ໜັງສືພິມ ປະຊາຊົນ

ງານມະໂຫລານສຽງແຄນເຊື້ອຊາດລາວ ມໍລະດົກໂລກ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 21/12/2020 09:45:47 ຈຳນວນຢ້ຽມຊົມ 7135 ຄັ້ງ

ສະມາຄົມສິລະປະແຄນ ລາວ ຮ່ວມກັບ ກົມສິລະປະ ການສະແດງ ກະຊວງຖະ ແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດງານມະໂຫລານສຽງແຄນ ເຊື້ອຊາດລາວ ມໍລະດົກໂລກ ເພື່ອສະເຫຼີມສະຫຼອງວັນ ເກີດ ປະທານ ໄກສອນ ພົມ ວິຫານ ຄົບຮອບ 100 ປີ, ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ເມື່ອວັນທີ 18 ທັນວາຜ່ານມານີ້ ທີ່ຫໍວັດທະນະທຳແຫ່ງຊາດ, ພາຍໃຕ້ການເປັນປະທານຂອງ ທ່ານ ກິແກ້ວ ໄຂຄຳພິທູນ ຄະນະເລຂາທິການສູນກາງພັກ ລັດ ຖະມົນຕີກະຊວງ ຖວທ ໂດຍໃຫ້ກຽດເຂົ້າຮ່ວມຂອງ ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ຜູ້ນຳພັກ-ລັດ, ແຂກຖືກເຊີນ ແລະ ມວນຊົນເຂົ້າຮ່ວມ.
ທ່ານ ກິແກ້ວ ໄຂຄຳພິທູນ ກ່າວຄຳເຫັນເປີດງານວ່າ: ການຈັດງານສຽງແຄນເຊື້ອຊາດລາວ ມໍລະດົກໂລກຄັ້ງນີ້ ແມ່ນມີເນື້ອໃນ ແລະ ຄວາມໝາຍສຳຄັນຫຼາຍກໍຄືເປັນການສ້າງບັນຍາກາດໃຫ້ແກ່ການສະເຫຼີມສະຫຼອງວັນເກີດຂອງ ປະທານ ໄກສອນ ພົມວິຫານ ຄົບຮອບ 100 ປີ, ເພື່ອສ້າງບັນຍາກາດໃຫ້ແກ່ການສະເຫຼີມສະຫຼອງ ວັນຊາດ 2 ທັນວາ ຄົບຮອບ 45 ປີ, ຊຸກຍູ້ປຸກລະດົມຂະບວນການ ສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນ ປະຕິວັດລາວ, ເພື່ອສ້າງຈິດສຳນຶກໃຫ້ທົ່ວປວງຊົນລາວທັງຊາດຮູ້ບຸນຄຸນ, ຄຸນງາມຄວາມດີ ແລະ ຄວາມປີຊາສາມາດຂອງພັກປະຊາຊົນ ປະຕິວັດລາວຜູ້ຈັດຕັ້ງ ແລະ ນຳພາທຸກໄຊຊະນະຂອງການປະຕິວັດລາວ ໃນນັ້ນ ເປັນການປຸກລະດົມໃຫ້ທົ່ວພັກ, ທົ່ວລັດ, ກຳລັງປະກອບອາວຸດ ແລະ ປະຊາຊົນລາວບັນດາເຜົ່າກຽມຈັດຕັ້ງເຊື່ອມຊຶມມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ ແລະ ສັງຄົມແຫ່ງຊາດຄັ້ງທີ IX, ເພື່ອເປັນການປຸກລະດົມກຳລັງໃຈຂອງຂະບວນການສິລະປະວັດທະນະທຳ ໂດຍສະເພາະແຄນລາວ ຊຶ່ງໄດ້ເຕົ້າໂຮມສິລະປິນໝໍແຄນ, ໝໍລຳ, ຊ່າງເຮັດແຄນ ເພື່ອພ້ອມກັນອະນຸລັກຮັກສາ ແລະ ເສີມຂະຫຍາຍມູນເຊື້ອຂອງແຄນ ແລະ ສຽງແຄນເຊື້ອຊາດລາວ ມໍລະດົກໂລກໃຫ້ຍືນຍົງຢູ່ຄູ່ຄົນລາວ, ຊາດລາວ ແລະ ຊາວໂລກຕະຫຼອດໄປ. ທ່ານກ່າວຕື່ມວ່າ: ການໄດ້ມາສຽງແຄນເຊື້ອຊາດລາວ ມໍລະດົກໂລກ ບວກກັບມໍລະດົກໂລກຫຼວງພະບາງ, ວັດພູຈຳປາສັກ ແລະ ທົ່ງໄຫຫີນຊຽງຂວາງ ໄດ້ນຳເອົາຊື່ສຽງ, ກຽດສັກສີອັນໃຫຍ່ຫຼວງໃຫ້ແກ່ຊາດລາວເຮົາກໍຄືມວນມະນຸດໂລກ ສະນັ້ນຈຶ່ງຮຽກຮ້ອງໃຫ້ປະຊາຊົນລາວທຸກຄົນຈົ່ງພ້ອມກັນປົກປັກຮັກສາ, ເສີມຂະຫຍາຍມໍລະດົກໂລກດັ່ງກ່າວໃຫ້ຄົງຢູ່ຄູ່ກັບຄົນລາວ ແລະ ປະເທດລາວຕະຫຼອດໄປ.
ໃນງານດັ່ງກ່າວຍັງມີຫຼາກຫຼາຍລາຍການສະແດງຄື: ມີດ່ຽວແຄນ ແລະ ປະດິດລາຍແຄນໂດຍແຄນອັນດັບໜຶ່ງຂອງ ສປປ ລາວ, ລຳຄອນສະຫວັນສັນລະເສີນປະທານ ໄກສອນ ພົມວິຫານ, ຂັບຊຳເໜືອລາວ ແລະ ຂັບໄຕແດງ, ລຳຜູ້ໄທປະກອບບົດຟ້ອນ, ເປົ່າແຄນມົ້ງ ປະກອບບົດຟ້ອນໝູ່ຍິງ-ຊາຍ, ຮ້ອງເພງແກ້ວຫຼັກເມືອງ, ລຳຕັ່ງຫວາຍປະກອບບົດຟ້ອນ, ດ່ຽວແຄນ,ເປົ່າແຄນວົງຍິງ-ຊາຍ, ຟ້ອນປະກອບເພງສຽງແຄນລາວ ແລະ ອື່ນໆ, ທຸກໆລາຍການສະແດງແມ່ນໄດ້ສ້າງຄວາມເບີກບານມ່ວນຊື່ນໃຫ້ກັບຜູ້ເຂົ້າຮ່ວມຊົມໄດ້ເປັນຢ່າງດີ, ໃນພິທີຍັງໄດ້ປະກາດຜົນ ແລະ ມອບລາງວັນການແຂ່ງຂັນສີມືຊ່າງແຄນດີເດັ່ນທົ່ວປະເທດ ປະຈຳປີ 2020 ຊຶ່ງຜູ້ຊະນະເລີດໄດ້ແກ່ ທ່ານ ບົວວັນ ອຸດົມສຸກ ເມືອງພູກູດ ແຂວງຊຽງຂວາງ ໄດ້ຮັບເງິນ 4 ລ້ານກີບ ພ້ອມດ້ວຍໂລ້ລາງວັນ ແລະ ໃບກຽດຕິຄຸນ, ຮອງຊະນະເລີດໄດ້ແກ່ ທ່ານ ຈັນສີ ອຸດົມສຸກ ໄດ້ຮັບເງິນ 3.200.000 ກີບ ພ້ອມດ້ວຍໂລ້ລາງວັນ ແລະ ໃບກຽດຕິຄຸນ, ລາງວັນທີສາມໄດ້ແກ່ ທ່ານ ແກ່ນ ອຸດົມສຸກໄດ້ຮັບເງິນ 2.500.000 ກີບ, ໂລ້ລາງວັນ, ໃບກຽດຕິຄຸນ ແລະ ລາງວັນຊົມເຊີຍໄດ້ແກ່ ທ່ານ ສາຍທອງ ສາຍນະສິນ ໄດ້ຮັບເງິນ 2 ລ້ານກີບ ພ້ອມດ້ວຍໃບກຽດຕິຄຸນ.
(ຂ່າວ: ສຳນານ)