ຫົວ​ຂໍ້ : ເປີດຕະຫຼາດສົມຫວັງ ຫຼັກ 8 ຢ່າງເປັນທາງການ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 08/01/2020 08:52:44 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1022 ຄັ້ງ

   ຕະ­ຫຼາດສົມ​ຫວັງ  ຫຼັກ  8 ໄດ້​ເປີດ​ຢ່າງ​ເປັນ​ທາງ​ການ ເມື່ອ​ວັນ​ທີ 7 ມັງ­ກອນນີ້ ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ອາດສະ­ພັງ​ທອງ  ສີ​ພັນ​ດອນ  ຮອງເຈົ້າ​ຄອງ​ນະ­ຄອນ­ຫຼວງວຽງຈັນ, ທ່ານ  ວົງ​ເດືອນ  ບຸນ​ຍະ​ແສງ  ເຈົ້າ­ເມືອງ​ຫາດ​ຊາຍ​ຟອງ  ແລະ ແຂກ​ຖືກ​ເຊີນ​ເຂົ້າ​ຮ່ວມ.
ທ່ານ  ສົມ​ຫວັງ ມາ​ລິ​ຍາ ປະ­ທານ​ບໍ­ລິ­ສັດສົມ​ຫວັງ​ຈະເລີນ​ ກໍ່­ສ້າງ​ຂົວ​-​ທາງ​ຈຳ­ກັດ (ເຈົ້າ​ຂອງ​ຕະຫຼາດ​ສົມ​ຫວັງ ຫຼັກ 8) ໄດ້​ລາຍ​ງານ​ວ່າ:  ຕະ­ຫຼາດແຫ່ງນີ້ມີ​ ທີ່​ຕັ້ງ​ຢູ່​ບ້ານ​ຫາດຊາຍຂາວ​ຂຶ້ນ​ກັບ​ເມືອງ​ຫາດ​ຊາຍ​ຟອງ ນະຄອນ­ຫຼວງ​ວຽງ​ຈັນ, ມີ​ຊາຍແດນ​ ຕິດ​ກັບ​ເມືອງ​ສີສັດຕະ​ນາກ, ຕິດ​ກັບ​ຖະໜົນ​ທ່າ​ເດື່ອມີເງື່ອນ­ໄຂ​ໃຫ້​ນັກ​ທ່ອງ​ທ່ຽວພາຍ​ໃນ ແລະ ຕ່າງ­ປະ­ເທດໄດ້ແວ່ຊື້​ຜະ­ລິດຕະ​ພັນເປັນ​ຂອງ​ຂວັນທີ່ລະ­ນຶກ,  ມີ​ເນື້ອ­ທີ່​ທັງ​ໝົດ 17.520 ແມັດ, ເນື້ອ­ທີ່​ອາ­ຄານ 14.481 ແມັດ, ມີ​ເນື້ອທີ່ຈອດລົດ ແລະ ສິ່ງອໍາ​ນວຍຄວາມ​ສະດວກຕ່າງໆ.  

   ເປັນຕະຫຼາດ​ແຫ່ງໜຶ່ງຂອງ​ເມືອງຫາດ​ຊາຍຟອງ​ທີ່​ອອກ​ແບບ  ແລະ  ກໍ່­ສ້າງ​ໃຫ້ໄດ້​ຕາມຄໍາ ຂວັນ 6 ສ ຂອງ​ນະຄອນ­ຫຼວງ​ວາງອອກ, ເປັນຕະຫຼາດ​ທີ່​ປອດ​ໄພ, ສະຫວ່າງ, ເປັນ​ລະ­ບຽບ, ສະ​ເໜ່ ແລະ ສີ­ວິ­ໄລ ທັນ​ສະ­ໄໝ ຊຶ່ງ​ໄດ້​ຮັບ​ອະນຸຍາດສ້າງຕັ້ງຈາກ ເມືອງ​ຫາດ​ຊາຍ​ຟອງ​ ສະ­ບັບ​ເລກ​ທີ 01/ອຄ ຫຊຟ, ລົງ​ວັນ​ທີ 29 ກັນ­ຍາ 2017, ຕະຫຼາດ​ແຫ່ງ​ນີ້​ມີ​ຄວາມ​ສໍາ​ຄັນ​ເພາະວ່າ ​ເປັນ​ຕະ­ຫຼາດ​ຢູ່​ຊານ­ເມືອງ ແລະ ໃນ​ອະ­ນາ​ຄົດຈະ​ເປັນ​ຕົວເມືອງ ແນ­ໃສ່​ຮັບ​ໃຊ້​ສັງ­ຄົມ​ທົ່ວ​ໄປໃຫ້​ ໄດ້​ຮັບ​ການ​ບໍ­ລິ­ໂພກ​ຫຼາຍ​ຂຶ້ນ ເພື່ອ​ຊຸກ­ຍູ້​ສົ່ງ­ເສີມ​ໃຫ້​ຊາວກະ­ ສິ­ກອນຜູ້​ຜະ­ລິດ​ສິນ­ຄ້າ​ໂອ​ດັອບ,  ກຸ່ມ​ການ​ຜະ­ລິດ​ພືດ​ກະ​ສິ​ກໍາອິນ​ຊີ ແລະ ກຸ່ມ​ຜະ­ລິດ​ສິນ­ຄ້າ​ອື່ນໆ  ພາຍ​ໃນ​ເມືອງ​ຫາດ​ຊາຍ​ຟອງ​ກໍຄື​ບັນ­ດາ​ເມືອງ​ອ້ອມ​ຂ້າງ​ນະ  ­ຄອນຫຼວງ​ວຽງ​ຈັນ, ຕ່າງ​ແຂວງ ແລະ ຕ່າງ­ປະ­ເທດ ເພື່ອ​ເປັນ​ຈຸດ​ແລກ­ປ່ຽນ​ສິນ­ຄ້າກະສິ​ກໍາ,  ຫັດ​ຖະ​ກໍາ​ທຸກ​ປະ­ເພດ, ປັດ­ຈຸ­ບັນ​ໄດ້​ສຳ­ເລັດ​ການ​ກໍ່ສ້າງ​ ຕາມ​ໜ້າ​ວຽກ​ຕ່າງໆ​ທີ່​ໄດ້​ກຳນົດ​ໄວ້​ຄື:

    ສຳ­ເລັດ​ການ​ຈັດ​ສັນ​ຈຸດ​ຂາຍ​ອອກ​ເປັນ 8 ໂຊນໃຫຍ່ ມີ 448 ຈຸດ​ຂາຍ ແລະ ໄດ້​ແບ່ງອອກ​ ເປັນ​ແຕ່​ລະ​ໂຊນ, ລວມມູນ​ຄ່າ​ ການ​ລົງ­ທຶນຂອງ​ໂຄງການ​ທັງ ໝົດ 44 ຕື້​ກ​ວ່າກີບ ແຕ່​ໄດ້​ສ້າງ​ຕົວ​ຈິງ​ໄລ­ຍະ​ທີ 1 ລວມ 29 ຕື້​ກີບ ໂດຍ​ແມ່ນ​ທຶນ​ຂອງ​ຜູ້​ປະ ­ກອບ​ການ​ທັງ​ໝົດ​ກໍຄື​ທຶນ​ຈາກ​ບໍ­ລິ­ສັດສົມ​ຫວັງ​ຈະ­ເລີນ​ກໍ່­ສ້າງ​ຂົວ​-​ທາງ​ຈຳ­ກັດ.
   ໃນ​ໂອ­ກາດ​ດັ່ງ­ກ່າວ​   ທ່ານ ອາດ​ສະ­ພັງ​ທອງ  ສີ​ພັນ​ດອນ ໄດ້​ຕັດ​ແຖບ​ຜ້າ  ແລະ  ໃຫ້​ກຽດ​ລັ່ນ​ຄ້ອງ 9 ບາດ ເພື່ອ​ເປັນ​ສີລິ​ມຸງ­ ຄຸນ​ໃຫ້​ແກ່​ການ​ເປີດ​ຕະ­ຫຼາດດັ່ງ­ ກ່າວ​ອີກ​ດ້ວຍ.
(ຂ່າວ-ພາບ: ສຳ​ນານ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110