ການ​ໃຊ້​ຢາ​ເບື່ອ​ປາ​ຢູ່​ເຂດດອນ​ສະ​ໂຮງ​ບໍ່​ເປັນ​ຄວາມ​ຈິງ

ຂ່າວ​ກ່ຽວ​ກັບ​ການ​ຫາ​ປາ​ໂດຍ​ໃຊ້​ຢາ​ເບື່ອ​ປາ​ຢູ່​ເມືອງ​ໂຂງ ແຂວງ​ຈຳ​ປາ​ສັກ ນັ້ນ​ບໍ່​ແມ່ນ​ຄວາມ​ຈິງ ຊຶ່ງ​ຂ່າວ​ທີ່​ອອກ​ໄປ​ນັ້ນ ເປັນ​ຂໍ້​ມູນ​ເກົ່າ​ທີ່​ເກີດ​ຂຶ້ນ​ແຕ່​ປີ 2016 ພຸ້ນ ຊຶ່ງເຫດ​ການ​ຄັ້ງ​ນັ້ນ ມີຄົນພົບເຫັນປາຕາຍໄຫຼມາໃນເຂດໂຄງ​ການກໍ່ສ້າງເຂື່ອນໄຟຟ້າດອນສະໂຮງ ແລະ ຄັ້ງດຽວເທົ່ານັ້ນ ເຊິ່ງທາງພະແນກກະ​ສິ​ກຳ ແລະ ປ່າ​ໄມ້​ແຂວງ​ຈຳ​ປາ​ສັກ ແລະ ຫ້ອງການກະສິກຳ ແລະ ປ່າໄມ້ ເມືອງໂຂງໄດ້ຕິດຕາມເປັນປະຈຳ.

 ດັ່ງນັ້ນຜູ້ຈັດການທາງດ້ານສິ່ງແວດລ້ອມສັງຄົມ ແລະ ຄະນະກຳມະການຄຸ້ມຄອງການປະມົງຈຶ່ງຂໍຊີ້ແຈງວ່າ: ຂໍ້ມູນດັ່ງກ່າວເປັນຂໍ້ມູນເກົ່າ ກໍຄືຕົ້ນປີ 2016 ຄະນະກຳມະການຄຸ້ມຄອງການປະມົງປະຈຳໂຄງການໄດ້ຖືກແຕ່ງຕັ້ງ​ຂຶ້ນເພື່ອປະຕິບັດກິດຈະກຳຄຸ້ມຄອງການປະມົງໃນເຂດກໍ່ສ້າງຂອງ​ໂຄງ​ການ ຊຶ່ງໃນຄະນະກຳມະການປະກອບມີຕົວແທນຈາກພະແນກກະສິກຳ ແລະ ປ່າໄມ້ແຂວງ, ຂະແໜງລ້ຽງສັດ ແລະ ການປະມົງແຂວງ, ເຈົ້າເມືອງ, ຫ້ອງການກະສິກຳ ແລະ ປ່າໄມ້ເມືອງໂຂງ, ໜ່ວຍງານລ້ຽງສັດ-ການປະມົງເມືອງໂຂງ,  ແລະ ນອກຈາກນັ້ນຍັງໄດ້ແຕ່ງຕັ້ງຄະນະກຳມະການປະມົງຂັ້ນກຸ່ມ 3 ກຸ່ມບ້ານ ແລະ ຂັ້ນບ້ານ 11 ບ້ານ ທີ່ຢູ່ເຂດໃກ້ຄຽງກັບໂຄງການໂດຍໂຄງການເປັນຜູ້ສະໜອງທາງດ້ານງົບປະມານ ເພື່ອປະຕິບັດຕາມພັນທະສັນຍາໂດຍທາງໂຄງການຈະສະໜັບສະໜູນງົບປະມານຕັ້ງແຕ່ເລີ່ມຕົ້ນການກໍ່ສ້າງຈົນສິ້ນສຸດສັນຍາສຳປະທານຂອງໂຄງການ.

  ຄະນະກຳມະການໄດ້ລົງເຜີຍແຜ່ ແລະ ປູກຈິດສຳນຶກກ່ຽວກັບກົດໝາຍການປະມົງເພື່ອເຮັດ​ໃຫ້ຊຸມຊົນເຂົ້າໃຈຜົນກະທົບກ່ຽວກັບການຫາປາ​ທີ່ຜິດກົດລະບຽບການປະມົງ ມາຮອດປັດຈຸບັນທາງຄະນະກຳມະການຄຸ້ມຄອງການປະມົງໄດ້ປະຕິບັດໜ້າທີ່ຄຸ້ມຄອງການປະມົງ 386 ຄັ້ງ ແລະ ມີຈຳນວນພົນເຂົ້າຮ່ວມທັງໝົດ 8.215 ​ເທື່ອຄົນ ​ຊຶ່ງສາມາດ​ລຶບລ້າງຢຸດຊົາ ແລະ ທຳລາຍສິ່ງກີດຂວາງການຂຶ້ນ-ລົງ ຂອງສັດນ້ຳທີ່ຜິດກົດລະບຽບ ອີງຕາມກົດໝາຍການປະມົງເຊັ່ນ: ຕອນ, ຫຼີ່, ລວງຂັງ ແລະ ຈິບ ໄດ້ສຳເລັດ 100% ໃນທ້າຍປີ 2017, ນອກຈາກນີ້ຍັງໄດ້ລົງກວດກາລາດຕະເວນສະກັດກັ້ນ ແລະ ຈັບກຸມດຳເນີນຄະດີກັບກຸ່ມຄົນທີ່ບໍ່ຫວັງດີໂດຍການຫາປາແບບດັບສູນຄື: ການໃຊ້ຢາເບື່ອ, ໝໍ້ຊ໋ອດປາ ແລະ ລະເບີດເຮັດໃຫ້ກິດຈະກຳດັ່ງກ່າວຫຼຸດໜ້ອຍຖອຍລົງ  ແລະ ເຮັດໃຫ້ຊຸມຊົນຊຶມຊັບເຂົ້າໃຈກ່ຽວກັບກົດໝາຍການປະມົງໄດ້ດີ ດັ່ງທີ່ສະທ້ອນໃຫ້ເຫັນຄວາມສຳເລັດຂອງວຽກງານຄຸ້ມຄອງການປະມົງຄື: ມາຮອດຕົ້ນປີ 2020 ພົບວ່າປະຊາຊົນທຸກຂົງເຂດທົ່ວປະເທດຕາມລຸ່ມແມ່ນ້ຳຂອງ ແລະ ສາຂາ ສາມາດຫາປາໄດ້ຈຳນວນຫຼາຍກວ່າທຸກໆປີ ດັ່ງນັ້ນທາງບໍລິສັດ ແລະ ຄະນະກຳມະການຄຸ້ມຄອງການປະມົງ ຂໍໃຫ້ໝັ້ນໃຈວ່າການບໍລິໂພກສັດນ້ຳຈາກເມືອງໂຂງປອດໄພ ແລະ ແຫຼ່ງທີ່ມາຂອງສັດນ້ຳຖືກກົດລະບຽບການປະມົງ.

ນອກຈາກການປະຕິບັດກິດຈະກຳຄຸ້ມຄອງການປະມົງແລ້ວ ທາງບໍລິສັດຍັງໄດ້ສ້າງທາງຜ່ານຂອງ​ປາ ເພື່ອອຳນວຍຄວາມສະດວກໃຫ້ແກ່ສັດນ້ຳເຂົ້າເຖິງແຫຼ່ງຫາອາຫານ, ທີ່ຢູ່ອາ​ໄສ ແລະ ອອກແມ່ແຜ່ລູກ ຕັ້ງແຕ່ປີ 2014 ຈົນຮອດປັດຈຸບັນທາງໂຄງການໄດ້ສຳເລັດການປັບປຸ່ງທາງຜ່ານຂອງ​ປາ​ໄດ້ 9 ຈຸດຄື: ຮູໂສມໃຫຍ່, ໂສມປໍດານ, ຮູສະດຳ, ຮູຊ້າງເຜືອກນ້ອຍ, ຮູຍ່ອຍກຸມ, ຮູຂຸ້ມເຕົ່າຮ່າງ, ຮູລ່ວງຜີແຕ່ງ, ຮູຫວາຍ ແລະ ຮູດອນໄລ່ ຊຶ່ງສັດນ້ຳສາມາດໃຊ້ເປັນເສັ້ນທາງໃນການຂຶ້ນລົງ ​ແລະ ວາງ​ໄຂ່​ໄດ້.

ຂ່າວ​: ສຸກ​ສະ​ຫວັນ