ໜັງສືພິມ ປະຊາຊົນ

ຜະລິດຕະພັນອຸດສາຫະກຳ ເພື່ອສົ່ງອອກ ບໍ່ຈຳເປັນຕ້ອງຂໍໃບຢັ້ງຢືນອີກຕໍ່ໄປ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 25/12/2020 09:13:08 ຈຳນວນຢ້ຽມຊົມ 5566 ຄັ້ງ

ກະຊວງອຸດສາຫະກຳ ແລະ ການຄ້າ (ອຄ) ອອກແຈ້ງການໃຫ້ຢຸດຕິການອອກໃບຢັ້ງຢືນຜະລິດຕະພັນອຸດສາຫະກໍາ ເພື່ອສົ່ງອອກ (ຍົກເວັ້ນຜະລິດຕະພັນໄມ້). ທັງນີ້ ເພື່ອເປັນການສົ່ງເສີມ ແລະ ອໍານວຍຄວາມສະດວກໃນການສົ່ງອອກຜະລິດຕະພັນອຸດສາຫະກໍາໃຫ້ວ່ອງໄວ ແລະ ຄ່ອງຕົວ ແນໃສ່ຫຼຸດຜ່ອນຂັ້ນຕອນໃນການດໍາເນີນທຸລະກິດຂອງພາກທຸລະກິດ ແລະ ສ້າງສິ່ງອໍານວຍຄວາມສະດວກທາງດ້ານການຄ້າ ແລະ ການລົງທຶນ.
ຕາມຂໍ້ມູນຂອງສູນຂໍ້ມູນຂ່າວສານດ້ານການຄ້າຂອງ ສປປ ລາວ ໃຫ້ຮູ້ວ່າ: ກົມອຸດສາຫະກໍາ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ ໄດ້ອອກແຈ້ງການກ່ຽວກັບຢຸດຕິການອອກໃບຢັ້ງຢືນຜະລິດຕະພັນອຸດສາຫະກໍາເພື່ອສົ່ງອອກ, ເລກທີ 1777/ກອຫ.ມຖ, ລົງວັນທີ 18 ທັນວາ 2020 ພ້ອມດ້ວຍເອກກະສານຄັດຕິດ ເລກທີ 663/ອຄ.ກອກ ກ່ຽວກັບການນໍາໃຊ້ຕາຕະລາງຮ່າງເອກະສານສໍາລັບການເຄື່ອນໄຫວປະຈໍາປີ ຂອງໂຮງງານອຸດສາຫະກໍາປຸງແຕ່ງ ສະບັບເລກທີ 663/ອຄ.ກອຖ, ລົງວັນທີ 8 ຕຸລາ 2008.
ຈຸດປະສົງຂອງແຈ້ງການສະບັບໃໝ່ນີ້ແມ່ນໃຫ້ຢຸດຕິການອອກໃບຢັ້ງຢືນຜະລິດຕະພັນອຸດສາຫະກໍາ ເພື່ອສົ່ງອອກ ເພື່ອເປັນການສົ່ງເສີມ ແລະ ອໍານວຍຄວາມສະດວກໃນການສົ່ງອອກຜະລິດຕະພັນອຸດສາຫະກໍາ ໃຫ້ວ່ອງໄວ ແລະ ຄ່ອງຕົວ ແນໃສ່ຫຼຸດຜ່ອນຂັ້ນຕອນໃນການດໍາເນີນທຸລະກິດ ຂອງພາກທຸລະກິດ ແລະ ສ້າງສິ່ງອໍານວຍຄວາມສະດວກທາງດ້ານການຄ້າ ແລະ ການລົງທຶນ (ຍົກເວັ້ນຜະລິດຕະພັນໄມ້).
ເຖິງຢ່າງໃດກໍຕາມ ບັນດາຜະລິດຕະພັນປະເພດອຸດສາຫະກໍາເພື່ອສົ່ງອອກດັ່ງກ່າວ (ຍົກເວັ້ນຜະລິດຕະພັນໄມ້) ຍັງຕ້ອງໄດ້ສືບຕໍ່ປະຕິບັດ ຂຶ້ນແຜນການເຄື່ອນໄຫວປະຈໍາປີຂອງຕົນຢ່າງປົກກະຕິ ຕາມແຈ້ງການ ສະບັບເລກທີ 663/ອຄ.ກອຖ, ລົງວັນທີ 8 ຕຸລາ 2008.
(ຂ່າວ: ສຸກສະຫວັນ)