ທ້າວ ວິທະຍາ ລາຊາວະດີ ນັກກິລາເທັນນິດ ມື 1 ຂອງປະເທດລາວ ຍັງຄົງຄອງຄວາມຍິ່ງໃຫຍ່ຢ່າງສະໝໍ່າສະເໝີ  ສາມາດຄອງເບີ 1 ປະເທດລາວ ປະເພດດ່ຽວຊາຍຮຸ່ນທົ່ວໄປ 12 ປີ ຕິດຕໍ່ກັນ ພາຍຫຼັງໂຊຟອມເອົາຊະນະ ​ທ້າວສະຖາພອນ ສິມມະລາວົງ  2-0 ເຊັດ ດ້ວຍຄະແນນ 6-0 ແລະ 6-4 ຄະແນນ ການແຂ່ງຂັນເທັນນິດ ນໍ້າດື່ມຫົວເສືອ ໂອເພັນ ປະຈໍາປີ 2020

  ພິທີປິດການແຂ່ງຂັນເທັນນິດ ນໍ້າດື່ມຫົວເສືອ 2020 ໄດ້ມີຂຶ້ນໃນວັນທີ 13 ທັນວາ ຜ່ານມາ ທີ່ສະໂມສອນເທັນນິດ  ເມືອງຈັນທະບູລີ ນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ສະຫວັນຄອນ ຣາຊະມຸນຕ​ຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະ​ທຳ ແລະ ທ່ອງທ່ຽວ, ທ່ານ ສູນທອນ ພົມມະຈັກ ປະທານບໍລິສັດ ເບຍລາວ ແລະ ທ່ານ ດາວວອນ ພະຈັນທະວົງ ປະທານສະຫະພັນເທັນນິສແຫ່ງຊາດລາວ ພ້ອມດ້ວຍພາກສ່ວນທີ່ກ່ຽວຂ້ອງ, ຄູຝຶກ, ນັກກິລາ ແລະ ຜູ້ປົກຄອງເຂົ້າຮ່ວມຢ່າງຫຼວງຫຼາຍ.  

  ໂອກາດດັ່ງກ່າວ, ທ່ານ ດາວວອນ ພະຈັນທະວົງ ປະທານສະຫະພັນເທັນນິ​ດແຫ່ງຊາດລາວ ກ່າວວ່່າ: ການແຂ່ງຂັນຄັ້ງນີ້ ຈັດຂຶ້ນກໍເພື່ອສະເຫຼີມສະຫຼອງວັນຊາດທີ 2 ທັນວາ ຄົບຮອບ 45 ປີ ແລະ ວັນເກີດຂອງທ່ານປະທານ ໄກສອນ ພົມວິຫານ ຄົບຮອບ 100 ປີ ພ້ອມທັງຈັດຂຶ້ນເພື່ອສ້າງຂະບວນການ ແລະ ໃຫ້ນັກກິລາລາວໄດ້ມີການອອກໍາລັງກາຍ ສາມາດພັດທະນາສີມືຕົນເອງເພື່ອເປັນນັກກິລາທີມຊາດລາວໃນອະນາຄົດ ໂດຍຈັດຂຶ້ນມາແຕ່ວັນທີ 14 ພະຈິກ ຈົນເຖິງ 13 ທັນວາ 2020 ໂດຍມີການຊີງໄຊ 11 ລາຍການ ແລະ ຊີງເງິນລາງວັນລວມ 25 ລ້ານກີບ ແລະ ມີນັກກິລາ ເຂົ້າຮ່ວມແຂ່ງຂັນທັງໝົດ 135 ຄົນ ( ຍິງ 15 ຄົນ ) ຜ່ານການແຂ່ງຂັນປະກົດວ່າ ອັນດັບທີ 1 ຊາຍດ່ຽວ ສາຍ ກ ຊະນະເລີດຕົກເປັນຂອງ ທ້າວ ວິທະຍາ ລາຊາວະດີ ໄດ້ຮັບຂັນແຊ໋ມພ້ອມເງິນ 1,5 ລ້ານກີບ ແລະ ຮອງຊະນະເລີດ ​ທ້າວ ສະຖາພອອນ ສິມມະລາວົງ ໄດ້ຮັບຂັນ ພ້ອມເງິນລາງວັນ 8 ແສນກີບ ປະເພດຊາຍຄູ່ ສາຍ ກ+ຂ: ຊະນະເລີດເປັນຂອງ ທ້າວ ວິທະຍາ+ ທ້າວ ໄຊສົງຄາມ ລາຊາວະດີ ແລະ ຮອງຊະນະເລີດ ທ້າວ ສະຖາພອນ+ ທ້າວ ວິລະກົດ ແລະ ປະເພດຊາຍຄູ່ສາຍ ຂ ຊະນະເລີດ ທ້າວ TONY + ທ້າວ LOI ໄດ້ຮັບຂັນແຊ໋ມ ແລະ ຮອງຊະນະເລີດ ຈັກປະເສີດ ພອນປະເສີດ ແລະ ພຸດທະວົງ ໄດ້ຮັບຂັນຮອງແຊ໋ມ.​

ສ່ວນປະເພດຊາຍຄູ່ສາຍ ຄ ທີ 1 ແມ່ນທ່ານແສງພອນ ພົນອາມາດ +ສົມສັກ ສະກຸນຄໍາ ແລະ ຮອງຊະນະເລີດ ທ່ານ ພຸດທະສັກ ພົມມະຈັກ-ທ່ານ ວິສິດ ຈັນທະພອນ ປະເພດອາວຸໂສ ທີ 1 ທ່ານ ດຣ ຄໍາຮຸ່ງ ພົມມະທະວົງສາ + ກະລຸນາ ອະໄພ ແລະ ຮອງຊະະນເລີດ ທ່ານ ປຣະດິດ + ທ່ານ ຄຸນໂນພອນ ສົມເດັດ ປະເພດຄູ່ປະສົມ: ທ່ານ ນາງ ນີນີ+ທ່ານ ແສງພອນ ພົນອາມາດ ແລະ ຮອງຊະນະເລີດ ທ່ານ ນາງ ມະໄລທອງ ມະຫາວັນ+ທ່ານ ຕຸ້ຍ ບຸນທະລາ ປະເພດເຍົາວະຊົນລາວ 12 ປີ ຊະນະເລີດ ທ້າວ ໄດມອນ ບຸນທະລາ ໄດ້ຮັບຂັນແຊ໋ມພ້ອມເງິນລາງວັນ 1 ລ້ານກີບ, ປະເພດເຍົາວະຊົນຊາຍ 14 ປີ ຊະນະເລີດ ທ້າວ ໄດມ່ອນ ບຸນທະລາ ໄດ້ຮັບຂັນແຊ໋ມ ພ້ອມເງິນລາງວັນ 1 ລ້ານກີບປະເພດເຍົາວະຊົນຊາຍ 16 ປີ ທ້າວ ສົມພອນ ໄດ້ຮັບຂັນແຊ໋ມພ້ອມເງິນລາງວັນ 1 ລ້ານກີບ ແລະ ປະເພດເຍົາວະຊົນຍິງ 16 ປີ ຊະນະເລີດ ນາງ ມາໄລລັກ ປະທຸມມາກູໂຄແນນ ໄດ້ຮັບຂັນແຊ໋ມ ພ້ອມເງິນລາງວັນ 1 ລ້ານກີບ.

   ໃນພິທີປິດການແຂ່ງຂັນລາຍການດັ່ງກ່າວ ກໍຍັງໄດ້ມີພິທີມອບ-ຮັບການສະໜັບສະໜູນຫຼັກຈາກ ບໍລິສັດ ເບຍລາວ ຈຳກັດ ລວມມູນຄ່າ 90 ລ້ານກີບ ໃຫ້ກຽດມອບໂດຍທ່ານ ຈັນສະໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດບໍລິສັດ ເບຍລາວ ຈຳກັດ ແລະ ທ່ານ ຕຸ້ຍ ບຸນທະລາ ອຸປະຖຳເຄື່ອງຕ່າງໆ ແລະ ເພື່ອເປັນການຕອບສະໜອງຄວາມຮູ້ບຸນຄຸນ ທາງສະຫະພັນເທັນນິດແຫ່ງຊາດ ກໍຍັງໄດ້ມອບໃບກຽດຕິຄຸນໃຫ້ແກ່ທັງສອງພາກສ່ວນອີກດ້ວຍ.

ໂດຍ ສົງການ