ໜັງສືພິມ ປະຊາຊົນ

ທົ່ວນະຄອນຫຼວງວຽງຈັນ ອອກແຮງງານລວມ ຕ້ອນຮັບກອງປະຊຸມໃຫຍ່ ຄັ້ງທີ XI ຂອງພັກ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 11/01/2021 09:32:51 ຈຳນວນຢ້ຽມຊົມ 914 ຄັ້ງ

ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XI ຂອງພັກ ແລະ ວັນສຳຄັນຕ່າງໆຂອງພັກ, ຂອງຊາດ ໃນຕອນເຊົ້າຂອງວັນທີ 9 ມັງກອນ 2021 9 ຕົວເມືອງອ້ອມຂ້າງນະຄອນຫຼວງວຽງຈັນ ໄດ້ຈັດຕັ້ງຂະບວນການອອກແຮງງານລວມ ຮັກສາຄວາມສະອາດພ້ອມກັນ ຊຶ່ງແຕ່ລະເມືອງມີຫຼາຍພາກສ່ວນເຂົ້າຮ່ວມຢ່າງເປັນຂະບວນການຟົດຟື້ນ.
ທ່ານ ໄຊຍະເດດ ທາດາວົງ ກຳມະການພັກເມືອງ ຄະນະບໍລິຫານງານຊາວໜຸ່ມນະຄອນຫຼວງວຽງຈັນ ເລຂາຊາວໜຸ່ມເມືອງໄຊເສດຖາ ໃຫ້ຮູ້ວ່າ: ໃນການເຮັດອະນາໄມຄັ້ງນີ້ແມ່ນເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກ ທີ່ຈະເປີດຂຶ້ນໃນມໍ່ໆນີ້ ແລະ ທັງເປັນການຊົມ ເຊີຍຜົນສຳເລັດກອງປະຊຸມໃຫຍ່ຄັ້ງທີ 8 ຂອງຜູ້ແທນຊາວໜຸ່ມທົ່ວປະເທດ ແລະ ທັງເປັນການຈັດຕັ້ງປະຕິບັດນະໂຍບາຍ 6 ສ ຂອງນະ ຄອນຫຼວງວຽງຈັນ ໂດຍສະເພາະກໍຄື ສ ສະອາດ ໃຫ້ສະມາຊິກຊາວໜຸ່ມ, ໄວໜຸ່ມທົ່ວເມືອງໄຊເສດຖາ ໄດ້ເຂົ້າໃຈ, ການອອກແຮງຄັ້ງນີ້ແມ່ນໄດ້ປັດກວາດດ້ານຂ້າງຖະໜົນ, ບໍລິເວນສວນເຈົ້າໄຊເສດຖາ ແລະ ອ້ອມເດີ່ນສະໜາມຫຼວງ ໂດຍເລີ່ມແຕ່ຈຸດໄຟແດງໂພນເຄັງ ຮອດ 4 ແຍກໄຟແດງໂພນສະອາດ ຊຶ່ງມີນັກຮຽນຈາກ 4 ໂຮງຮຽນເຂົ້າຮ່ວມຄື: ໂຮງຮຽນ ມສ ໄຊເສດຖາ, ມສ ໜອງບອນ, ມສ ໂພນທັນ ແລະ ມ ປາຍ ໂນນສະຫວ່າງ ລວມທັງໝົດ 400 ກວ່າຄົນ, ການເຮັດອະນາໄມ ນອກຈາກເປັນການຕ້ອນຮັບວັນສຳຄັນແລ້ວຍັງເປັນການປູກຈິດສຳນຶກໃຫ້ຊາວໜຸ່ມຮູ້ຈັກການເຮັດຄວາມສະອາດແບບສ່ວນລວມ ແລະ ໃນຄອບຄົວອີກດ້ວຍ ເພື່ອໃຫ້ມີຄວາມສະອາດຈົບງາມ ແລະ ທັງເປັນການຮ່ວມກັນສະກັດກັ້ນພະຍາດໄຂ້ຍຸງລາຍ ແລະ ພະຍາດໂຄວິດ-19, ທ່ານກ່າວໃຫ້ຮູ້ຕື່ມວ່າ: ນອກຈາກເຮັດອະນາໄມ ພວກເຮົາຍັງໄດ້ປຸກລະດົມທົ່ວເມືອງໄຊເສດຖາ ຕິດທຸງຊາດ, ທຸງພັກ, ທຸງທິວ ແລະ ຕິດປ້າຍຄຳຂວັນ ເພື່ອສ້າງຂະບວນການຂາໍ່ນັບຮັບຕ້ອນກອງປະຊຸມໃຫຍ່ຂອງພັກໃຫ້ມີບັນຍາກາດ ແລະ ມີຄວາມໝາຍ.
ໃນວັນດຽວກັນ ພະນັກງານ ຈາກກະຊວງ, ອົງການຕ່າງໆ ກໍໄດ້ຈັດຂະບວນການອອກແຮງງານລວມ ຕາມສຳນັກງານອົງການ ແລະ ຕາມຖະໜົນຕ່າງໆທົ່ວນະຄອນຫຼວງເຊັ່ນກັນ.
(ຂ່າວ: ສຳນານ)