົນເຂົ້າຮ່ວມ

ທ່ານ ສີວຽງທອງ ກອນນີວົງ ກ່າວວ່າ: ບໍລິສັດ ລັດວິຊາຫະກິດ ລາວເດີນອາກາດ ( LAO SKYWAY) ໄດ້ຮັບການສ້າງຕັ້ງຂຶ້ນ ໃນວັນທີ 24 ມັງກອນ 2002 ,ບໍລິສັດ ລັດວິຊາຫະກິດ ລາວເດີນອາກາດ (LAO SKYWAY) ແມ່ນ ບໍລິສັດລັດ 100%, ມີທຶນຈົດທະບຽນ 615 ຕື້ກວ່າກີບ ມີພະນັກງານ ທັງໝົດ 329 ຄົນ ,ຍິງ 112 ຄົນ.ການຈັດຕັ້ງຂຶ້ນກັບສາຍຕັ້ງ ວຽກພັກ-ພະນັກງານ ແມ່ນຂຶ້ນກັບ ກະຊວງປ້ອງກັນປະເທດ,ກະຊວງ ການເງິນ ເປັນຜູ້ຖືຫຸ້ນ ບໍລິສັດ 100%, ກົມການບິນພົນລະເຮືອນ ກະຊວງ ໂຍທາທິການ ແລະ ຂົນສົ່ງ ເປັນຜູ້ຄຸ້ມຄອງດ້ານການຈັດຕັ້ງການບິນໂດຍສອດຄ່ອງກັບກົດໝາຍການບິນ ພົນລະເຮືອນ ສປປ ລາວ ກຳນົດ ແລະ ມີສະພາບໍລິຫານ 5 ທ່ານ ຕາງໜ້າລັດຄຸ້ມຄອງມະຫາພາກ ຕໍ່ບໍລິສັດ

ເສັ້ນທາງການບິນເລີ່ມແຕ່ມື້ສ້າງຕັ້ງ ແມ່ນໃຫ້ບໍລິການພຽງແຕ່ເປັນຖ້ຽວບິນເໝົາລຳ ໂດຍການນຳໃຊ້ MI -17 (ມີ-17)ຈຳນວນ 2 ລຳ ,ພະນັກງານມີ 23 ຄົນ. ໂຄງການທຳອິດທີ່ລັດຖະບານໄດ້ມອບໃຫ້ ບໍລິສັດ ແມ່ນການບິນຮັບໃຊ້ໂຄງການຊອກຫາຮ່ອງຮອຍ ແລະ ສິ່ງເຫຼືອຂອງທະຫານອາເມິກາທີ່ສາຍສາບສູນໃນປາງສົ່ງຄາມຢູ່ລາວ.ຫຼັງຈາກນັ້ນ ບໍລິສັດ ໄດ້ຊະນະການປະມູນໄດ້ເຊັນສັນຍາບິນຮັບໃຊ້ໂຄງການບໍ່ຄຳເຊໂປນ ຂອງ ບໍລິສັດ ລ້ານຊ້າງມີເນີໂຣນ ປີ 2003,ປີ 2005 ບິນຮັບໃຊ້ໂຄງການພູເບັ້ຍມາຍນິງ ແລະ ໂຄງການນໍ້າເທີນ 2 ບິນເໝົາລຳຕາມການສັ່ງຈອງຂອງລູກຄ້າ ,ປີ 2007 ລາວເດີນອາກາດ ໄດ້ບິນຮັບໃຊ້ສາຍການປິນ ນະຄອນຫຼວງວຽງຈັນໄປຍັງ 3 ແຂວງພາກເໜືອ: ແຂວງຜົ້ງສາລີ ,ຫົວພັນ ແລະແຂວງ ໄຊຍະບູລີ ພ້ອມທັງບິນຮັບໃຊ້ເໝົາລຳ, ປີ 2013 ກະຊວງ ປ້ອງກັນປະເທດ ໄດ້ມອບເຮືອບິນ MA 60 ຈຳນວນ 2 ລຳ ໃຫ້ ບໍລິສັດ ບິນຮັບໃຊ້ສາຍການບິນ,ປີ 2014 ບໍລິສັດ ໄດ້ຂະຫຍາຍສາຍການບິນເພີ່ມ 4 ເສັ້ນບິນ ຈາກນະຄອນຫຼວຽງຈັນ ໄປຍັງແຂວງພາກເໜືອຄື: ແຂວງຫຼວງພະບາງ,ອຸດົມໄຊ,ຫຼວງນໍ້າທາ ແລະ ແຂວງບໍ່ແກ້ວ ແລະ ປີ 2017 ໄດ້ເປີດເສັ້ນບິນເພີ່ມສອງເສັ້ນບິນ ນະຄອນຫຼວງວຽງຈັນ -ຈຳປາສັກ,ນະຄອນຫຼງວຽງຈັນ-ຊຽງຂວາງ-ຫຼວງພະບາງ .ປີ 2019 ບໍລິສັດ ສຳເລັດການສ້າງຕັ້ງ 3 ບໍລິສັດລູກຂຶ້ນກັບຄື: ບໍລິສັດ ລັດວິສາຫະກິດ ໂຮງແຮມ ລາວສະກາຍເວວຽງຈັນ,ບໍລິສັດ ລັດວິສາຫະກິດ ໂຮງແຮມ ລາວສະກາຍເວຊຽງຂວາງ ແລະ ບໍລິສັດ ລັດວິສາຫະກິດ ທອງທ່ຽວ ລາວສະກາຍເວ

ທ່ານ ສີວຽງທອງ ກອນນີວົງ ກ່າວຕື່ມວ່າ: ຈຸດປະສົງຂອງງານໃນຄັ້ງນີ້ ແມ່ນເພື່ອເປັນການເຊື່ອມຍົງການບໍລິການໆບິນຂອງບໍລິສັດ ກັບບັນດາພາກສ່ວນທີກ່ຽວຂ້ອງ ທັງພາກລັດ ແລະ ເອກະຊົນ ໃຫ້ມີປະສິດທິພາບ ,ປະສິດທິຜົນ ແລະ ສອດຄ່ອງກັບກົດໝາຍວ່າດ້ວຍວິສາຫະກິດ,ກົດໝາຍສົ່ງເສີມການລົງທຶນ ແລະ ກົດໝາຍການບິນ ຂອງ ສປປ ລາວ ກຳນົດໄວ້ຢ່າງຖືກຕ້ອງ.

(ຂ່າວ:ຕຸໄລເພັດ)