ໜັງສືພິມ ປະຊາຊົນ

ບໍລິສັດສາຍສະໄໝ ຕັ້ງເປົ້າສົ່ງອອກມັນຕົ້ນໄປ ສປ ຈີນ ຫຼາຍ ກວ່າ 1 ແສນໂຕນ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 13/01/2021 09:18:09 ຈຳນວນຢ້ຽມຊົມ 2234 ຄັ້ງ

ໃນປີ 2021 ບໍລິສັດສາຍສະໄໝການຄ້າ ຕັ້ງເປົ້າສົ່ງອອກມັນຕົ້ນໄປ ສປ ຈີນ ໃຫ້ໄດ້ຫຼາຍ ກວ່າ 1 ແສນໂຕນ ໂດຍໄດ້ເກັບຊື້ມັນຕົ້ນນຳປະຊາຊົນຢູ່ບັນດາເມືອງຕ່າງໆໃນແຂວງສະຫວັນນະເຂດ, ແຂວງສາລະວັນ ແລະ ແຂວງບໍລິຄຳໄຊຈຳນວນໜຶ່ງ.

ທ່ານ ສີວິໄຊ ເກດແກ້ວສີວິໄລ ຜູ້ອຳນວຍການບໍລິສັດສາຍສະໄໝ ການຄ້າ ກ່າວວ່າ: ບໍລິສັດໄດ້ຮັບຊື້ມັນຕົ້ນແຫ້ງ ແລະ ມັນຕົ້ນດິບ ຈາກປະຊາຊົນຢູ່ຕາມບັນດາເມືອງຕ່າງໆຂອງແຂວງສະຫວັນນະເຂດ, ນອກນັ້ນ ບໍລິສັດດັ່ງກ່າວຍັງໄດ້ເກັບຊື້ມັນຕົ້ນ ຈາກແຂວງສາລະວັນ ແລະ ສ່ວນໜຶ່ງຂອງແຂວງບໍລິຄຳໄຊຕື່ມອີກ.

ທ່ານ ສີວິໄຊ ກ່າວອີກວ່າ: ປີ 2020 ທີ່ຜ່ານມາ, ທາງບໍລິສັດໄດ້ສົ່ງມັນຕົ້ນແຫ້ງອອກໄປ ສປ ຈີນ ເກືອບ 1 ແສນໂຕນ ແລະ ຄາດວ່າໃນປີ 2021 ນີ້ຈະສົ່ງອອກມັນຕົ້ນແຫ້ງ ໃຫ້ໄດ້ຫຼາຍກວ່າ 1 ແສນໂຕນ, ປັດຈຸບັນທົ່ວແຂວງສະຫວັນນະເຂດມີລານຕາກ ແລະ ລານເກັບຊື້ມັນຕົ້ນຢູ່ບັນດາເມືອງຕ່າງໆຂອງແຂວງຄື: ເມືອງນອງ, ໄຊບູລີ, ຈຳພອນ, ໄຊພູທອງ, ສອງຄອນ ແລະ ເມືອງຊົນນະບູລີ ຊຶ່ງໃນ ແຕ່ລະວັນຈະມີປະຊາຊົນນຳ ເອົາມັນຕົ້ນແຫ້ງມາຂາຍຢູ່ຕາມ ຈຸດເກັບຊື້ທີ່ຢູ່ໃກ້ເຂົາເຈົ້າ. ສ່ວນລາຄາໃນການເກັບຊື້ແມ່ນແຕກຕ່າງກັນຕາມແຕ່ລະໄລຍະ (ມັນ ຕົ້ນແຫ້ງລາຄາປະມານ 1.600-2.000 ກີບ/ກິໂລ).

ປະຊາຊົນທ່ານໜຶ່ງ ຊຶ່ງເປັນຊາວກະສິກອນຂອງ ເມືອງໄຊບູລີໄດ້ລາຍງານໃຫ້ຮູ້ວ່າ: ຕົນເອງໄດ້ປຽບທຽບຕົ້ນທຶນການປູກເຂົ້ານາແຊງ ແລະ ຕົ້ນທຶນຂອງການປູກມັນຕົ້ນ ໂດຍເຫັນໄດ້ວ່າການປູກມັນຕົ້ນແມ່ນມີລາຍໄດ້ດີກວ່າ ແລະ ປູກງ່າຍກວ່າ ເພາະວ່າທາງບໍລິສັດຜູ້ຮັບຊື້ມັນຕົ້ນແມ່ນໄດ້ລົງມາຕິດຕາມ ແລະ ໃຫ້ຄຳແນະນຳທາງດ້ານການບົວລະບັດຮັກສາ ແລະ ໃຫ້ການຊີ້ນຳ ທາງດ້ານເຕັກນິກວິຊາການເລື້ອຍໆ, ທີ່ສຳຄັນການປູກມັນຕົ້ນຂາຍ ເປັນສິນຄ້າແມ່ນຂາຍງ່າຍ ແລະ ຂາຍໄດ້ຕະຫຼອດປີ.