ຫົວ​ຂໍ້ : ເມືອງພຽງ ເປີດງານເທດສະການບຸນກອງເຂົ້າໃຫຍ່

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 10/01/2020 09:41:16 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1076 ຄັ້ງ

ເມືອງ​ພຽງ ແຂວງ​ໄຊ​ຍະ​ບູ​ລີ ໄດ້​ຈັດ​ງານ​ເທດສະການ​ບຸນ​ກອງ​ເຂົ້າ​ໃຫຍ່​ປະຈຳ​ປີ 2020 ຂຶ້ນ​ໃນ​ວັນ​ທີ 9 ມັງກອນນີ້ ​ທີ່​ເດີ່ນ​ກອງ​ເຂົ້າ​ໃຫຍ່​ບ້ານ​ສົມສະ ຫວັນ ເມືອງ​ພຽງ​ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ຍັນ​ຍົງ ສີ​ປະເສີດ ຮອງ​ເລຂາ​ພັກ​ແຂວງ ຮອງ​ເຈົ້າແຂວງ​ໄຊ​ຍະ​ບູ​ລີ, ມີ​ບັນດາ​ການ​ນຳ​ຂອງ​ແຂວງ, ຂອງ​ເມືອງ, ບັນດາ​ແຂກ​ຖືກ​ເຊີນ​ເມືອງ​ອ້ອມ​ຂ້າງ, ນັກທຸລະກິດ, ພໍ່ຄ້າ​ຊາວ​ຂາຍ, ນັກ​ທ່ອງ​ທ່ຽວ ເຂົ້າ​ຮ່ວມ​ຢ່າງ​ຫຼວງ​ຫຼາຍ.
 ງານ​ເທດສະການ​ບຸນ​ກອງ​ເຂົ້າ​ໃຫຍ່​ຄັ້ງ​ນີ້, ເປັນ​ປີ​ທີ 10 ຊຶ່ງ​ພາຍຫຼັງ​ທີ່​ປະຊາຊົນ​ບັນດາເຜົ່າ​ໄດ້​ສຳເລັດ​ການ​ເກັບ​ກູ້​ຜົນ​ຜະລິດ​ແລ້ວ​ໄດ້​ພ້ອມ​ກັນ​ສະເຫຼີມສະຫຼອງ​ບຸນ​ປະເພນີ​ດ້ວຍ​ການ​ເຮັດບຸນ​ເຂົ້າເປືອກ​ເຂົ້າສານ​ຢູ່​ແຕ່​ລະ​ບ້ານ ຊຶ່ງ​ແຕ່​ລະ​ຄອບຄົວ​ໄດ້​ພາກັນ​ນຳ​ເອົາ​ເຂົ້າເປືອກ ເຂົ້າສານ​ໄປ​ທານ​ຢູ່​ວັດ​ເພື່ອ​ລະ​ນຶກ​ເຖິງ​ບຸນ​ຄຸນ​ເຂົ້າ ແລະ ເປັນ​ການ​ເຕົ້າໂຮມ​ທຶນ​ຮອນ​ປະຕິສັງຂອນ​ວັດ​ວາ​ອາ​ຮາມ ​ໂດຍ​ເຫັນ​ໄດ້​ທ່າແຮງ​ຄວາມ​ສຳຄັນ​ມູນເຊື້ອ​ທີ່​ເປັນ​ທ່າແຮງ, ຄະນະ​ພັກ, ອຳນາດ​ການ​ປົກຄອງ​ເມືອງ​ຈຶ່ງ​ໄດ້​ຍົກ​ລະດັບ​ບຸນ​ປະເພນີ​ດັ່ງກ່າວ​ຂຶ້ນ​ເປັນ​ງານ​ເທດສະການ​ລະດັບ​ເມືອງ ຊຶ່ງ​ມີ​ຫຼາຍ​ກິດຈະກຳ​ຄື: ກິດຈະກຳ​ຂະບວນ​ແຫ່​ເຂົ້າເປືອກ​ເຂົ້າສານ ຖວາຍ​ສັງຄະ​ທານ, ປະ​ກວດ​ທິດາ​ກອງ​ເຂົ້າ​ໃຫຍ່, ປະ​ກວດ​ນັກ​ຮ້ອງ​ສຽງ​ດີ, ການສະແດງ​ສິລະ​ປະ​ວັນນະຄະດີ​ບັນດາເຜົ່າ​ພາຍ​ໃນ​ເມືອງ​ ຂະບວນ​ແຫ່​ກ້ອນ​ກຳລັງ​ມວນ​ຊົນ​ບັນດາເຜົ່າ​ຈຳນວນ 25 ກ້ອນ, ມີຈຳ​ນວນ​ພົນ 4 ພັນ​ກວ່າ​ຄົນ.
 ໃນ​ງານ​ຄັ້ງ​ນີ້, ທ່ານ ເສີດ ແສງ​ສຸລິນ ເຈົ້າເມືອງໆ​ພຽງ ໄດ້​ກ່າວ​ເປີດ​ງານ​ຢ່າງ​ເປັນ​ທາງ​ການ ແລະ ຄະນະ​ປະທານ, ແຂກ​ເຂົ້າ​ຮ່ວມ​ກໍ​ໄດ້​ຮ່ວມ​ກັນ​ລັ່ນຄ້ອງ 9 ບາດ ແລະ ປ່ອຍ​ໝາກ​ປຸມ​ເປົ້າ​ເປີດງານ​ເທດສະການ​ບຸນ​ກອງ​ເຂົ້າ​ໃຫຍ່​ເມືອງ​ພຽງ​ຢ່າງ​ເປັນ​ທາງ​ການ​ແຕ່​ວັນ​ທີ 8 ຫາ 12 ມັງກອນ 2020  ຈຶ່ງ​ຈະ​ສຳ​ເລັດ.
(ຂ່າວ​-​ພາບ: ເມືອງ​ແກ່ນ​ທ້າວ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110