ໜັງສືພິມ ປະຊາຊົນ

ໄຊຍະບູລີ ຈັດກອງປະຊຸມວຽກງານຄຸ້ມຄອງ ແລະ ປົກປັກຮັກສາລະບົບສາຍສົ່ງໄຟຟ້າແຮງສູງ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 12/01/2021 09:27:53 ຈຳນວນຢ້ຽມຊົມ 930 ຄັ້ງ

ກອງປະຊຸມວຽກງານຄຸ້ມຄອງ ແລະ ປົກປັກຮັກສາລະບົບສາຍສົ່ງໄຟຟ້າແຮງສູງ 500 ກິ ໂລໂວນ ໄດ້ຈັດຂຶ້ນເມື່ອບໍ່ດົນມານີ້ ຢູ່ຫ້ອງວ່າການເມືອງເງິນ ແຂວງໄຊຍະບູລີ ພາຍໃຕ້ການເປັນປະທານຂອງທ່ານ ທະວີສັກ ໄຊຍະວົງ ຮອງເຈົ້າ ເມືອງໆເງິນ ທັງເປັນຫົວໜ້າຄະນະກໍາມະການຄຸ້ມຄອງ ແລະ ປົກປັກຮັກສາລະບົບສາຍ ສົ່ງໄຟຟ້າແຮງສູງ 500 ກິໂລໂວນ, ມີທ່ານ ຄົມເພັດ ແກ້ວພິລາ ຮອງຫົວໜ້າໜ່ວຍງານປະຊາສໍາພັນສື່ສານອົງກອນ ບໍ ລິສັດ ໄຟຟ້າຫົງສາ ຈໍາກັດ ພ້ອມດ້ວຍທີມງານ, ມີຄະນະກໍາມະການຄຸ້ມຄອງລະບົບສາຍສົ່ງໄຟຟ້າແຮງສູງ 500 ກິໂລໂວນ ຂັ້ນເມືອງ, ຕະຫຼອດຮອດທ່ານນາຍບ້ານຈໍານວນ 6 ບ້ານທີ່ມີລະບົບສາຍສົ່ງໄຟຟ້າແຮງສູງຜ່ານເຂົ້າຮ່ວມ.

ທ່ານ ຄົມເພັດ ແກ້ວພິລາ ໄດ້ຂຶ້ນຜ່ານແຜນວຽກງານທີ່ຈະຕ້ອງໄດ້ສືບຕໍ່ປະຕິບັດວຽກງານຄຸ້ມຄອງ ແລະ ປົກປັກຮັກ ສາລະບົບສາຍສົ່ງໄຟຟ້າແຮງ ສູງ 500 ກິໂລໂວນ ແຕ່ເສົາທີ 1 ຮອດເສົາທີ 15 ໃນຈໍານວນ 6 ບ້ານທີ່ໄດ້ມີສ່ວນຮ່ວມ ໃນການປົກປັກຮັກສາ ແລະ ອະ ນາໄມປີລະ 2 ຄັ້ງໃນຂອບເຂດ ຮັບຜິດຊອບ, ຄ່າຊົດເຊີຍໃນການອະນາໄມ ທາງບໍລິສັດ ໄຟ ຟ້າ ຫົງສາ ຈະຈ່າຍ 1 ກິໂລ ແມັດຕໍ່ 3.000.000 ກີບ.

ຈາກນັ້ນ, ກອງປະຊຸມກໍໄດ້ຄົ້ນຄວ້າປຶກສາຫາລືກ່ຽວກັບເນື້ອໃນຮ່າງບົດບັນທຶກສັນຍາລະຫວ່າງ ບໍລິສັດ ໄຟຟ້າຫົງສາ ຈໍາກັດ ກັບບັນດາບ້ານທີ່ມີແລວສາຍສົ່ງໄຟຟ້າແຮງສູງຜ່ານ ແລະ ວາງແຜນສ້າງແລວປ້ອງກັນ ໄຟປະຈໍາປີ 2021 ເພື່ອປ້ອງ ກັນສາຍສົ່ງແຮງສູງ 500 ກິໂລໂວນ. ຮຽກຮ້ອງໃຫ້ບ້ານທີ່ຮັບຜິດຊອບຕ້ອງໄດ້ເອົາໃຈໃສ່ອະນາໄມພື້ນ ທີ່ດັ່ງກ່າວໃຫ້ມີຄວາມສະອາດ ເພື່ອບໍ່ໃຫ້ມີສາຍຂະນວນເຊື້ອເພີງເກີດຂຶ້ນໃນໄລຍະລະດູແລ້ງ. (ຂ່າວ: ສຸລິຍາ ແສງເດືອນ)