ໜັງສືພິມ ປະຊາຊົນ

ເຜີຍແຜ່ຜົນສຳເລັດກອງປະຊຸມລັດຖະມົນຕີສະພາປະຊາຄົມ ວັດທະນະທຳ-ສັງຄົມ ອາຊຽນ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 24/12/2020 09:09:03 ຈຳນວນຢ້ຽມຊົມ 6240 ຄັ້ງ

ກອງປະຊຸມເຜີຍແຜ່ຜົນສໍາເລັດກອງປະຊຸມລັດ ຖະມົນຕີສະພາປະຊາຄົມວັດທະນະທໍາ-ສັງຄົມ ອາຊຽນ ໄດ້ຈັດຂຶ້ນໃນວັນທີ 23 ທັນວານີ້ ທີ່ຫໍວັດທະນະທໍາແຫ່ງຊາດ ໂດຍການເປັນປະທານຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ມີບັນດາເຈົ້າໜ້າ ທີ່ອາວຸໂສຂະແໜງການເສົາຄຳ້ວັດທະນະທໍາ-ສັງຄົມອາຊຽນ ສປປ ລາວ ແລະ ຕາງໜ້າຈາກກະຊວງ, ຂະແໜງການທີ່ກ່ຽວຂ້ອງເຂົ້າຮ່ວມ.
ທ່ານ ສະຫວັນຄອນ ຣາຊມຸນຕຣີ ໄດ້ໃຫ້ຮູ້ວ່າ: ຜົນສໍາ ເລັດ ແລະ ຜົນງານທີ່ພົ້ນເດັ່ນໃນການ ເຄື່ອນໄຫວຈັດຕັ້ງປະຕິບັດວຽກງານການພົວພັນສາກົນໃນພາກພື້ນໂດຍສະເພາະແມ່ນຂົງເຂດ ວຽກງານ ການຮ່ວມມືອາຊຽນຊຶ່ງມີບົດບາດສໍາຄັນຕໍ່ການປະຕິບັດແນວທາງການຕ່າງປະເທດ ແລະ ລາຍງານຜົນສໍາເລັດຂອງກອງປະຊຸມສຸດຍອດອາ ຊຽນ ຄັ້ງທີ 36 ແລະ 37; ກອງປະຊຸມລັດຖະມົນຕີປະຊາຄົມ ວັດທະນະທໍາ-ສັງຄົມອາຊຽນ ຄັ້ງທີ 23 ແລະ 24 ແລະ ບັນດາ ກອງປະຊຸມລັດຖະມົນຕີຂອງແຕ່ລະຂະແໜງການຂອງເສົາຄໍ້າວັດທະນະທໍາ-ສັງຄົມອາຊຽນ; ພ້ອມນີ້ ໃນກອງປະຊຸມກໍໄດ້ຮັບຟັງການປະກອບຄໍາຄິດຄໍາເຫັນ ເພື່ອພ້ອມກັນຊອກຫາວິທີການທີ່ເໝາະສົມ ຊຸກຍູ້ ໃຫ້ການຈັດຕັ້ງປະຕິບັດຂອບການຮ່ວມມືວຽກງານອາຊຽນ ໃຫ້ເກີດຜົນປະໂຫຍດສູງສຸດຕໍ່ຂະແໜງການ ດັ່ງກ່າວໃຫ້ນັບມື້ກວ້າງຂວາງ ມີປະສິດທິຜົນຍິ່ງຂຶ້ນ ເວົ້າສະເພາະໃນຊ່ວງໄລຍະທີ່ພວມປະສົບກັບການລະບາດຂອງພະຍາດ ໂຄວິດ-19 ເພື່ອໃຫ້ເຂົ້າໃຈເຖິງການດໍາລົງຊີວິດ ແລະ ປັບຕົວໃຫ້ສອດຄ່ອງກັບເງື່ອນໄຂ “ວິຖີການດໍາລົງຊີວິດ ແບບໃໝ່”ດ້ວຍຄວາມເອົາໃຈໃສ່. ສືບຕໍ່ຜັນຂະຫຍາຍເຜີຍແຜ່ໄປຍັງເພື່ອນຮ່ວມງານ ແລະ ບຸກຄົນອື່ນໆ ເພື່ອເຊື່ອມຊຶມຮັບຮູ້-ເຂົ້າໃຈກ່ຽວກັບວຽກງານການຮ່ວມມືອາຊຽນ ເວົ້າລວມ, ເວົ້າສະເພາະກໍຄືວຽກ ງານການຮ່ວມມືຂອງເສົາຄໍ້າວັດທະນະທໍາ-ສັງຄົມ ເພື່ອເຂົ້າສູ່ບາດກ້າວອັນໃໝ່ທີ່ໜັກແໜ້ນກວ່າເກົ່າ.

(ຂ່າວ: ຍຸພິນ)