ໜັງສືພິມ ປະຊາຊົນ

ຕີລາຄາວຽກງານຊາວໜຸ່ມ-ເຍົາວະຊົນທົ່ວແຂວງສະຫວັນນະເຂດ 1 ປີຜ່ານມາ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 05/02/2021 09:58:58 ຈຳນວນຢ້ຽມຊົມ 1290 ຄັ້ງ

ແຂວງສະຫວັນນະເຂດ ຈັດກອງປະຊຸມຄົບຄະນະບໍລິຫານງານຊາວໜຸ່ມແຂວງ ຄັ້ງທີ 1 ສະໄໝທີ VII ເພື່ອສະຫຼຸບຕີລາຄາຄືນການຈັດຕັ້ງປະຕິບັດວຽກງານຊາວໜຸ່ມ-ເຍົາວະຊົນ ປະຈຳປີ 2020 ແລະ ວາງແຜນການປີ 2021 ຂຶ້ນໃນວັນທີ 2 ກຸມພານີ້ ທີ່ຫໍວັດທະນະທຳ ໄກສອນ ພົມວິຫານ, ພາຍໃຕ້ ການເປັນກຽດເຂົ້າຮ່ວມຂອງທ່ານ ຄຳແພງ ເພັດທຸມພອນ ຄະນະປະຈຳພັກ ປະທານແນວລາວ ສ້າງຊາດແຂວງ, ມີແຂກຖືກເຊີນເຂົ້າຮ່ວມ.

ໂອກາດນີ້, ທ່ານ ພູລຳພອນ ສີຫາວົງ ກຳມະການພັກ ເລຂາຄະນະບໍລິຫານງານຊາວໜຸ່ມ ແຂວງໄດ້ກ່າວເປີດກອງປະຊຸມ ໂດຍໃຫ້ຮູ້ວ່າ: ກອງປະຊຸມໃນຄັ້ງນີ້, ຜູ້ແທນເຂົ້າຮ່ວມໄດ້ພ້ອມກັນສັງ ເກດຕີລາຄາ ແລະ ປະເມີນຜົນໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຜູ້ແທນຊາວ ໜຸ່ມທົ່ວແຂວງໃນໄລຍະຜ່ານມາ ສັງເກດເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດ ຖອນໄດ້ ເພື່ອຊອກຫາວິທີແກ້ໄຂໃນຕໍ່ໜ້າ ຊຶ່ງກອງປະຊຸມໄດ້ສຸມໃສ່ຫຼາຍເນື້ອໃນ ໂດຍສະເພາະແມ່ນ ການຕີລາຄາຖອດຖອນບົດຮຽນຕົວຈິງໃນການປະຕິບັດວຽກງານຂອງຊາວໜຸ່ມ-ເຍົາວະຊົນ ປະຈຳປີ 2020 ແລະ ວາງແຜນການໃນປີ 2021.

ຈາກນັ້ນ, ທ່ານ ນາງ ບັງອອນ ພິມມະສານ ຮອງເລຂາຄະນະບໍລິຫານງານຊາວໜຸ່ມແຂວງ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານຊາວໜຸ່ມ - ເຍົາວະຊົນ ໄລຍະ 1 ປີຜ່ານມາໂດຍສັງເຂບ. ໃນໄລຍະຜ່ານມາ, ຄະນະບໍລິຫານງານຊາວໜຸ່ມແຕ່ລະຂັ້ນ ໄດ້ຖືເອົາ ວຽກງານສຶກສາອົບຮົມການເມືອງ-ແນວຄິດເປັນກົກ ແນໃສ່ເຮັດໃຫ້ຊາວໜຸ່ມ-ເຍົາວະຊົນ ແຕ່ລະຂັ້ນ ໄດ້ຮັບຮູ້, ເຊື່ອມຊຶມແນວທາງນະໂຍບາຍຂອງພັກ, ໄດ້ຮັບການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ, ຮ່ຳຮຽນມູນເຊື້ອຂອງຊາດຂອງພັກ ແລະ ຂອງຊາວໜຸ່ມດ້ວຍຫຼາຍຮູບການ ທີ່ສອດຄ່ອງກັບສະ ພາບຈຸດພິເສດຂອງຊາວໜຸ່ມ-ເຍົາວະຊົນ. ປັດຈຸບັນ ທົ່ວແຂວງ ມີພະນັກງານຊາວໜຸ່ມອາຊີບທັງໝົດ 132 ສະຫາຍ ຍິງ 67 ສະຫາຍ, ມີເກນອາຍຸຊາວໜຸ່ມ 15-35 ປີ ຈຳນວນ 247.720 ຄົນ ຍິງ 130.131 ຄົນ, ເປັນສະມາຊິກຊາວໜຸ່ມ 54.661 ຄົນ, ຂະຫຍາຍສະມາຊິກໃໝ່ໄດ້ 5.531 ຄົນ, ປະກອບມີ 298 ຮາກຖານ ແລະ 1.913 ໜ່ວຍ.

ກອງປະຊຸມຍັງໄດ້ຜ່ານແຜນການເຄື່ອນໄຫວປະຈຳປີ 2021 ຂອງບັນດາຂະແໜງ, ເມືອງ, ນະຄອນ ພ້ອມທັງມີການເຜີຍແຜ່ມະຕິກອງປະຊຸມໃຫຍ່ ຄັ້ງທີ VIII ຂອງຜູ້ແທນຊາວໜຸ່ມທົ່ວ ປະ ເທດນຳອີກ.

(ຂ່າວ-ພາບ: ສະຫວັນນະເຂດ)