ໜັງສືພິມ ປະຊາຊົນ

ທູດລາວ ມອບເງິນຊ່ວຍເຫຼືອປະຊາຊົນຫວຽດນາມ ທີ່ຖືກຜົນກະທົບຈາກໄພທຳມະຊາດ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 05/01/2021 09:27:03 ຈຳນວນຢ້ຽມຊົມ 3257 ຄັ້ງ

ໃນອາທິດຜ່ານມານີ້ ທີ່ສູນ ກາງແນວໂຮມປະເທດຊາດຫວຽດນາມ ໄດ້ມີພິທີມອບ-ຮັບເງິນຊ່ວຍເຫຼືອຈາກສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ຈຳນວນ 165.000.000 ດົງ (ໜຶ່ງຮ້ອຍຫົກສິບຫ້າລ້ານດົງ) ເພື່ອນຳໄປຊ່ວຍເຫຼືອປະຊາຊົນພາກກາງ ແລະ ເຂດໄຕຫງວຽນ ຫວຽດນາມ ທີ່ຖືກຜົນກະທົບຈາກໄພທຳມະຊາດ, ກ່າວມອບ ໂດຍທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ແລະ ຕາງໜ້າລັດ ຖະບານຫວຽດນາມ ກ່າວຮັບ ໂດຍ ແມ່ນທ່ານ ເຫົາ ອາ ເລັ່ງ (Hau A Lenh) ກຳມະການສູນກາງພັກ ຮອງປະທານແນວໂຮມປະເທດຊາດຫວຽດນາມ ພ້ອມດ້ວຍພະນັກງານທັງສອງຝ່າຍເຂົ້າຮ່ວມເປັນຂີພິຍານ.
ໃນໂອກາດກ່າວມອບທ່ານ ແສງເພັດ ຮຸ່ງບຸນຍວງ ກ່າວວ່າ: ໃນປີ 2020 ສອງປະເທດພວກເຮົາໄດ້ປະສົບກັບຄວາມຫຍຸ້ງຍາກຫຼາຍປະການ ໂດຍສະເພາະພະຍາດໂຄວິດ-19 ໄດ້ລະບາດ ແລະ ແຜ່ລາມໄປທົ່ວໂລກ ໃນນັ້ນກໍລວມທັງ ສສ ຫວຽດນາມ ແລະ ສປປ ລາວ ເຮັດໃຫ້ສົ່ງຜົນກະທົບຕໍ່ ການພັດທະນາເສດຖະກິດ-ສັງ ຄົມຢ່າງໜັກໜ່ວງ, ແຕ່ໃນເວ ລາດຽວກັນນີ້ໄພພິບັດທຳມະຊາດພັດເກີດຂຶ້ນມາຕື່ມເຮັດໃຫ້ເຂດພາກກາງ ແລະ ເຂດ ໄຕຫງວຽນຂອງຫວຽດນາມ ພື້ນຖານໂຄງ ລ່າງເຮືອນຊານບ້ານຊ່ອງ ແລະ ການຜະລິດຂອງປະຊາຊົນຖືກທຳລາຍຢ່າງໜັກໜ່ວງ, ເພື່ອ ຟື້ນຟູຄືນພື້ນຖານໂຄງລ່າງໂດຍສະເພາະເຮືອນຢູ່ ແລະ ຈິດໃຈຂອງປະຊາຊົນ, ພັກ- ລັດ ແລະ ປະຊາຊົນຫວຽດນາມໄດ້ນຳໃຊ້ທຶນມະຫາສານເຂົ້າໃນການປົວແປງ, ເຫັນໄດ້ເຖິງຄວາມຈຳເປັນອັນຮີບດ່ວນໃນການແກ້ໄຂຊີວິດການເປັນຢູ່ຂອງປະຊາຊົນໃຫ້ກັບຄືນມາສູ່ສະພາບປົກກະຕິໂດຍໄວນັ້ນ ເພື່ອສະແດງຄວາມເປັນຫ່ວງເປັນໄຍ ແລະ ຄວາມສາມັກ ຄີເປັນຈິດໜຶ່ງໃຈດຽວກັບປະ ຊາຊົນຫວຽດນາມທົ່ວປະເທດ ທາງພະນັກງານສະຖານທູດແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍນັກຄົ້ນຄວ້າ-ນັກສຶກສາລາວທີ່ກຳລັງສຶກສາຢູ່ຫວຽດນາມໄດ້ພ້ອມກັນປະກອບສ່ວນເງິນທຶນເລັກໆໜ້ອຍໆຈາກໃຈຈິງຂອງຕົນ ເພື່ອຊ່ວຍເຫຼືອປະຊາຊົນຫວຽດນາມ ທີ່ໄດ້ຮັບຜົນກະທົບຈາກໄພທຳມະຊາດ.
ມູນຄ່າການຊ່ວຍເຫຼືອຄັ້ງນີ້, ເຖິງວ່າເປັນຈຳນວນເງິນທີ່ບໍ່ຫຼວງຫຼາຍແຕ່ກໍແມ່ນການປະກອບສ່ວນທີ່ມາຈາກໝົດຈິດໝົດໃຈຂອງພະນັກງານສະຖານທູດ, ນັກສຶກສາ ແລະ ຂອງອ້າຍນ້ອງໝູ່ເພື່ອນໝົດທຸກຄົນໃນການຢືນຢູ່ຄຽງບ່າຄຽງໄຫຼ່ກັບພັກ, ລັດ ແລະ ປະຊາ ຊົນຫວຽດນາມອ້າຍນ້ອງໃນ ເວ ລາທີ່ພົບກັບຄວາມຫຍຸ້ງຍາກ.
(ຂ່າວ: ກະຊວງການຕ່າງປະເທດ)