ໜັງສືພິມ ປະຊາຊົນ

ກອງປະຊຸມລັດຖະບານເປີດກວ້າງທ້າຍສະໄໝທີ VIII ປຶກສາຫາລືຫຼາຍບັນຫາສຳຄັນ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 08/01/2021 08:56:35 ຈຳນວນຢ້ຽມຊົມ 2811 ຄັ້ງ

ກອງປະຊຸມລັດຖະບານ ຊຸດທີ VIII ເປີດກວ້າງທ້າຍສະ ໄໝ ໄດ້ເປີດຂຶ້ນຢ່າງເປັນທາງການໃນວັນ ທີ 7 ມັງກອນນີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ພ້ອມດ້ວຍບັນດາທ່ານເຈົ້າແຂວງ-ເຈົ້າຄອງນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານນາຍົກລັດຖະມົນຕີ ໄດ້ກ່າວວ່າ: ກອງປະຊຸມຄັ້ງນີ້ ໄດ້ດຳເນີນແຕ່ວັນທີ 7 - 8 ມັງ ກອນ 2021 ຊຶ່ງໄດ້ພ້ອມກັນ ສະ ຫຼຸບການຈັດຕັ້ງປະຕິບັດວຽກ ງານຂອງລັດຖະບານ ຊຸດທີ VIII (2016 - 2020); ການສະ ຫຼຸບການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII (2016-2020) ແລະ ຜ່ານຮ່າງເບື້ອງຕົ້ນແຜນ ພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025); ຄວາມຄືບໜ້າການປັບປຸງກົນໄກການອຳນວຍ ຄວາມສະດວກ ແລະ ບັນດາຕົວ ຊີ້ວັດຕ່າງໆໃນການດຳເນີນ ທຸລະກິດຢູ່ ສປປ ລາວ (ຕາມຄຳສັ່ງ 02/ນຍ) ແລະ ການຈັດຕັ້ງປະຕິບັດຄຳສັ່ງ ວ່າດ້ວຍການປັບປຸງວຽກງານບໍລິການການອອກໃບອະນຸຍາດລົງທຶນ ແລະ ການອອກໃບອະນຸຍາດດຳເນີນທຸລະກິດ (ຄຳສັ່ງ 03/ນຍ); ຮ່າງແຜນຍຸດທະ ສາດການສົ່ງເສີມຜະລິດເປັນ ສິນຄ້າ ຕິດພັນກັບກົນໄກ ການເຂົ້າເຖິງຕະຫຼາດຈໍາໜ່າຍສິນ ຄ້າ ແລະ ການຄ້າຊາຍແດນ; ການຄົ້ນຄວ້າ, ການຫັນຊັບສິນ ຂອງລັດເປັນທຶນ; ຜົນການຕິດ ຕາມ, ຊຸກຍູ້ການຈັດຕັ້ງປະຕິ ບັດຄໍາສັ່ງ 15/ນຍ, ປີ 2020; ການກະກຽມໃຫ້ແກ່ການຫຼຸດ ພົ້ນອອກຈາກສະຖານະພາບປະເທດດ້ອຍພັດທະນາ; ຜົນການຈັດຕັ້ງປະຕິບັດແຜນແກ້ໄຂບັນຫາຄົນຕ່າງປະເທດ ທີ່ ເຄື່ອນໄຫວບໍ່ຖືກຕ້ອງຕາມກົດ ໝາຍຂອງ ສປປ ລາວ; ການ ຈັດຕັ້ງປະຕິບັດການແກ້ ໄຂຜົນກະທົບ ແລະ ຜັັນຂະຫຍາຍນະ ໂຍບາຍ, ມາດຕະການ ເພື່ອຫຼຸດ ຜ່ອນຜົນກະທົບຈາກການລະ ບາດຂອງພະຍາດ COVID-19 ຕໍ່ເສດຖະກິດຂອງລາວ; ການຜັນຂະຫຍາຍຜົນຂອງກອງ ປະຊຸມຄະນະກໍາມະການຮ່ວມມືທະວີພາຄີ ລະຫວ່າງ ລັດຖະ ບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດ ນາມ ຄັ້ງທີ 43 ປະ ຈຳປີ 2020.

ເພື່ອໃຫ້ກອງປະຊຸມມີປະ ສິດທິຜົນ ແລະ ບັນລຸຕາມຄາດ ໝາຍ, ທ່ານນາຍົກລັດຖະມົນຕີ ຍັງໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມຍົກສູງຄວາມຮັບຜິດຊອບ ໃນການລາຍງານໃຫ້ກະທັດຮັດ, ຊັດເຈນ ແລະ ມີຈຸດສຸມຕາມເວລາທີ່ກຳນົດ. ສ່ວນການປະກອບຄຳເຫັນແມ່ນໃຫ້ລົງເລິກກ່ຽວ ກັບບັນຫາທີ່ຍັງເປັນຂໍ້ຄົງຄ້າງ ພ້ອມທັງວິເຄາະ - ວິໄຈສາເຫດ ແລະ ສະເໜີທິດທາງມາດຕະ ການແກ້ໄຂໃນໄລຍະ 6 ເດືອນ ຕົ້ນປີ 2021 ນີ້.

(ຂ່າວ - ພາບ: ສຸກສະຫວັນ)

ຂ່າວທີ່ໄດ້ຮັບຄວາມນິຍົມ