ໜັງສືພິມ ປະຊາຊົນ

ຊາວກະສິກອນເມືອງເມິງ ສຳເລັດການປັກດຳເຂົ້ານາແຊງແລ້ວ 100%

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 28/01/2021 09:36:52 ຈຳນວນຢ້ຽມຊົມ 2593 ຄັ້ງ

ຕາມການລາຍງານຂອງ ຫ້ອງການກະສິກຳ ແລະ ປ່າໄມ້ເມືອງເມິງໃນວັນທີ່ 26 ມັງກອນ ຜ່ານມານີ້ໃຫ້ຮູ້ວ່າ: ປັດຈຸບັນຊາວກະສິກອນເມືອງເມິງ,ແຂວງບໍ່ແກ້ວ ສຳເລັດການປັກດຳເຂົ້ານາແຊງແລ້ວ 100% ຂອງເນື້ອທີ່ 3,3 ເຮັກຕາ ໃນ ທົ່ວເມືອງ.

ທ່ານ ຄຳພູວັນ ພີນິດ ຫົວໜ້າ ໜ່ວຍງານປູກຝັງ ແລະ ຄຸ້ມ ຄອງພັດທະນາທີ່ດິນກະສິກຳກ່າວວ່າ: ການເຮັດນາແຊງຂອງ ຊາວກະສິກອນເມືອງເມິງ ສົກປີ 2021 ນີ້ແມ່ນຫຼຸດລົງຫຼາຍ, ເນື່ອງຈາກວ່າພວກເຂົາເຈົ້າຫັນໄປປູກພືດແນວອື່ນ ເປັນຕົ້ນແມ່ນ ໝາກອຶ, ໝາກໂມ ແລະ ພືດຜັກຕ່າງໆທຽບໃສ່ປີຜ່ານມາແມ່ນຫຼຸດລົງ 20 ກວ່າເຮັກຕາ, ການເຮັດນາແຊງຂອງຊາວກະສິກອນເມືອງເມິງໃນປີນີ້ແມ່ນໄດ້ເລີ່ມກຽມດິນ-ຕົກກ້າ ຕັ້ງແຕ່ເດືອນ 12/2020 ເປັນຕົ້ນມາ ແລະ ປັດຈຸບັນແມ່ນສາມາດປັກດຳສຳເລັດແລ້ວ 100% ຂອງເນື້ອທີ່ 3,3 ເຮັກຕາ ໃນທົ່ວ ເມືອງ, ຄາດວ່າຜົນຜະລິດຈະ ໄດ້ຮັບ 3,7 ໂຕນຕໍ່ເຮັກຕາ. ນອກ ຈາກການເຮັດນາແຊງແລ້ວ ຊາວກະສິກອນເມືອງເມິງຍັງໄດ້ປູກພືດເປັນສິນຄ້າອື່ນໆ ເຊັ່ນ: ປູກໝາກອຶ, ໝາກໂມ ສ່ວນໃຫຍ່ຈະເປັນການຮຸ້ນສ່ວນລະຫວ່າງປະຊາຊົນກັບບໍລິສັດ, ນອກນັ້ນ ປະຊາຊົນພາຍໃນເມືອງຍັງໄດ້ປູກພືດຜັກເປັນສິນຄ້າເພື່ອສ້າງລາຍໄດ້ເສີມຕື່ມອີກ.

ພ້ອມດຽວກັນນີ້ທາງຫ້ອງ ການກະສິກຳ ແລະ ປ່າໄມ້ເມືອງເມິງຍັງຈະສືບຕໍ່ຊຸກຍູ້ສົ່ງເສີມທາງດ້ານເຕັກນິກວິຊາການໃຫ້ແກ່ຊາວກະຊິກອນຢູ່ພາຍໃນເມືອງ ແລະ ລົງເຄື່ອນໄຫວສັກຢາປ້ອງກັນພະຍາດສັດລ້ຽງປະເພດງົວ-ຄວາຍ, ແບ້ ເພື່ອປ້ອງກັນການແຜ່ລະບາດຂອງພະຍາດສັດຕ່າງໆ ພ້ອມທັງຊຸກຍູ້ສົ່ງເສີມຜູ້ປະກອບການ ແລະ ປະຊາຊົນສຸມໃສ່ເພີ່ມທະວີໃນການປູກການລ້ຽງໃຫ້ຫຼາຍຂຶ້ນ ສາມາດສ້າງລາຍໄດ້ເຂົ້າສູ່ຄອບຄົວຢ່າງເປັນປົກກະຕິ ແລະ ມີຢູ່ມີກິນ, ເຮັດໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

(ຂ່າວ: ເມືອງເມິງ,ນັກຂ່າວ: ພູມມາ ມະນີສອນ)