ໜັງສືພິມ ປະຊາຊົນ

ເຂື່ອນໄຟຟ້ານ້ຳກົງ 1 ຊຸກຍູ້ອຸປະກອນການສຶກສາໃຫ້ໂຮງຮຽນປະຖົມວຽງໄຊ 150 ກີບ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 05/01/2021 09:44:36 ຈຳນວນຢ້ຽມຊົມ 3091 ຄັ້ງ

ໂຄງການເຂື່ອນໄຟຟ້ານໍ້າກົງ 1 ເມືອງພູວົງ ແຂວງ ອັດຕະປື ໄດ້ໃຫ້ການຊ່ວຍເຫຼືອຊຸກຍູ້ການສຶກສາໃຫ້ໂຮງຮຽນປະຖົມສົມບູນບ້ານວຽງໄຊ ເມືອງພູວົງ ແຂວງ ອັດຕະປື ດ້ວຍການປັບປຸງ ແລະ ສ້ອມແປງອາຄານຮຽນ ແລະ ອຸປະກອນການສຶກສາຫຼາຍຢ່າງ ລວມມູນຄ່າ 150 ລ້ານກີບ.

ເມື່ອບໍ່ດົນມານີ້ ທີ່ໂຮງຮຽນປະຖົມສົມບູນ ບ້ານວຽງໄຊ ເມືອງພູວົງ ແຂວງອັດຕະປື ໄດ້ມີພິທີມອບ-ຮັບ ສຳເລັດການສ້ອມແປງອາຄານຮຽນ, ອຸປະກອນການສຶກສາ ແລະ ອຸປະກອນກິລາ ລະຫວ່າງ ໂຄງການເຂື່ອນໄຟຟ້ານຳ້ກົງ 1 ກັບ ໂຮງຮຽນປະຖົມສົມບູນ ບ້ານວຽງໄຊ ໂດຍມີ ທ່ານ ຄໍາຊຽງ ພິມມະຈັນ ກຳມະການພັກເມືອງ ຮອງເຈົ້າເມືອງພູວົງ, ທ່ານ ສີພອນ ວັນນະລາດ ຮອງຫົວໜ້າພະແນກສຶກສາທິການ ແລະ ກິລາແຂວງ, ທ່ານ ຊາວດົງ ຮອງຜູ້ອຳນວຍ ການ ໂຄງການເຂື່ອນໄຟຟ້ານຳ້ກົງ 1, ເລຂາພັກບ້ານ, ຜູ້ອຳນວຍການໂຮງຮຽນ, ພະນັກງານຄູ-ອາຈານ, ນັກຮຽນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ຊາວດົງ ໃຫ້ຮູ້ວ່າ: ໂຄງການເຂື່ອນໄຟຟ້ານໍ້າກົງ 1 ແມ່ນໂຄງການໜຶ່ງ ທີ່ໄດ້ຮັບການປະຕິບັດຕາມແນວຄິດຂອງ ກຸ່ມບໍລິສັດ ຊານເສຍ China Tree Gorges Group ໃນການກໍ່ສ້າງສະຖານີໄຟຟ້າ ປັບປຸງສະພາບແວດລ້ອມ, ຊຸກຍູ້ເສດຖະ ກິດ ແລະ ສ້າງຜົນປະໂຫຍດໃຫ້ແກ່ປະຊາຊົນ, ປະຕິບັດໜ້າທີ່ຕໍ່ສັງຄົມຢ່າງຈິງຈັງ ເພື່ອປະກອບສ່ວນເຂົ້າໃນການພັດທະນາເສດຖະກິດທ້ອງຖິ່ນ; ໃນໄລຍະຜ່ານມາ ໂຄງການກໍໄດ້ມີ ການປະກອບສ່ວນຊຸກຍູ້-ສົ່ງເສີມ ການພັດທະນາເສດຖະກິດ - ສັງຄົມທ້ອງຖິ່ນຫຼາຍຢ່າງ ໂດຍສະເພາະ ແມ່ນດ້ານການສຶກສາ ແລະ ຄັ້ງນີ້ ໂຄງການເຂື່ອນໄຟຟ້ານໍ້າກົງ 1 ແມ່ນ ໄດ້ຊ່ວຍປັບປຸງ ສ້ອມແປງອາຄານຮຽນຂອງໂຮງຮຽນປະຖົມສົມບູນບ້ານວຽງໄຊ ເຊັ່ນ: ເພດານ, ວົງປະ ຕູ ແລະ ບານປະຕູ ຂອງຫ້ອງຮຽນ, ພ້ອມນີ້ ກໍໄດ້ສະໜອງເຄື່ອງຮັບໃຊ້ຫ້ອງການເປັນຕູ້ມ້ຽນເອກະສານ, ໂຕະ-ຕັ່ງຄູ, ນັກຮຽນ ແລະ ອຸປະກອນການສຶກສາ ແລະ ກິລາ ອີກຫຼາຍຢ່າງເປັນຕົ້ນແມ່ນປື້້ມຂຽນ, ບິກຂຽນ, ບານເຕະ, ກະຕໍ້ ແລະ ອື່ນໆອີກ ລວມເປັນມູນຄ່າ 150 ລ້ານກີບ.

ການຊ່ວຍຊຸກຍູ້ການສຶກສາໃຫ້ກັບໂຮງຮຽນແຫ່ງນີ້ ຍ້ອນໂຮງຮຽນແຫ່ງນີ້ ເປັນໂຮງຮຽນເຂດຫ່າງໄກ, ຂາດເຂີນທາງດ້ານອຸປະກອນການສຶກສາ ແລະ ອາຄານຮຽນກໍມີການຊຸດໂຊມ ແລະ ມີຄວາມຈຳເປັນຕ້ອງປັບປຸງສ້ອມແປງ ເພື່ອອຳນວຍຄວາມສະດວກສະບາຍໃຫ້ແກ່ການຮຽນ-ການສອນ ຂອງຄູ-ອາຈານ ແລະ ນັກຮຽນ ແນໃສ່ ຮັບປະກັນຄຸນນະພາບການສຶກສາໃຫ້ໄດ້ດີຂຶ້ນຫຼາຍກວ່າເກົ່າ ຕາມ 3 ລັກສະນະ ແລະ 5 ຫຼັກມູນການສຶກສາ ທີ່ກະຊວງສຶກສາ ທິການ ແລະ ກິລາໄດ້ວາງອອກ.

ພ້ອມນີ້ ທ່ານ ຊາວດົງ ກໍໄດ້ກ່າວມອບຜົນສຳເລັດການສ້ອມແປງອາຄານຮຽນ ແລະ ອຸປະກອນການສຶກສາດັ່ງກ່າວ ໃຫ້ກັບໂຮງຮຽນນຳໃຊ້ເຂົ້າໃນການຮຽນ-ການສອນ, ກ່າວຮັບໂດຍທ່ານ ສີພອນ ວັນນະລາດ ແລະ ໂອກາດນີ້ ທ່ານ ສີພອນ ວັນນະລາດ ກໍໄດ້ຕາງໜ້າໃຫ້ຄະນະການນຳ ເມືອງພູວົງ, ສະແດງຄວາມຂອບອົກຂອບໃຈ ຮູ້ບຸນຄຸນ ອັນໃຫຍ່ຫຼວງ ຕໍ່ທ່ານ ຊາວດົງ ພ້ອມດ້ວຍຄະນະບໍລິຫານ ແລະ ພະນັກງານທຸກພາກສ່ວນ ຂອງໂຄງການ ເຂື່ອນໄຟຟ້ານຳ້ກົງ 1 ທີ່ໄດ້ ໃຫ້ການຊ່ວຍເຫຼືອຊຸກຍູ້ການສຶກສາໃຫ້ກັບໂຮງຮຽນ ບ້ານວຽງໄຊໃນຄັ້ງນີ້.

(ຂ່າວ: ພົມວິຫານ ໄຊຊະນະ)