ຫົວ​ຂໍ້ : ທ່ານ ທອງຜ່ານ ສະຫວັນເພັດ ຕ້ອນຮັບຜູ້ແທນກະຊວງການຕ່າງປະເທດຈີນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 09/01/2020 09:47:58 ຈຳ​ນວນ​ຜູ້​ເຂົ້າ​ຢ້ຽມ​ຊົມ 609 ຄັ້ງ

    ໃນວັນ​ທີ 7 ມັງກອນຜ່ານ​ມາ, ທ່ານ ທອງ​ຜ່ານ ສະຫວັນ​ເພັດ  ຮອງ​ລັດຖະມົນຕີ​ກະຊວງ​ການ​ຕ່າງປະເທດໄດ້​ຕ້ອນຮັບ​ການເຂົ້າຢ້ຽມ​ຂ່ຳນັບ​ຂອງທ່ານ ນາງ ເໝົາ ໜິງ ຮອງ​ຫົວໜ້າ​ກົມ​ອາຊີ   ກະຊວງ​ການ​ຕ່າງປະເທດ ແຫ່ງ ສປ ຈີນ ພ້ອມ​ດ້ວຍ​ຄະນະ ທີ່ ກະຊວງ​ການ​ຕ່າງ​ເທດ. ຈຸດ ປະສົງ​ຂອງ​ການເຂົ້າ​ຢ້ຽມ​ຂ່ຳ ນັບ​ໃນ​ຄັ້ງ​ນີ້ ເພື່ອ​ລາຍ​ງານ​ຜົນ​ການ​ປະຕິບັດ​ວຽກ​ງານ​ໃນ​ນາມ​ປະທານ​ຮ່ວມ​ຂອບ​ການ​ຮ່ວມ​ມື​ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ ກັບ ສປປ ລາວ ໃນ​ໄລຍະ​ຜ່ານ​ມາ (2018-2020). ພ້ອມ​ດຽວ​ກັນ​ນັ້ນ,  ຝ່າຍ​ຈີນກໍ​ໄດ້​ລາຍ​ງານ​ຄວາມ​ຄືບ​ໜ້າ​ຂອງ​ການ​ກະກຽມ​ດ້ານ​ພະລາທິການ ແລະ ດ້ານ​ເນື້ອ​ໃນ​ຂອງ​ການ​ເປັນ​ເຈົ້າພາບ​ຈັດ​ກອງ​ປະຊຸມ​ລັດຖະມົນຕີ​ຕ່າງປະເທດ ແມ່ ນ້ຳ​ຂອງ​-​ແມ່ນ້ຳ​ລ້ານ​ຊ້າງ ຄັ້ງ​ທີ 5  ຊຶ່ງ​ຈະ​ຈັດ​ຂຶ້ນ​ໃນ​ໄລຍະ​ວັນ​ທີ 19-20 ກຸມພາ 2020 ທີ່ ສົງ​ຊິງ  ສປ ຈີນ.
ໃນ​ນັ້ນ, ຝ່າຍ​ລາວກໍ​ໄດ້​ແຈ້ງ​ກ່ຽວ​ກັບ​ຄວາມ​ຄືບ​ໜ້າ​ຂອງ​ການ​ກະກຽມ​ເປັນ​ເຈົ້າພາບ​ຈັດ​ກອງ​ປະຊຸມ​ຜູ້ນຳ ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ ຄັ້ງ​ທີ 3 ໃນ​ເດືອນມີນາ 2020 ໂດຍ​ສະ ເພາະແຜນການເຄື່ອນໄຫວ​ຂອງ​ກອງ​ປະຊຸມ  ໃນ​ເບື້ອງ​ຕົ້ນ ໃຫ້​ຝ່າຍ​ຈີນ​ຊາບ  ເພື່ອ​ເປັນ​ປະ ທານ​ຮ່ວມ​ກອງ​ປະຊຸມ​ຜູ້ນຳໃນ​ ຄັ້ງ​ນີ້ໃຫ້​ສຳເລັດ​ຜົນ​ຕາມ​ຄາດ ໝາຍທີ່​ວາງ​ໄວ້. 
    ທັງ​ສອງ​ຝ່າຍ​ກໍ​ໄດ້​ສະແດງ​ຄວາມ​ຊົມເຊີຍ ຕໍ່​ກັບ​ການ​ປະ ກອບສ່ວນ ​ໃນ​ໄລຍະ​ການ​ເປັນ​ປະທານ​ຮ່ວມຂອບ​ການ​ຮ່ວມ​ມື​ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ ຢ່າງ​ຫ້າວຫັນ  ຊຶ່ງ​ໄດ້ເຮັດໃຫ້​ຫຼາຍໆ​ກິດຈະກຳ​ຂອງຂອບ ການ​ຮ່ວມ​ມື​ແມ່ນ້ຳ​ຂອງ​-​ແມ່ ນ້ຳ​ລ້ານ​ຊ້າງ  ໃນ​ໄລຍະ​ຜ່ານ​ມາປະສົບ​ຜົນສຳເລັດ​ຕາມ​ຄາດໝາຍ​ຢ່າງ​ຈົບ​ງາມ. 
    ໃນ​ຖານະ​ປະທານ​ຮ່ວມ (ສປປ ລາວ​-ສປ ຈີນ) ຂອບ​ການ​ຮ່ວມ​ມື​ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ ທັງ​ສອງ​ຝ່າຍກໍ​ສະແດງ​ຄວາມ​ເຊື່ອ​ໝັ້ນຊຶ່ງ​ກັນ ແລະ ກັນ ໃນ​ການ​ຕັ້ງໜ້າ​ປະກອບສ່ວນ​ເຂົ້າ​ໃນ​ການ​ວາງ​ທິດ​ທາງເສີມ​ຂະຫຍາຍ ແລະ ຮັດ​ແໜ້ນການ​ຮ່ວມ​ມືໃຫ້​ມີ​ປະສິດ​ທິ​ພາບ ໃນ​ພາກ​ພື້ນ​ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ. (​ຂ່າວ: ກົມ​ຂ່າວ​ກະຊວງ​ຕ່າງປະເທດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110