21.10.2019 9:59     

   ພະນະ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ສປປ ລາວ ໄດ້​ສົ່ງ​ສານ​ຊົມເຊີຍ​ເຖິງພະນະ​ທ່ານ ​ໂຈ​ໂກ ວິ​ໂດ​ໂດ ປະ ທານາທິບໍດີ ແຫ່ງ​ ສາທາລະນະ​ລັດ ອິນ​ໂດ​ເນ​ເຊຍ ທີ່ຈາ​ກາ​ຕາ ຊຶ່ງ​ມີ​ເນື້ອໃນ​ວ່າ: ໃນ​ນາມ​ປະຊາຊົນ​ລາວ​ທຸກ​ຖ້ວນ​ໜ້າກໍ​ຄື​ໃນ​ນາມ​ສ່ວນ​ຕົວ, ຂ້າພະເຈົ້າຂໍ​ສະແດງ​ຄວາມ​ຊົມເຊີຍ​ຢ່າງຈິງ ​ໃຈມາ​ຍັງ ພະນະ​ທ່ານ ເນື່ອງ​ໃນ​ໂອກາດ​ທີ່​ພະນະ​ທ່ານໄດ້​ຖືກ​ ເລືອກ​ຕັ້ງ​ໃຫ້​ດຳລົງ​ຕຳແໜ່ງ​ເປັນ​ ປະທານາທິບໍດີ ແຫ່ງ ສາທາ ລະນະ​ລັດ ອິນ​ໂດ​ເນ​ເຊຍ ອີກ​ສະໄໝ​ໜຶ່ງ.

   ຂ້າ​ພະ​ເຈົ້າ ມີ​ຄວາມ​ປິ​ຕິ​ຍິນດີ​ເປັນ​ຢ່າງ​ຍິ່ງ​ທີ່​ເຫັນ​ວ່າ ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ທີ່​ດີ ລະຫວ່າງ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ແລະ ສາທາລະນະ​ລັດ ອິນ​ໂດ​ເນ​ເຊຍ ກຳລັງ​ເຕີບ​ໃຫຍ່​ຂະ ຫຍາຍຕົວ ​ໃນ​ປັດຈຸ​ບັນ ແລະ ມີ​ຄວາມ​ຍິນດີ ຈະ​ໄດ້​ສືບຕໍ່​ຮ່ວມ​ເຮັດ​ວຽກ​ກັບ ພະນະ​ທ່ານ ຢ່າງ​ໃກ້ຊິດ ເພື່ອ​ເສີມ​ຂະຫຍາຍ​ສາຍ​ພົວພັນ​ສອງ​ຝ່າຍ ແລະ ການ​ຮ່ວມ​ມື​ທີ່​ດີ​ໃນ​ປັດຈຸ​ບັນ ລະຫວ່າງ ສອງ​ປະເທດ​ພວກ​ເຮົາໃຫ້​ແຕກ​ດອກ​ອອກ​ຜົນ​ຍິ່ງໆ​ຂຶ້ນ​ ເພື່ອ​ຜົນ​ປະໂຫຍດ ລວມຂອງ​ປະຊາຊົນ​ສອງ​ຊາດ​ພວກ​ເຮົາກໍຄື​ເພື່ອ​ສັນຕິພາບ, ສະຖຽນ​ລະ​ພາບ ແລະ ການ​ຮ່ວມ​ມື​ ເພື່ອ​ການ​ພັດທະນາຢູ່​ໃນ​ພາກ​ພື້ນ ແລະ ໃນ​ໂລກ.

   ຂ້າພະເຈົ້າ ຂໍ​ຖື​ໂອກາດ​ອັນ​ສະຫງ່າ​ລາສີ​ນີ້ ອວຍພອນ​ໄຊ​ອັນ​ປະເສີດ​ໃຫ້​ພະນະ​ທ່ານ ຈົ່ງ​ມີ​ພະລາ​ນາ​ໄມ​ສົມບູນ, ມີ​ຄວາມ​ຜາ​ສຸກ ແລະ ປະຊາຊົນ​ເພື່ອນ​ມິດ ແຫ່ງ ສາທາລະນະລັດ ອິນ​ໂດ​ເນ​ເຊຍ ຈົ່ງ​ສືບຕໍ່​ມີ​ຄວາມ​ຈະເລີນ​ກ້າວໜ້າ ແລະ ຈະເລີນ ຮຸ່ງເຮືອງຍິ່ງໆ​ຂຶ້ນ.
ໃນ​ໂອກາດ​ດຽວ​ກັນ, ພະນະ​ທ່ານ ທອງ​ລຸນ ສີ​ສຸ​ລິດ ກໍ​ໄດ້ ສົ່ງ​ສານ​ຊົມເຊີຍ​ເຖິງພະນະ​ທ່ານ​ ໂຈ​ໂກ ວິ​ໂດ​ໂດ ປະທານາທິບໍດີ ແຫ່ງ ສາທາລະນະ​ລັດ ອິນ​ໂດ​ເນ​ເຊຍ ເຊັ່ນ​ດຽວ​ກັນ.