ໜັງສືພິມ ປະຊາຊົນ

ຄະນະພົວພັນຕ່າງປະເທດສູນກາງພັກ ສະຫຼຸບວຽກງານ 5 ປີ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 21/12/2020 09:13:45 ຈຳນວນຢ້ຽມຊົມ 408 ຄັ້ງ

ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດກອງປະຊຸມສະຫຼຸບການ ເຄື່ອນໄຫວວຽກງານໄລຍະ 5 ປີ (2016-2020) ແລະ ປະຈໍາປີ 2020, ໃນວັນທີ 18 ທັນວານີ້ ທີ່ຫ້ອງປະຊຸມຄະນະພົວພັນຕ່າງປະເທດສູນກາງພັກ ໂດຍການເປັນປະທານຂອງ ສະຫາຍນາງ ສູນທອນ ໄຊຍະຈັກ ກຳມະ ການສູນກາງພັກ ເລຂາຄະນະບໍລິຫານງານພັກ ຫົວໜ້າຄະນະພົວພັນຕ່າງປະເທດສູນກາງພັກ.

ກອງປະຊຸມໄດ້ຮັບຟັງການສະຫຼຸບຕີລາຄາ ກ່ຽວກັບ ການປະຕິບັດວຽກງານຂອງຄະນະພົວພັນຕ່າງປະເທດສູນກາງພັກ ໄລຍະຜ່ານມາ ສະເໜີໂດຍສະຫາຍ ນາງ ວັນດີ ບຸດທະສະວົງ ຫົວໜ້າຫ້ອງການ ຄະນະພົວພັນຕ່າງປະເທດສູນກາງພັກ ໂດຍສະຫາຍໄດ້ຍົກໃຫ້ເຫັນບັນດາຜົນສໍາເລັດຜົນງານທີ່ຍາດມາໄດ້, ບາງດ້ານຄົງຄ້າງ, ບົດຮຽນທີ່ຖອດຖອນໄດ້, ພ້ອມທັງຜ່ານວາງທິດທາງ ແລະ ແຜນສູ້ຊົນໃນປີ 2021.

ສະຫາຍ ນາງ ສູນທອນ ໄຊຍະຈັກ ໄດ້ໃຫ້ກຽດໂອ້ລົມ ຊຶ່ງໄດ້ສະແດງຄວາມຊົມເຊີຍຕໍ່ບັນດາຜົນສຳເລັດ ແລະ ຜົນງານທີ່ພະນັກງານຄະນະພົວພັນຕ່າງປະເທດສູນກາງພັກ ຍາດມາໄດ້ໃນຕະຫຼອດໄລຍະ 5 ປີ (2016-2020), ອັນພົ້ນເດັ່ນແມ່ນ ຄະນະພົວພັນຕ່າງປະເທດສູນກາງພັກ ໄດ້ສໍາເລັດສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໄດ້ 100%, ການປັບປຸງກົງຈັກການຈັດຕັ້ງ, ວຽກງານກໍ່ສ້າງພັກ-ພະນັກງານ, ການປັບປຸງພື້ນຖານໂຄງລ່າງສໍານັກງານ; ການເປີດກວ້າງການພົວພັນກັບຕ່າງປະເທດໃນຮູບແບບໃໝ່ໃນສະຖານະການຂອງການແຜ່ລະບາດຂອງພະຍາດໂຄວິດ-19.

ໃນຕອນທ້າຍ, ສະຫາຍ ຫົວໜ້າຄະນະພົວພັນຕ່າງ ປະເທດສູນກາງພັກ ໄດ້ສະແດງຄວາມເຊື່ອໝັ້ນວ່າ ດ້ວຍຈິດໃຈມານະບຸກບືນ, ຄວາມສາມັກຄີເປັນເອກະພາບພາຍໃນ ຈະເຮັດໃຫ້ການປະຕິບັດໜ້າທີ່ຂອງ ຄຕພ ສືບຕໍ່ຍາດໄດ້ຜົນສຳເລັດຫຼາຍກວ່າເກົ່າ, ສືບຕໍ່ສ້າງສະພາບແວດລ້ອມສາກົນ ທີ່ສະດວກໃຫ້ແກ່ພາລະກິດແຫ່ງການປົກປັກຮັກສາ ແລະ ສ້າງສາປະເທດຊາດໃນຕໍ່ໜ້າ ສືບຕໍ່ສ້າງຜົນງານ ເພື່ອຂໍ່ານັບຮັບຕ້ອນກອງປະຊຸມໃຫຍ່ ສະມາຊິກພັກຄັ້ງທີ II ຂອງ ອົງຄະນະພັກ ຄຕພ ໃນຕໍ່ໜ້າ.

(ຂ່າວ: ແສງຈັນ)