ໜັງສືພິມ ປະຊາຊົນ

ຄະນະນຳໜັງສືພິມປະຊາຊົນ ເຂົ້າອວຍພອນຄະນະນຳສະຖານທູດ ສປ.ຈີນ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 10/02/2021 18:40:44 ຈຳນວນຢ້ຽມຊົມ 1108 ຄັ້ງ

ເນື່ອງໃນໂອກາດປີໃໝ່ຂອງສປ.ຈີນ ທີ່ຈະມາເຖິງໃນມໍ່ໆນີ້ ວັນທີ 10 ກຸມພານີ້ ຄະນະນຳໜັງສືພິມປະຊາຊົນ ໄດ້ເຂົ້າອວຍພອນຄະນະນຳສະຖານທູດສປ.ຈີນ ປະຈຳລາວ ນຳໂດຍທ່ານ ວັນໄຊ ຕະວິນຍານ ຫົວໜ້າບັນນາທິການໃຫຍ່ ໜັງສືພິມ ປະຊາຊົນ ໃຫ້ກຽດຕ້ອນຮັບໂດຍ ທ່ານ ຊຽງ ຟາງ ສຽງ ທີ່ປຶກສາ, ຮອງທູດສປ.ຈີນ ປະຈຳລາວ ໂອກາດດັ່ງກ່າວນີ້ທ່ານ ຫົວໜ້າບັນນາທິການໃຫຍ່ກໍໄດ້ລາຍງານສະພາບການໂຄສະນາກ່ຽວກັບການຮ່ວມມືລະຫວ່າງສປປ ລາວ ແລະ ສປ.ຈີນ ໃນໄລຍະຜ່ານມາ ໂດຍສະເພາະແມ່ນໄລຍະການແຜ່ລະບາດຂອງພະຍາດໂຄວິດ-19 ແລະ ການຮ່ວມມືລະຫວ່າງສື່ມວນຊົນລາວ ແລະ ສື່ມວນສປ.ຈີນ ປະຈຳລາວ ຊຶ່ງສາມາດຍາດໄດ້ຜົນສຳເລັດຫຼາຍດ້ານ, ໂດຍສະເພາະການສະກັດກັ້ນການແຜ່ລະບາດຂອງພະຍາດໂຄວິດ-19 ໄດ້ທັນການ ພ້ອມດຽວກັນນີ້, ທ່ານຍັງໄດ້ຮຽກຮ້ອງໃຫ້ທາງສະຖານທູດສປ.ຈີນ ໃຫ້ການຊ່ວຍເຫຼືອສື່ມວນຊົນລາວໃຫ້ຫຼາຍຂຶ້ນກວ່າເກົ່າ ແລະ ອວຍພອນໃຫ້ ຄະນະນຳ ຕະຫຼອດຮອດພະນັກງານສະຖານທູດຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນການປະຕິບັດໜ້າທີ່ວຽກງານຢູ່ ສປປ ລາວ.

ໃນໂອກາດດັ່ງກ່າວ, ທ່ານ ຮອງທູດ ກໍໄດ້ສະແດງຄວາມດີໃຈ ແລະ ຂອບໃຈມາຍັງສື່ມວນຊົນລາວ ໂດຍສະເພາະແມ່ນໜັງສືພິມປະຊາຊົນ ທີ່ໄດ້ເອົາໃຈໃສ່ໂຄສະນາ ການຮ່ວມມືລະຫວ່າງ ສປປ ລາວ ແລະ ສປ.ຈີນ ໃນໄລຍະປີຜ່ານມາໂດຍສະເພາະແມ່ນໄລຍະການແຜ່ລະບາດຂອງພະຍາດໂຄວິດ-19 ຊຶ່ງໄດ້ໂຄສະນາບັນດາມາດຕະການ ແລະ ສ້າງຄວາມເຂົ້າໃຈກ່ຽວກັບການສະກັດກັ້ນ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ຈົນໄດ້ຮັບຜົນສຳເລັດຢ່າງໜ້າພໍໃຈ ແລະ ໃນຕໍ່ໜ້ານີ້ຂໍໃຫ້ສື່ມວນຊົນໂຄສະນາຜົນສຳເລັດໃນການຮ່ວມມືລະຫວ່າງສປປ ລາວ ແລະ ສປ.ຈີນ ເປັນຕົ້ນແມ່ນຜົນສຳເລັດໃນການສ້າງທາງດ່ວນ ແລະ ທາງລົດໄຟລາວ-ຈີນ ທີ່ກຳລັງຈະສ້າງສຳເລັດ ໃນທ້າຍປີ 2021 ລວມທັງການຊ່ວຍເຫຼືອລ້າຈາກ ສປ.ຈີນ ເປັນຕົ້ນແມ່ນການມອບວັກຊິນປ້ອງກັນພະຍາດໂຄວິດ-19 ແລະ ອື່ນໆໃຫ້ຫຼາຍຂຶ້ນກວ່າເກົ່າ, ພິເສດປີ 2021 ນີ້ເປັນປີຄົບຮອບ 60 ປີ ສາຍພົວພັນມິດຕະພາບລາວ-ຈີນ. ຊຶ່ງທັງສອງຝ່າຍກຳລັງພັນຂະຫຍາຍມິດຕະພາບການຮ່ວມມືລາວ-ຈີນ ຢ່າງຄຶກຄື້ນ. ໃນນັ້ນ, ຈະໄດ້ມີການເຄື່ອນໄຫວຫຼາຍກິດຈະກຳຮ່ວມກັນ ເພື່ອຮັດແໜ້ນການພົວພັນຮ່ວມມືສອງຝ່າຍໃຫ້ນັບມື້ນັບດີຂຶ້ນກວ່າເກົ່າ ແລະ ຫວັງວ່າ ໜັງສືພິມປະຊາຊົນ ຈະນຳສະເໜີກິດຈະກຳຢ່າງຄົບຖ້ວນ ເພື່ອໃຫ້ນ້ຳໃຈຮ່ວມຊາຕາກຳດຽວກັນ ຂອງສອງປະເທດລາວ-ຈີນ ໃຫ້ນັບມື້ນັບເພີ່ມຂຶ້ນເລື້ອຍໆ ແລະ ໃນປີ 2021 ນີ້ເປັນປີພິເສດຂອງສປ.ຈີນ ຊຶ່ງເປັນປີຄົບຮອບ 100 ການສ້າງຕັ້ງພັກກອມມູນິດຈີນ ແລະ ຫວັງວ່າຈະໄດ້ເພີ່ມທະວີການແລກປ່ຽນທິດສະດີ, ກິດຈະກຳຕ່າງໆ ໃຫ້ເລິກຊຶ່ງກວ່າເກົ່າ, ໂດຍສະເພາະນັກຂ່າວລາວຈະໄດ້ໄປທັດສະນະແລກປ່ຽນຢູ່ ສປ.ຈີນ. ຈາກນັ້ນ, ທ່ານກໍໄດ້ອວຍພອນໃຫ້ຄະນະນຳ ຕະຫຼອດຮອດພະນັກງານ ຂອງໜັງສືພິມປະຊາຊົນ ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ວຽກງານ, ຍາດໄດ້ຜົນງານໃໝ່ໃຫຍ່ກວ່າເກົ່າ.

(ຂ່າວ-ພາບ:ສິດທິພອນ)