5 ແຂວງພາກໃຕ້ແລກປ່ຽນບົດຮຽນວຽກງານ ການນໍາພາຂອງສະຫະພັນແມ່ຍິງ

 ສະຫະພັນແມ່ຍິງ 5 ແຂວງພາກໃຕ້ຄື: ສະຫວັນນະເຂດ, ສາລະວັນ, ຈໍາປະສັກ, ເຊກອງ ແລະ ແຂວງອັດຕະປື ໄດ້ຈັດກອງປະຊຸມແລກປ່ຽນບົດຮຽນກ່ຽວກັບການນຳພາຂອງແມ່ຍິງລາວ ຂຶ້ນເມື່ອບໍ່​ດົນ​ມານີ້ ທີ່ຫ້ອງວ່າການປົກຄອງແຂວງອັດຕະປື ໂດຍການເຂົ້າຮ່ວມຂອງທ່ານ ບຸນໂຮມ ພົມມະສານ ຄະນະປະຈຳພັກແຂວງ ປະທານແນວລາວສ້າງຊາດ ແຂວງອັດຕະປື, ມີປະທານສະຫະພັນແມ່ຍິງ 5 ແຂວງພາກໃຕ້ ພ້ອມດ້ວຍສະມາຊິກສະຫະພັນແມ່ຍິງເຂົ້າຮ່ວມ .

ກອງປະຊຸມຄັ້ງ​ນີ້, ສະຫະພັນແມ່ຍິງທັງ 5 ແຂວງໄດ້ລາຍງານສະພາບການຈັດຕັ້ງປະຕິບັດວຽກງານການນໍາພາຂອງສະຫະພັນແມ່ຍິງໃນແຕ່ລະແຂວງໃຫ້ກັນຊາບ ຊຶ່ງໄດ້ຍົກໃຫ້ເຫັນບົດບາດການຊີ້ນຳໆພາທີ່ເປັນແບບຢ່າງ ໃຫ້ແກ່ເອື້ອຍນ້ອງແມ່ຍິງພາຍໃນແຂວງຂອງຕົນ, ເອົາໃຈໃສ່ຊຸກຍູ້ສົ່ງເສີມໃຫ້ແມ່ຍິງທີ່ດ້ອຍໂອກາດໄດ້ມີວຽກເຮັດງານທຳ ສ້າງເສດຖະກິດ ສາມາດສ້າງລາຍຮັບໃຫ້ແກ່ຄອບຄົວ. ນອກນີ້,ສະຫະພັນແມ່ຍິງແຕ່ລະແຂວງຍັງໄດ້ມີຜົນສຳເລັດວຽກງານທີ່ແຕກຕ່າງກັນໄປເປັນຕົ້ນ ວຽກງານສົ່ງເສີມຄວາມສະເໝີພາບຍິງ-ຊາຍ, ວຽກງານການຮ່ວມມືກັບຕ່າງປະເທດ, ການສ້າງພະນັກງານຄຸ້ມຄອງເພດຍິງ,ການຝຶກອົບຮົມວິຊາຊີບໃຫ້ແກ່ແມ່ຍິງ ເພື່ອຊີວິ​ດການເປັນຢູ່ຂອງເອື້ອຍນ້ອງແມ່​ຍິງດີຂຶ້ນເລື້ອຍໆ .

ການແລກປ່ຽນບົດຮຽນຄັ້ງນີ້, ເພື່ອສ້າງ​ສຳພັນທະພາບຂອງແມ່ຍິງ 5 ແຂວງພາກໃຕ້ໃຫ້ມີຄວາມເຂັ້ມແຂງ, ຍົກສູງບົດບາດການນຳພາຂອງແມ່ຍິງ ໃນການຮັກສາວັດທະນະທຳ, ​ຮີດຄອງປະເພນີ ໃຫ້ຄຽງຄູ່ກັບຄົນລາວຕະຫຼອດໄປ.

ຂ່າວ-ພາບ: ທິດປະສົງ ໄຊຍະສອນ ຂ.ອັດຕະປື