ຫົວ​ຂໍ້ : ກອງປະຊຸມຄະນະຮັບຜິດຊອບລະດັບຊາດ ຈັດງານມະຫະກຳກິລາແຫ່ງຊາດ ຄັ້ງທີ XI

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 08/01/2020 10:11:01 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1244 ຄັ້ງ

   ກອງ​ປະຊຸມ ຄັ້ງ​ທີ  IV ຂອງ​ຄະນະ​ຮັບຜິດຊອບ​ລະດັບ​ຊາດ​ຈັດ​ງານ​ມະຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI ໄດ້​ຈັດ​ຂຶ້ນ​ໃນ​ວັນ​ທີ 7 ມັງກອນ 2020 ນີ້  ທີ່ຫ້ອງ​ວ່າການ​ປົກຄອງ ແຂວງ​ຊຽງ​ຂວາງ  ໂດຍ​ການ​ເປັນ​ປະທານ​ຂອງທ່ານ ບຸນ​ຕົ້ນ ຈັນທະ​ພອນ ເຈົ້າແຂວງ​ຊຽງ​ຂວາງ ປະທານ​ຮ່ວມ​ຈັດ​ງານ​ມະຫະກຳ​ກິລາ​ແຫ່ງ​ຊາດ ຄັ້ງ​ທີ XI, ທ່ານ ນາງ ແສງ​ເດືອນ ຫຼ້າ​ຈັນທະ​ບູນ ລັດ ຖະມົນຕີກະຊວງສຶກສາ​ທິການ ແລະ ກິລາ ປະທານ​ຮ່ວມຈັດ ​ງານ​ມະຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI ມີ​ບັນດາ​ຄະນະ​ຮັບຜິດ ຊອບ ແລະ ກໍາ​ມະ​ການຝ່າຍ​ຕ່າງໆ​ເຂົ້າ​ຮ່ວມ.
   ໃນ​ໂອກາດ​ນີ້,  ທ່ານ ບົວ​ສອນ  ສີ​ນວນ​ທອງ  ຮອງ​ເຈົ້າແຂວງ​ຊຽງ​ຂວາງ  ຮອງ​ປະ ທານ​ຈັດ​ງານ​ມະຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI ຫົວໜ້າ​ກອງ​ເລຂາ ໄດ້​ຂຶ້ນ​ລາຍ​ງານ​ກ່ຽວ​ກັບ​ຄວາມ​ພ້ອມ​ໃນ​ແຕ່​ລະ​ດ້ານ​ເປັນຕົ້ນ​ດ້ານ​ພື້ນຖານ​ໂຄງ​ລ່າງ, ໜ້າ​ວຽກ​ທີ່​ສະໜັບສະໜູນ​ງານ​ກິລາ ຊຽງ​ຂວາງ​ເກມ 2020 ໂດຍ​ສະເພາະ​ໄດ້​ສ້າງ​ເສັ້ນທາງ​ເຊື່ອມ​ຈອດ​ເຂົ້າ​ສູ່​ສະໜາມ ເປີດ​-​ປິດ​ງານ ສຳເລັດ 100%, ລະບົບ​ນ້ຳ​ປະປາ ສຳເລັດ 100%,  ລະບົບ​ຕາ​ຂ່າຍ​ໄຟຟ້າ ສຳເລັດ​ເກືອບ 50%, ລະບົບ​ໄຟ​ເຍືອງ​ທາງ​ເຂົ້າ​ສະໜາມ ສຳເລັດ​ຫຼາຍ​ກວ່າ 30%, ແຕ່​ເພື່ອ​ໃຫ້​ທັນ​ກັບ​ເວລາ​ທັງ​ເປັນ​ການ​ຫຼຸດຜ່ອນ​ງົບປະມານ ໄດ້​ຕົກລົງ​ປ່ຽນ​ຈາກ​ລະບົບ​ທົ່ວ​ໄປ​ມາ​ເປັນ​ລະບົບ​ໄຟຟ້າ​ແສງຕາ​ເວັນ  ຊຶ່ງ​ຈະ​ເຮັດ​ໃຫ້ການ​ຕິດ​ຕັ້ງ​ສັ້ນ​ລົງ, ສັງ​ລວມ​ແລ້ວ​ວຽກ​ງານ​ພື້ນຖານ​ໂຄງ​ລ່າງ​ ຖ້າ​ທຽບໃສ່​ເວລາ​ທີ່​ຍັງ​ເຫຼືອ​ແມ່ນ​ຈະ​ສຳເລັດ​ຕາມ​ກຳນົດ​ເວລາ​ທີ່​ຄາດ​ໄວ້.
   ສຳລັບ​ງານ​ຊຽງ​ຂວາງ​ເກມ 2020 ໄດ້​ກໍາ​ນົດ​ການ​ແຂ່ງຂັນ 28 ປະເພດ​ກິລາ ແລະ ກິລາ​ສາທິດ 1 ປະເພດ​ຄື: ກິລາ​ຣັກ​ບີ້. ປະເພດ​ກິລາ​ທີ່​ບັນຈຸ​ເຂົ້າ​ແຂ່ງຂັນ​ຄັ້ງ​ນີ້ ມີ 13 ປະເພດ​ເປີດ​ກວ້າງ​ບໍ່​ຈຳກັດ​ນັກ​ກິລາ​ທີ​ມ​ຊາດ​ເຂົ້າ​ຮ່ວມ ແລະ ອີກ 15 ປະເພດ ໄດ້​ຈຳກັດ​ນັກ​ກິລາທີມ​ ຊາດ​ເຂົ້າ​ຮ່ວມ​  ສຳລັບ​ງານ​ມະຫະ​ກຳ​ກິລາ​ແຫ່ງ​ຊາດ ຄັ້ງ​ນີ້ ຈະ​ຊີງ​ຫຼຽນ​ຄຳ​ທັງ​ໝົດ 385 ຫຼຽນ, ຫຼຽນ​ເງິນ​ມີ 385 ຫຼຽນ ແລະ ຫຼຽນ​ທອງ 627 ຫຼຽນ  ຊຶ່ງ​ໄດ້​ກຳນົດ​ເອົານົກ​ແອ່ນ​ເປັນ​ສັດ​ນຳ​ໂຊກ, ສ່ວນ​ສັນຍາ​ລັກ (ໂລ​ໂກ) ຂອງ​ງານ​ກິລາຊຽງ​ຂວາງ​ເກມ 2020 ຄັ້ງ​ນີ້ ແມ່ນໄຫ​ຫີນ. 
   ເພື່ອ​ຮອງ​ຮັບ​ຄູ​ຝຶກ ແລະ ນັກ​ກິລາ ຈາກ 20 ພາກສ່ວນຄື: 17 ແຂວງ, 1 ນະຄອນຫຼວງ​ວຽງ​ຈັນ ແລະ 2 ກະຊວງ ຊຶ່ງ​ແຂວງ ທີ່​ສົ່ງ​ນັກ​ກິລາ​ເຂົ້າ​ຮ່ວມ​ຫຼາຍ​ກວ່າ​ໝູ່​ແມ່ນນະຄອນຫຼວງ​ວຽງ​ຈັນ, ສະຫວັນ​ນະ​ເຂດ, ຫຼວງ​ພະ​ບາງ, ຈຳປາ​ສັກ, ແຂວງວຽງ​ຈັນ ແລະ ແຂວງ​ເຈົ້າພາບ  ຖ້າ​ທຽບໃສ່​ງານ​ກິລາ​ແຫ່ງ​ຊາດ ຄັ້ງ​ທີ X ເຫັນ​ວ່າ ຈໍາ​ນວນ​ປະເພດ​ກິລາ​ເພີ່ມ​ຂຶ້ນ ແຕ່​ຈໍາ​ນວນ​ນັກ​ກິລາ​ຫຼຸດ​ລົງ ແລະ ບັນດາ​ກະຊວງ​ເຂົ້າ​ຮ່ວມ​ໜ້ອຍ.
   ທ່ານ ນາງ ແສງ​ເດືອນ ຫຼ້າ​ຈັນທະ​ບູນ  ໄດ້​ມີ​ຄຳເຫັນ​ຕໍ່​ກອງ​ປະຊຸມ​ຂອງ​ຄະນະ​ກຳມະການ​ຝ່າຍ​ຕ່າງໆວ່າ:  ຫຼາຍ​ໜ້າ​ວຽກ ມີຄວາມ​ຄືບ​ໜ້າ ແລະ ມີ​ການ​ ປັບປຸງ​ດັດສົມ​ໃຫ້​ແທດເໝາະ​ ກັບ​ສະພາບ​ຕົວ​ຈິງ ​ ດັ່ງນັ້ນ, ໃຫ້​ເພີ່ມ​ທະວີ​ຄວາມ​ເອົາໃຈໃສ່​ຕໍ່ ໜ້າ​ວຽກ​ທີ່​ຍັງ​ຄ້າງ​ໃຫ້​ສຳເລັດ​ຕາມ​ເວລາ, ເຖິງ​ວ່າຈະ​ມີ​ຫຼາຍ ບັນຫາ​ຫຍຸ້ງຍາກ​ກໍ​ຕາມ, ດັ່ງນັ້ນ​ ເພື່ອ​ເຮັດ​ໃຫ້ການ​ຈັດ​ງານ​ດັ່ງ ກ່າວ ແລະ ດີ​ຂຶ້ນ​ອີກ​ລະດັບ​ໜຶ່ງ, ຕ້ອງ​ໂຄສະນາ​ເຜີຍແຜ່​ຢ່າງ​ເປັນ​ຂະບວນ ແລະ ກວ້າງຂວາງ ໂດຍ​ນໍາ​ໃຊ້​ສື່​ຕ່າງໆທີ່​ເຮົາ​ມີທ່າ ແຮງ ແລະ ເງື່ອນໄຂ​ຕົວ​ຈິງຂອງ ​ທ້ອງຖິ່ນ ສິ່ງ​ສຳຄັນ​ແມ່ນ​ໃຫ້​ບັນລຸ​ຕາມ​ຈຸດປະສົງ ລະດັບ​ຄາດໝາຍ​ທີ່​ວາງ​ໄວ້.

   ອີກ​ບັນຫາ​ໜຶ່ງ​ທີ່​ສໍາ​ຄັນ ແລະ ຕ້ອງຮັບ​ປະ ກັນ​ຄວາມ​ສະ​ຫງົບ​ປອດ​ໄພ, ຄວາມ​ເປັນ​ລະ​ບຽບ​ຮຽບ​ຮ້ອຍ, ສິ່ງ​ອຳ​ນວຍ​ຄວາມ​ສະ​ດວກ ຕ່າງໆເຊັ່ນ: ການ​ຄົມມະນາຄົມ, ​ໄຟ​ຟ້າ​-​ນ້ຳ​ປະປາ, ການຄຸ້ມ​ ຄອງ​ລາຄາ​ສິນຄ້າ, ໂຮງ​ແຮມ​-​ເຮືອນ​ພັກ ແລະ ອື່ນໆໃຫ້​ມີ​ຄວາມ​ສະດວກ ແລະ ມີຄວາມ​ ເປັນ​ລະບຽບ​ຮຽບຮ້ອຍ ດັ່ງນັ້ນ ​ຈຶ່ງ​ຮຽກຮ້ອງ​ໃຫ້​ພໍ່​ແມ່​ປະຊາຊົນ​ບັນດາເຜົ່າ​ພາຍ​ໃນ​ແຂວງ​ຊຽງ​ຂວາງ​ ຈົ່ງ​ພ້ອມ​ກັນ​ເປັນ​ເຈົ້າ ພາບ​ທີ່​ດີ ເພື່ອ​ເຊີດ​ຊູ​ນໍ້າ​ໃຈ​ວິລະ​ຊົນ​ຄວາມ​ສາມັກຄີ​ອັນ​ເປັນ​ມູນເຊື້ອ​ຂອງ​ແຂວງ​ຊຽງ​ຂວາງ.    
(ຂ່າວ-ພາບ : ບຸນ​ອູ້ມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110