ໜັງສືພິມ ປະຊາຊົນ

ແຂ່ງຂັນແລ່ນ-ລານ ທົ່ວປະເທດ ປະຈຳປີ ຈະເປີດຂື້ນທ້າຍເດືອນນີ້

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 07/01/2021 09:44:49 ຈຳນວນຢ້ຽມຊົມ 3143 ຄັ້ງ

ສະຫະພັນແລ່ນ-ລານແຫ່ງ ຊາດລາວ ຮ່ວມມືກັບ ກະຊວງສຶກສາ ທິການ ແລະ ກິລາ ກຽມຈັດການແຂ່ງ ຂັນກິລາແລ່ນ-ລານ ທົ່ວປະເທດ ປະຈໍາປີ 2021 ຂຶ້ນໃນລະຫວ່າງວັນທີ 28-30 ມັງກອນ 2021 ທີ່ສະຖາບັນກິລາ-ກາຍະກໍາ (ບ້ານສີເກີດ ເມືອງນາຊາຍທອງ ນະຄອນ ຫຼວງວຽງຈັນ) ຊຶ່ງລາຍການດັ່ງກ່າວ ມີການຊີງໄຊກັນເຖິງ 41 ລາຍການ ເພື່ອເປັນການກະກຽມຄວາມພ້ອມ ກໍຄື ບັນດາກະຊວງ, ນະຄອນຫຼວງວຽງຈັນ ແລະ 17 ແຂວງ ໃນຂອບເຂດທົ່ວປະເທດເຂົ້າຮ່ວມແຂ່ງຂັນງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າ ພາບ ຈະຈັດຂຶ້ນໃນມໍ່ໆນີ້.
ອີງຕາມແຈ້ງການຂອງສະຫະພັນແລ່ນ-ລານແຫ່ງຊາດລາວ ຜ່ານເຟສບຸກທາງການຂອງສະຫະພັນແລ່ນ-ລານແຫ່ງຊາດລາວ ເມື່ອທ້າຍອາທິດທີ່ຜ່ານມາໃຫ້ຮູ້ວ່າ: ຈຸດປະສົງຂອງການແຂ່ງຂັນ ແມ່ນເພື່ອເປັນການສ້າງຂະບວນການສະ ເຫຼີມສະຫຼອງວັນສຳຄັນຕ່າງໆຂອງຊາດ ເວົ້າລວມ, ເວົ້າສະເພາະແມ່ນ ຊົມເຊີຍວັນຊາດທີ 2 ທັນວາ ຄົບຮອບ 45 ປີ ແລະ ວັນເກີດທ່ານປະທານ ໄກສອນ ພົມວິຫານ ຄົບຮອບ 100 ປີ ນອກນັ້ນ ກໍຍັງເປັນການກະກຽມຄວາມພ້ອມໃຫ້ແກ່ບັນດາພາກສ່ວນ, ກະຊວງ, ນະຄອນຫຼວງວຽງຈັນ ແລະ 17 ແຂວງ ໃນຂອບເຂດທົ່ວປະເທດ ເພື່ອກຽມຄວາມພ້ອມເຂົ້າຮ່ວມແຂ່ງຂັນງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບ ຈະຈັດຂຶ້ນໃນມໍ່ໆນີ້.
ການແຂ່ງຂັນຕະຫຼອດໄລຍະ 3 ວັນ ໃນລາຍການດັ່ງກ່າວ ຈະມີການຊີງໄຊກັນເຖິງ 41 ລາຍການ ປະກອບມີ ຄື: ຊຸກນໍ້າໜັກ ເຍົາວະຊົນຍິງ-ຊາຍ, ຊຸກນໍ້າໜັກ ທົ່ວໄປຍິງ-ຊາຍ, ຊັດຫຼາວ ເຍົາວະຊົນຍິງ-ຊາຍ ແລະ ຊັດຫຼາວ ທົ່ວໄປຍິງ-ຊາຍ. ສ່ວນປະເພດແລ່ນ ປະ ກອບມີ ແລ່ນ 100 ແມັດ ເຍົາວະຊົນຍິງ-ຊາຍ, ແລ່ນ 100 ແມັດ ທົ່ວໄປຍິງ-ຊາຍ, ແລ່ນ 200 ແມັດ ເຍົາວະຊົນຍິງ-ຊາຍ, ແລ່ນ 200 ແມັດ ທົ່ວໄປຍິງ-ຊາຍ, ແລ່ນ 400 ແມັດຂ້າມຮົ້ວ ເຍົາວະຊົນຍິງ-ຊາຍ, ແລ່ນ 400 ແມັດຂ້າມຮົ້ວ ທົ່ວໄປຍິງ-ຊາຍ, ແລ່ນ 400 ແມັດ ເຍົາວະຊົນຍິງ-ຊາຍ, ແລ່ນ 400 ແມັດ ທົ່ວໄປຍິງ-ຊາຍ, ເຕັ້ນຍາວ ເຍົາວະຊົນຍິງ-ຊາຍ, ເຕັ້ນຍາວ ທົ່ວໄປຍິງ-ຊາຍ, ເຕັ້ນ 3 ກ້າວ ເຍົາວະຊົນຍິງ-ຊາຍ, ແລ່ນ 800 ແມັດ ເຍົາວະຊົນຍິງ-ຊາຍ, ແລ່ນ 800 ແມັດ ທົ່ວໄປຍິງ-ຊາຍ, ຍ່າງ 3.000 ແມັດຍິງ, ຍ່າງ 5.000 ແມັດ ເຍົາວະຊົນຍິງ-ຊາຍ, ແລ່ນ 4X100 ແມັດ ປະສົມ ເຍົາວະຊົນຍິງ-ຊາຍ ແລະ ແລ່ນ 4X100 ແມັດ ປະສົມ ທົ່ວໄປຍິງ-ຊາຍ.
(ຂ່າວ: ສົງການ)