ໜັງສືພິມ ປະຊາຊົນ

ລາວ-ຍີ່ປຸ່ນ ລົງນາມການຮ່ວມມືດ້ານເຕັກນິກ-ວິຊາການ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 18/12/2020 09:29:47 ຈຳນວນຢ້ຽມຊົມ 5745 ຄັ້ງ

ພິທີລົງນາມຈົດໝາຍແລກປ່ຽນ ລະຫວ່າງ ສປປ ລາວ ແລະ ຍີ່ປຸ່ນ (Exchange Notes) ເພື່ອຜັນຂະຫຍາຍ ສັນຍາ ວ່າດ້ວຍການຮ່ວມມືດ້ານ ເຕັກນິກ-ວິຊາການ ລະຫວ່າງ ອາຊຽນ-ຍີ່ປຸ່ນ ໄດ້ຈັດຂຶ້ນໃນວັນ ທີ 16 ທັນວາຜ່ານມາ ທີ່ກະຊວງການຕ່າງປະເທດ. ຕາງໜ້າຝ່າຍລາວ ຮ່ວມລົງນາມ ໂດຍ ທ່ານ ທອງຜ່ານ ສະຫວັນເພັດ ຮອງລັດຖະມົນ ຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ແລະ ຕາງໜ້າຝ່າຍຍີ່ປຸ່ນແມ່ນທ່ານ ທາເກວາກະ ເຄໂຊ (TAKEWAKA Keizo) ເອກອັກຄະລາຊະທູດຍີ່ປຸ່ນ ປະຈໍາ ສປປ ລາວ ແລະ ມີບັນດາພະນັກງານກ່ຽວຂ້ອງຂອງທັງສອງຝ່າຍເຂົ້າຮ່ວມ.

ຈຸດປະສົງຂອງການລົງນາມຈົດໝາຍແລກປ່ຽນແມ່ນເພື່ອຜັນຂະຫຍາຍສັນຍາ ວ່າດ້ວຍການຮ່ວມມືທາງດ້ານເຕັກນິກ-ວິຊາການລະຫວ່າງອາຊຽນ ແລະ ຍີ່ປຸ່ນທີ່ໄດ້ລົງນາມກັນ ໃນເດືອນພຶດສະພາ 2020 ຜ່ານມາ ໂດຍສະເພາະການອະນຸມັດແລະ ອຳນວຍຄວາມສະດວກໃຫ້ແກ່ບັນດາຊ່ຽວຊານ ແລະ ອາສາສະໝັກ ຍີ່ປຸ່ນ ໃນເວລາເດີນທາງເຂົ້າມາປະຕິບັດໜ້າທີ່ ວຽກງານ ຢູ່ ສປປ ລາວ ຕາມໂຄງການ/ແຜນງານ ພາຍໃຕ້ສັນຍາຮ່ວມມືທາງດ້ານເຕັກນິກ -ວິຊາການດັ່ງກ່າວ.

ໃນໂອກາດນີ້, ທ່ານ ທອງ ຜ່ານ ສະຫວັນເພັດ ໄດ້ຕີລາຄາສູງ ແລະ ສະແດງຄວາມຂອບ ໃຈຢ່າງຈິງໃຈຕໍ່ການສະໜັບສະ ໜູນຊ່ວຍເຫຼືອ ຂອງລັດຖະບານຍີ່ປຸ່ນ ໃຫ້ແກ່ ສປປ ລາວ ໃນໄລ ຍະຜ່ານມາ ຊຶ່ງໄດ້ປະກອບ ສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ຫວັງຢ່າງຍິ່ງວ່າ ຍີ່ປຸ່ນຈະສືບຕໍ່ໃຫ້ ການສະໜັບສະໜູນ ແລະ ຊ່ວຍ ເຫຼືອ ໃນໄລຍະຕໍ່ໜ້າ ໂດຍສະ ເພາະການຮັດແຄບຄວາມແຕກໂຕນດ້ານການພັດທະນາ ພາຍໃນອາຊຽນດ້ວຍການຈັດຕັ້ງປະຕິບັດແຜນປະຕິບັດງານຂໍ້ລິເລິ່ມການເຊື່ຶອມໂຍງອາຊຽນ ສະບັບທີ 4 ຫຼື ໄອເອໄອ ສະບັບທີ 4 ໄລຍະ 2021-2025; ການ ຈັດຕັ້ງປະຕິບັດແຜນແມ່ບົດວ່າດ້ວຍການເຊື່ອມຈອດອາຊຽນ 2025; ການພັດທະນາຊັບ ພະຍາກອນມະນຸດ ແລະ ການຮ່ວມມືພາຍໃຕ້ເຄືອຂ່າຍຕົວເມືອງອັດສະລິຍະອາຊຽນ.

ທ່ານ ທາເກວາກະ ເຄໂຊ ໄດ້ສະແດງຄວາມເຊື່ອໝັັ້ນວ່າ: ການຮ່ວມມືດ້ານເຕັກນິກ-ວິຊາການ ລະຫວ່າງ ອາຊຽນ ແລະ ຍີ່ປຸ່ນຈະປະກອບສ່ວນອັນສຳ ຄັນໃຫ້ແກ່ການສະໜັບສະໜູນ-ຊ່ວຍເຫຼືອສອງຝ່າຍຂອງລັດ ຖະບານຍີ່ປຸ່ນໃຫ້ແກ່ສປປລາວ ນັບມື້ນັບເພີ່ມຂຶ້ນ ແລະ ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ກໍຄືປະກອບສ່ວນເຂົ້າໃນການສົ່ງເສີມການພົວ ພັນ-ຮ່ວມມື ສອງຝ່າຍ ລາວ-ຍີ່ປຸ່ນ ນັບມື້ນັບແໜ້ນແຟ້ນຍິ່ງໆຂຶ້ນ.

(ຂ່າວ: ກະຊວງການຕ່າງປະເທດ)