ຫົວ​ຂໍ້ : ຫວຽດ¬ນາມ ພ້ອມຈັດຕັ້ງການເຄື່ອນໄຫວວຽກງານອາຊຽນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 09/01/2020 09:55:30 ຈຳ​ນວນ​ຜູ້​ເຂົ້າ​ຢ້ຽມ​ຊົມ 351 ຄັ້ງ

ຮຽບຮຽງ​ໂດຍ:  ສີ​ວັນ

    ນັບ​ແຕ່​ວັນ​ທີ 1 ມັງກອນ​ ເປັນຕົ້ນ​ໄປ, ຫວຽດນາມ ໄດ້​ດໍາ​ລົງ​ຕໍາແໜ່່ງ​ເປັນ​ປະທານ ອາ​ຊຽນ ຢ່າງ​ເປັນ​ທາງ​ການ. ດັ່ງນັ້ນ, ນັບ​ແຕ່​ນີ້​ຈົນ​ຮອດ​ວັນ​ທີ 31 ທັນວາ 2020, ໃນ​ຖານະ​ບົດບາດ​ເປັນ​ປະທານ​ອາ​ຊຽນ, ຫວຽດນາມ​ຈະ​ປະສານ​ງານ ແລະ ຈັດ​ຕັ້ງ​ເຫດການ​ເຄື່ອນ​ໄຫວ​ຕ່າງໆ​ໃນ​ຂົງເຂດ​ການເມືອງ, ການ​ຕ່າງປະເທດ, ເສດຖະກິດ, ປ້ອງ​ກັນ​ຊາດ ຕະຫຼອດ​ຮອດ ວັດ​ທະ​ນະ​ທໍາ - ສັງຄົມ ຫຼາຍ​ກວ່າ 300 ກິດ​ຈະ​ກໍາ. ເຖິງ​ວ່າ ວຽກ​ງານ​ໜ້າທີ່​ຫຼວງຫຼາຍ ແຕ່​ຫວຽດນາມ ໄດ້​ກຽມພ້ອມ​ໃຫ້​ແກ່​ປີ​ເປັນ​ປະທານ ອາ​ຊຽນ ທີ່​ເຕັມ​ໄປ​ດ້ວຍ​ຄວາມ​ເຊື່ອ​ໝັ້ນ ແລະ ຄວາມ​ຮັບຜິດຊອບ​ສູງ.
  ສຳລັບ ຫວຽດນາມ, ອາຍຸ​ການ​ປະທານ​ອາ​ຊຽນ ບໍ່​ພຽງ​ແຕ່​ກ່ຽວ​ກັບ​ດ້ານ​ວິຊາ​ການ​ເທົ່າ​ນັ້ນ ແຕ່​ຫາກ​ຍັງ​ແມ່ນ​ກຳລັງ​ຄວາມ​ສາມາດ​ໃນ​ການຈັດຕັ້ງ​ອີກ​ດ້ວຍ. ດ້ວຍ​ບັນດາ​ບົດຮຽນ​ປະສົບ​ການ​ທີ່​ມີ​ຢູ່​ແລ້ວ ແລະ ຈິດໃຈ​ພະຍາຍາມ, ຫວຽດນາມ ພ້ອມ​ແລ້ວ​ທີ່​ຈະ​ສະແດງ​ກຳລັງ​ແຮງ ແລະ ເສີມ​ຂະຫຍາຍ​ບົດບາດ​ເປັນ​ເຈົ້າ​ພາ​ທາງ​ຂອງ​ຕົນ, ມີ​ຄວາມ​ຕັດສິນ​ໃຈ ແລະ ບຸລິມະສິດ​ສູງ​ທີ່​ສຸດ ເພື່ອ​ແນໃສ່​ປະຕິບັດ​ສຳເລັດ​ໜ້າທີ່​ສຳຄັນ​ນີ້.
ການເຄື່ອນໄຫວ​ວຽກ​ງານ​ອາ​ຊຽນ​ວ່າ​ດ້ວຍ​ຫົວຂໍ້ “ສະໜິດ​ຕິດ​ພັນ ແລະ ເປັນ​ເຈົ້າ​ການ​ຮັບ​ມື”, ລວ​ມ​ທັງ​ບຸລິມະສິດ 5 ເຫດການ​ໃຫຍ່​ໃນ​ອາຍຸ​ການ​ຂອງ​ຕົນ, ຫວຽດນາມ ໄດ້​ກະກຽມ​ຢ່າງ​ຮອບ​ຄອບ​ຖີ່​ຖ້ວນ ໃຫ້​ແກ່ ອາຍຸ​ການ​ເປັນ​ປະທານ ທີ່​ຂະຫຍັນ​ຂັນ​ເຄື່ອນ ດ້ວຍ​ການຈັດຕັ້ງ​ການເຄື່ອນໄຫວ​ຫຼາຍ​ຢ່າງ​ໃນ​ທຸກ​ຂົງເຂດ.
ໃນ 5 ບຸລິມະສິດ ແລະ ການເຄື່ອນໄຫວ 300 ກິດ​ຈະ​ກໍາ​ນີ້, ອາດ​ເວົ້າ​ໄດ້​ວ່າ, ຈໍາ​ນວນ​ວຽກ​ງານ ຊຶ່ງ​ຫວຽດນາມ ຈະ​ແບກ​ຫາບ​ໃນ​ຖານະ​ເປັນ​ປະທານ ອາ​ຊຽນ​ໃນ​ປີ​ນີ້ ແມ່ນ​ໜັກໜ່ວງ​ທີ່​ສຸດ, ນັບ​ທັງ​ດ້ານ​ເນື້ອ​ໃນ ແລະ ວຽກ​ງານ​ຈັດ​ຕັ້ງ, ພິທີການ ແລະ ການ​ໂຄສະນາ​ເຜີຍ​ແຜ່. ພາຍ​ໃຕ້​ຫົວຂໍ້​ລຸ​ລ່ວງ “ສະໜິດ​ຕິດ​ພັນ ແລະ ເປັນ​ເຈົ້າ​ການ​ຮັບ​ມື”, ຫວຽດນາມ ຈະ​ຊຸກຍູ້ 5 ບຸລິມະສິດ ຊຶ່ງ​ແມ່ນ 5 ປັດ​ໄຈ​ທີ່​ຈໍາ​ເປັນ​ເພື່ອ​ກໍ່ສ້າງ​ປະຊາ​ຄົມ​ສະໜິດ​ຕິດ​ພັນ ແລະ ເປັນ​ເຈົ້າ​ການ​ຮັບ​ມື. ນັ້ນ​ແມ່ນ​ຄວາມ​ສາມັກຄີ ແລະ ຄວາມ​ເປັນ​ເອກະ​ພາບ; ຊຸກຍູ້​ການ​ຮ່ວມ​ສໍາ​ພັນ ແລະ ເຊື່ອມ​ຕໍ່​ກັບ​ພາກ​ພື້ນ, ຍົກ​ສູງ​ກໍາ​ລັງ​ຄວາມ​ສາມາດ​ໃນ​ການ​ຮັບ​ມື ແລະ ຍາດ​ແຍ່ງ​ກາລະ​ໂອກາດ​ຂອງ​ການ​ປະຕິວັດ​ອຸດ​ສາ​ຫະ​ກໍາ 4.0; ຊຸກຍູ້​ສະຕິ​ໃນ​ການ​ປະກອບສ່ວນ​ໃຫ້​ແກ່​ປະຊາ​ຄົມ, ສ້າງສັນ​ບັນດາ​ຄຸນຄ່າ​ລວມ​ຂອງ​ອາ​ຊຽນ ແລະ ເຜີຍແຜ່​ເຖິງ​ປະຊາຊົນ​ຢ່າງ​ກວ້າງຂວາງ; ຍູ້​ແຮງ​ການ​ພົວພັນ ລະຫວ່າງ ອາ​ຊຽນ ກັບ​ບັນດາ​ຄູ່​ຮ່ວມ​ມື; ຍົກ​ສູງ​ກໍາ​ລັງ​ຄວາມ​ສາມາດ​ໃນ​ການ​ຮັບ​ມື ແລະ ປະສິດ​ທິ​ຜົນ​ການເຄື່ອນໄຫວ​ຂອງ​ກົງຈັກ​ການຈັດຕັ້ງ​ອາ​ຊຽນ.
     ບົນ​ພື້ນ​ຖານ​ກໍາ​ນົດ​ໄດ້​ຄວາມ​ຮຽກຮ້ອງ​ຕ້ອງການ ແລະ ໜ້າທີ່​ດັ່ງກ່າວ, ຫວຽດນາມ ໄດ້​ເລີ່ມ​ຜັນ​ຂະຫຍາຍ​ວຽກ​ງານ​ກະກຽມ​ໃຫ້​ແກ່​ອາຍຸ​ການ​ເປັນ​ປະທານ ອາ​ຊຽນ 2020 ຢ່າງ​ຮອບ​ດ້ານ. ທ່ານ ຫ​ງວຽນ​ກວັກ​ຢຸງ ຮອງ​ລັດຖະມົນຕີ​ການ​ຕ່າງປະເທດ ຫວຽດນາມ, ເລຂາທິການ​ໃຫຍ່ ຄະ​ນະ​ກໍາ​ມະ​ການ​ແຫ່ງ​ຊາດ ອາ​ຊຽນ ຂອງ​ຫວຽດນາມ 2020, ຢັ້ງຢືນ​ວ່າ: ຈໍາ​ນວນ​ວຽກ​ງານ​ແມ່ນ​ຫຼາຍ​ທີ່​ສຸດ, ສະນັ້ນ ວຽກ​ງານ​ການ​ກະກຽມ​ກໍ​ມີ​ຂອບ​ຂະໜາດ​ໃຫຍ່ ແລະ ຕ້ອງ​ປະຕິບັດ​ກ່ອນ. ກ່ຽວ​ກັບ​ກົງຈັກ​ການຈັດຕັ້ງ, ແຕ່​ທ້າຍ​ປີ 2018, ຄະ​ນະ​ກໍາ​ມະ​ການ​ແຫ່ງ​ຊາດ ອາ​ຊຽນ ໄດ້​ຮັບ​ການ​ສ້າງຕັ້ງ ແລະ ພວກ​ເຮົາ​ໄດ້​ກໍາ​ນົດ​ເອົາ​ຫົວຂໍ້, ຈຸດ​ສຸມ​ບຸລິມະສິດ ກໍ​ຄື​ບັນດາ​ຂໍ້​ລິ​ເລີ່ມ​ໃຫ້​ແກ່​ປີ​ປະທານ​ອາ​ຊຽນ. ສໍາ​ລັບ​ບັນດາ​ວຽກ​ງານ​ອື່ນໆ​ຄື: ວຽກ​ງານ​ໂຄສະນາ​ເຜີຍແຜ່​ວັດ​ທະ​ນະ​ທໍາ ພວກ​ເຮົາ​ກໍ​ໄດ້​ສ້າງ​ແຜນ​ຮ່າງ​ໄວ້, ວຽກ​ງານ​ພິທີການ, ປ້ອງ​ກັນ​ຄວາມ​ສະຫງົບ​ປອດ​ໄພ, ສາທາລະນະ​ສຸກ, ພະລາທິການ ລ້ວນ​ແຕ່​ໄດ້​ຂຶ້ນ​ແຜນ​ເປັນ​ລະອຽດ ເພື່ອ​ຮັບປະກັນ​ວ່າ ພວກ​ເຮົາ​ຈະ​ຈັດ​ຕັ້ງ​ປີ​ເປັນ​ປະທານ ອາ​ຊຽນ 2020 ໄດ້​ເປັນ​ຢ່າງ​ດີ ດ້ວຍ​ຄວາມ​ຮອບ​ຄອບ​ຖີ່​ຖ້ວນ​ສູງ​ສຸດ.
ໃນ​ຖານະ​ເປັນ​ປະທານ ອາ​ຊຽນ 2020, ຫວຽດນາມ ໄດ້​ເປັນ​ເຈົ້າພາບ​ໃນ​ການ​ປະສານ​ງານ, ຈັດ​ຕັ້ງ​ກອງ​ປະຊຸມ ແລະ ການເຄື່ອນໄຫວ​ທີ່​ແຕກ​ຕ່າງ​ກັນ ປະມານ 300 ເຫດ​ການ. ໃນ​ນັ້ນ​ສໍາ​ຄັນ​ທີ່​ສຸດ​ແມ່ນ 2 ກອງ​ປະຊຸມ​ສຸດ​ຍອດ​ທີ່​ຈະ​ດໍາ​ເນີນ​ໃນ​ເດືອນ​ເມສາ ແລະ ເດືອນ​ພະ​ຈິກ. ນອກຈາກ​ນັ້ນ, ຍັງ​ມີ​ກອງ​ປະຊຸມ​ສະມັດຊາ​ໃຫຍ່ ລັດ​ຖະ​ສະພາ ອາ​ຊຽນ ຄັ້ງ​ທີ 41 ຊຶ່ງ​ຈະ​ດໍາ​ເນີນ​ໃນ​ເດືອນ​ສິງຫາ ຢູ່ ແຂວງ​ກວ໋າງ​ນິງ ແລະ ກອງ​ປະຊຸມ​ຂັ້ນ​ລັດຖະມົນຕີ​ຫຼາຍ​ກວ່າ 20 ກອງ​ປະ​ຊຸມ. ຜ່ານ​ມາ, ຫວຽດນາມ​ກໍ​ຈັດ​ຕັ້​ງສໍາ​ເລັດ ກອງ​ປະຊຸມ​ລັດຖະມົນຕີ​ການ​ຕ່າງປະເທດ​ວົງ​ແຄບ ອາ​ຊຽນ ຢູ່ ນະຄອນ​ຍາ​ຈາງ ແຂວງ​ແຄັງ​ຮວ່າ. 
ການ​ຕັດສິນ​ໃຈ​ຢ່າງ​ສູງ​ສຸດ ເພື່ອ​ສຳເລັດ​ໜ້າທີ່​ໃນ​ປີ​ເປັນ​ປະທານ​ອາ​ຊຽນ 2020, ແມ່ນ​ປີ​ພິເສດ​ຂອງ​ອາ​ຊຽນ ແລະ ຫວຽດນາມ. ສຳລັບ ອາ​ຊຽນ, ປີ 2020 ແມ່ນ ປີ​ສະເຫຼີມສະຫຼອງ​ວັນ​ສ້າງຕັ້ງ​ປະຊາ​ຄົມ​ອາ​ຊຽນ​ຄົບຮອບ 5 ປີ, ເປັນ​ຂີດ​ໝາຍ​ແຫ່ງ​ການ​ສຳຫຼວດ​ກວດກາ​ກາງ​ສະ​ໄໝ, ການ​ຜັນ​ຂະຫຍາຍ​ການ​ສ້າງ​ປະຊາ​ຄົມ​ອາ​ຊຽນ 2015 - 2020, ເຮັດ​ສຳເລັດ​ການ​ຜັນ​ຂະຫຍາຍ​ບັນດາ​ແຜນການ​ປະຕິບັດ ລະຫວ່າງ ອາ​ຊຽນ ກັບ​ບັນດາ​ຄູ່​ຮ່ວມ​ມື. ໃນ​ການ​ດຳລົງ​ຕຳແໜ່ງ​ເປັນ​ປະທານ​ອາ​ຊຽນ 2020, ຫວຽດນາມ​ທັງ​ມີ​ຄວາມ​ຮັບຜິດຊອບ ທັງ​ມີ​ກາລະ​ໂອ​ກາດ. ບົດບາດ​ຄວາມ​ຮັບຜິດຊອບ​ແມ່ນຕ້ອງ​ເຮັດ​ແນວໃດ ເພື່ອ​ຮັກສາ​ໄດ້​ທ່ວງ​ທ່າ​ພັດທະນາ​ຂອງ ອາ​ຊຽນ. ບັນດາ​ຜົນສຳເລັດ​ທີ່ ອາ​ຊຽນ ບັນລຸ​ໄດ້ ຫວຽດນາມ ຕ້ອງ​ຜັນ​ຂະຫຍາຍ, ຊຸກຍູ້​ເພື່ອ​ສ້າງ​ປະຊາ​ຄົມ​ໃຫ້​ໝັ້ນຄົງ​ເຂັ້ມແຂງ​ກວ່າ​. ສິ່ງ​ທີ່​ສຳຄັນ​ທີ່​ສຸດ ແມ່ນ​ຫວຽດນາມ ຕ້ອງ​ເປັນ​ເຈົ້າ​ພາ​ທາງ ເພື່ອ​ໃຫ້​ອາ​ຊຽນ ບໍ່​ພຽງ​ແຕ່​ມີ​ຄວາມ​ເຂັ້ມແຂງ​ຢູ່​ພາຍ​ໃນ​ເທົ່າ​ນັ້ນ ແຕ່​ຕ້ອງ​ເພີ່ມ​ທະວີ​ອິດ​ທິ​ພົນ​ຊື່​ສຽງ, ບົດບາດ​ໃນ​ພາກ​ພື້ນ, ປະກອບສ່ວນ​ເຂົ້າ​ໃນ​ຂະບວນ​ວິວັດ​ການ​ພັດທະນາ​ລວມ ກໍຄື​ຄວາມ​ສົນໃຈ​ຂອງ​ທົ່ວ​ໂລກ.
     ໃນ​ຕະຫຼອດ 25 ປີ​ທີ່​ເຂົ້າ​ຮ່ວມ​ອາ​ຊຽນ, ຫວຽດນາມຍາມ ​ໃດ​ກໍແມ່ນ​ສະມາຊິກໜຶ່ງ ​ທີ່​ຕັ້ງໜ້າ ແລະ ມີ​ຄວາມຮັບຜິດ ຊອບ, ມີ​ການ​ປະກອບສ່ວນ​ສຳຄັນ​ຫຼາຍ​ຢ່າງ​ສຳລັບ​ຂະບວນ​ວິວັດ​ການ​ພັດທະນາ​ອາ​ຊຽນ. ປີ 2010, ເປັນ​ຄັ້ງ​ທຳອິດ​ທີ່ ຫວຽດນາມ ດຳລົງ​ຕຳແໜ່ງ​ເປັນ​ປະທານ​ອາ​ຊຽນ. ຫວຽດນາມ ໄດ້​ປະສານ​ງານກັບ​ກຸ່ມ​ອາ​ຊຽນ ໃຫ້​ປະສົບ​ຜົນສຳເລັດ​ໃນ​ທຸກ​ຂົງເຂດ, ໄດ້​ຮັບ​ການ​ຕີ​ລາຄາ​ສູງ​ຈາກ​ບັນດາ​ປະເທດ​ສະມາຊິກ ແລະ ບັນດາ​ຄູ່​ຮ່ວມ​ມື. ໃນ​ການ​ດຳລົງ​ຕຳແໜ່ງ​ເປັນ​ປະທານ​ອາ​ຊຽນ​ປີ 2020, ຫວຽດນາມ ຈະ​ສືບຕໍ່​ເສີມ​ຂະຫຍາຍ​ບັນດາ​ຜົນສຳເລັດ ຊຶ່ງ​ອາ​ຊຽນ ບັນລຸ​ໄດ້, ຊຸກຍູ້​ການ​ຮ່ວມ​ມື​ພາຍ​ໃນ ແລະ ຍົກ​ສູງ​ທີ່​ຕັ້ງ​ບົດບາດ​ຂອງ​ອາ​ຊຽນ ກັບ​ພາຍ​ນອກ. ທ່ານ                                                         ຫ​ງວຽນ​ກ໊ວກ​ຢຸງ ໝັ້ນ​ໃຈ​ວ່າ: ພາຍຫຼັງ 10 ປີ, ຫວຽດນາມ ໄດ້​ເຕີບ​ໃຫຍ່​ຫຼາຍ​ພໍ​ສົມຄວນ, ນັບ​ທັງ​ທີ່​ຕັ້ງ​ໃນ​ເວທີ​ສາກົນ, ສິ່ງ​ພິເສດ​ອັນ​ໜຶ່ງ​ແມ່ນ ຫວຽດນາມ ໄດ້​ມີ​ບົດຮຽນ​ປະສົບ​ການ ເພື່ອ​ຈັດ​ຕັ້ງ​ກອງ​ປະຊຸມ​ຄື​ແນວ​ນີ້. ອິດ​ທິ​ພົນ​ຊື່​ສຽງ​ຂອງ ຫວຽດນາມ ນັບ​ມື້​ນັບ​ຍົກ​ສູງ​ຂຶ້ນ, ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈ ແລະ ໄດ້​ຮັບ​ການ​ສະໜັບສະໜູນ​ຈາກ​ບັນດາ​ປະເທດ​ໃນ​ພາກ​ພື້ນ ກໍ​ຄື​ໃນ​ທົ່ວ​ໂລກ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110