ໜັງສືພິມ ປະຊາຊົນ

ການນຳຂັ້ນສູງຂອງພັກ-ລັດ ຂຶ້ນພິຊິດ ຍອດພູເບ້ຍ ພູສູງທີ່ສຸດຂອງລາວ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 22/12/2020 09:02:56 ຈຳນວນຢ້ຽມຊົມ 3092 ຄັ້ງ

ທ່ານ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ ຫົວໜ້າຄະນະຊີ້ນຳ ການພັດທະນາເຂດຈຸດສຸມໃຈກາງ ພ້ອມດ້ວຍຄະນະໄດ້ເປັນກຽດຂຶ້ນທ່ອງທ່ຽວພິຊິດຍອດພູເບ້ຍ ພູສູງທີ່ສຸດຂອງລາວ 2.820 ແມັດ ໂດຍມີທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ພ້ອມດ້ວຍຄະນະພັກ-ຄະນະນຳແຂວງ ແລະ ທ່ານ ຄຳໄພ ສົມຊະນະ ປະທານບໍລິສັດກຸ່ມບໍ ລິສັດຄຳໄພຊະນະຈຳກັດ ຜູ້ດຽວ ຕະຫຼອດຮອດພາກສ່ວນຈາກບັນດາກະຊວງຢູ່ສູນກາງ ແລະ ແຂວງເຂົ້າຮ່ວມຂະ ບວນການຢ່າງຫຼວງຫຼາຍ ເມື່ອບໍ່ດົນມານີ້.

ໂອກາດທີ່ມີຄວາມໝາຍສຳຄັນດັ່ງກ່າວ ທ່ານ ພັນຄຳ ວິພາວັນ ໄດ້ໃຫ້ກຽດ ໃຫ້ສຳ ພາດຕໍ່ນັກຂ່າວວ່າ: ພູເບ້ຍ ນອກຈາກມີຊື່ສຽງຄວາມສູງທີ່ສຸດຂອງລາວແລ້ວ ຍັງຄົງເຕັມໄປດ້ວຍຄວາມອຸດົມສົມບູນຮັ່ງ ມີຂອງຊັບພະຍາກອນທຳມະຊາດ ໂດຍສະເພາະແມ່ນຜືນປ່າໄມ້ໃຫຍ່ ແລະ ຊີວະພືດນາໆພັນທີ່ມີຄຸນຄ່າ ຢ່າງມະຫາສານຈົນບໍ່ສາມາດຕີລາຄາມູນຄ່າໄດ້, ມີຄວາມງົດງາມເໝືອນສວນອຸທິຍານ ຊຶ່ງບັນຫາສຳ ຄັນຕ້ອງໄດ້ປົກປັກຮັກສາ ແລະ ນຳໃຊ້ໃຫ້ເກີດປະໂຫຍດແກ່ປະ ເທດຊາດ ແລະ ບ້ານເມືອງ.
ສຳລັບໂຄງການພັດທະນາ ແມ່ນໄດ້ມອບໃຫ້ອຳນາດການປົກຄອງແຂວງໄຊສົມບູນສົມ ທົບກັບບໍລິສັດກຸ່ມຄຳໄພຊະນະຈຳກັດຜູ້ດຽວ ເພື່ອພັດທະນາພູ້ເບ້ຍໃຫ້ກາຍເປັນແຫຼ່ງທ່ອງທ່ຽວທຳມະຊາດຮັບປະກັນຄຸນ ຄ່າທາງທຳມະຊາດພ້ອມກັນ ນັ້ນກໍນຳໃຊ້ໃຫ້ເກີດຜົນປະ ໂຫຍດສູງສຸດເພາະການທີ່ ພວກເຮົາໄດ້ຂຶ້ນພິຊິດຍອດພູເບ້ຍນີ້ໄດ້ແມ່ນສະແດງໃຫ້ເຫັນໄຊຊະນະຢ່າງໃຫຍ່ຫຼວງຂອງວຽກງານປ້ອງກັນຊາດ ແລະ ປ້ອງກັນຄວາມສະຫງົບ ຂອງປະເທດເຮົາອັນໄດ້ປະ ກອບສ່ວນທີ່ສຳຄັນ ໃນການສະເຫຼີມສະຫຼອງວັນສະຖາ ປະນາ ສປປ ລາວ 2 ທັນວາຄົບຮອບ 45 ປີ ແລະ ວັນເກີດປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 100 ປີ ທັງນີ້ທ່ານກໍໄດ້ກ່າວຍ້ອງຍໍຊົມເຊີຍທຸກພາກສ່ວນໂດຍສະເພາະກຳລັງປ້ອງກັນຊາດ, ປ້ອງກັນຄວາມສະຫງົບພໍ່ແມ່ພີ່ນ້ອງປະຊາຊົນລາວບັນ ດາເຜົ່າພາຍໃນແຂວງໄຊສົມ ບູນທີ່ໄດ້ມີສ່ວນຮ່ວມໃນການປົກປັກຮັກສາພູເບ້ຍແຫ່ງນີ້ຈົນມາເຖິງທຸກວັນນີ້.
ທ່ານ ພົນໂທ ສຸວອນ ເລືອງ ບຸນມີ ຮອງລັດຖະມົນຕີກະ ຊວງປ້ອງກັນປະເທດກ່າວວ່າ: ວຽກງານປ້ອງກັນຊາດ-ປ້ອງກັນຄວາມສະຫງົບຍາມໃດກໍຕິດພັນກັບການພັດທະນາ ຊຶ່ງພູເບ້ຍແຫ່ງນີ້ແມ່ນຈຸດຍຸດທະສາດທີ່່ສຳຄັນບໍ່ວ່າໃນຍາມຕໍ່ສູ້ກູ້ຊາດກໍຄືໄລຍະການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍການຂຶ້ນພິຊິດຍອດພູເບ້ຍແມ່ນມີຄວາມໝາຍສຳຄັນ ຊຶ່ງວຽກປ້ອງກັນຊາດປ້ອງກັນຄວາມສະຫງົບໄດ້ເປັນເງື່ອນໄຂ ແລະ ປັດໄຈສຳຄັນ ໂດຍສະເພາະແມ່ນການພັດທະນາຂອງບໍລິສັດຄຳໄພຊະນະແມ່ນໄດ້ສ້າງຄວາມສະດວກແກ່ການພັດທະນາຮອດຈຸດໃດກຳລັງກໍຈະຮອດຈຸດນັ້ນອັນໄດ້ເປັນສິ່ງສຳຄັນ ເຮັດໃຫ້ເຮົາສາມາດຂຶ້ນພິຊິດຍອດພູເບ້ຍໃນຄັ້ງນີ້.
ດ້ານທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານ ແຫ່ງ ສປປ ລາວ ກ່າວວ່າ: ມື້ນີ້ຄະນະນຳທະ ນາ ຄານ ແຫ່ງ ສປປ ລາວ ແລະ ທະນາຄານທຸລະກິດປະກອບມີທະນາຄານພັດທະນາລາວ, ທະນາຄານນະໂຍບາຍ ແລະ ທະນາຄານການຄ້າຕ່າງປະ ເທດລາວມະຫາຊົນຮູ້ສຶກເປັນ ກຽດ ແລະ ພາກພູມໃຈເປັນ ຢ່າງຍິ່ງທີ່ໄດ້ຮ່ວມກັບຄະນະຮັບ ຜິດຊອບຊີ້ນຳໆການພັດທະ ນາເຂດຈຸດສຸມໃຈກາງຂຶ້ນພິຊິດຍອດພູ້ເບ້ຍເປັນຄັ້ງທຳອິດໃນຊີວິດ ຊຶ່ງຜ່ານມາໄດ້ຮໍ່າຮຽນແຕ່ໃນພູມສາດປະຫວັດສາດ ແຕ່ມື້ນີ້ໄດ້ມາສຳຜັດເຫັນວ່າເປັນສິ່ງທີ່ພິເສດທີ່ສຸດຍ້ອນມີຄວາມສວຍງາມຫຼາຍມີຄວາມອຸດົມສົມບູນ ແລະ ບໍ່ເຄີຍເຫັນ ຢູ່ທີ່ໃດມາກ່ອນຈາກທີ່ເຄີຍໄດ້ໄປທ່ຽວຫຼາຍໆປະເທດທັງນີ້ກໍຂໍຂອບໃຈທາງບໍລິສັດກຸ່ມຄຳໄພຊະນະທີ່ໄດ້ສົມທົບກັບກຳ ລັງປ້ອງຊາດ-ປ້ອງກັນຄວາມສະຫງົບປະກອບສ່ວນໃນການພັດທະນາເຮັດໃຫ້ພວກເຮົາໄດ້ມາສຳຜັດຕົວຈິງ.
ຜ່ານການຢ້ຽມຊົມຄັ້ງນີ້ ທ່ານ ນາງ ວັດທະນາ ດາລາລອຍ ກ່າວຢໍ້າວ່າ: ພາກສ່ວນທະນາຄານມີຄວາມພ້ອມແລ້ວ ທີ່ຈະປະກອບສ່ວນຊ່ວຍພັກຊ່ວຍລັດ ແລະ ບໍລິສັດໃນການ ພັດທະນາພູເບ້ຍແຫ່ງນີ້ໃຫ້ ກາຍເປັນສະຖານທີ່ທ່ອງທ່ຽວ ເປັນແຫຼ່ງສ້າງລາຍຮັບແກ່ແຂວງ ກໍຄືປະຊາຊົນໃນທ້ອງຖິ່ນ ເພື່ອເປັນສິ່ງເອກອ້າງແກ່ຊາວໂລກ ໂດຍຫວັງວ່າພວກເຮົາຈະໄດ້ມາທ່ຽວຊົມອີກຄັ້ງໃນຕໍ່ໆໄປ.
ຂະນະທີ່ ທ່ານ ຄຳໄພ ສົມຊະນະ ກ່າວວ່າ: ຄະນະນຳ ຂັ້ນສູງທີ່ຂຶ້ນທ່ອງທ່ຽວພິຊິດຍອດພູເບ້ຍ ໃນຄັ້ງນີ້ແມ່ນເປັນຄັ້ງປະຫວັດສາດ ແລະ ເຫັນວ່າແຕ່ລະທ່ານທີ່ມາຊື່ນຊົມນີ້ ແມ່ນມີຄວາມສຸກຫຼາຍກັບຄວາມສວຍງາມຂອງພູເບ້ຍ ໂດຍສະເພາະຜືນປ່າໄມ້ໃຫຍ່ ດົງດິບທີ່ປຽບສະເໝືອນຫຼັງຄາ ຂອງປະເທດລາວ, ດົງປ່າໄມ້ ຂົນເທບນິຍາຍແຫ່ງຄວາມເປັນຈິງ, ຫີນສີລານໍແຮດລ້ານປີ, ສວນດອກກຸຫຼາບລ້ານປີ ແລະຊີວະນາໆພັນຕະຫຼອດຮອດສັດ ສາວາສິ່ງອື່ນໆ. ຫຼັງຈາກນີ້ທາງບໍລິສັດກໍຈະໄດ້ເລັ່ງໃສ່ການປັບປຸງ ແລະ ກໍ່ສ້າງບັນດາກິດຈະກຳ ແລະ ເສັ້ນທາງເບຕົງຂຶ້ນຫາແຫຼ່ງທ່ອງທ່ຽວທີ່ມີຄວາມຍາວທັງໝົດ 20 ກວ່າກິໂລແມັດ ໃຫ້ສຳເລັດພາຍໃນປີ 2021 ກ່ອນຈະໄດ້ເປີດໃຫ້ບັນດານັກທ່ອງທ່ຽວທັງພາຍໃນ ແລະ ຕ່າງປະເທດໄດ້ຊື່ນຊົມຢ່າງເປັນທາງການພາຍໃນປີ 2022 ຢ່າງແນ່ນອນ.
(ຂ່າວ: ໄຊສົມບູນ)

ຂ່າວທີ່ໄດ້ຮັບຄວາມນິຍົມ