ໂຮງຮຽນ ມສ ຕົ້ນເຜິ້ງ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຈັດພິທີເປີດການແຂ່ງຂັນກິລາ - ສິລະປະ ວັນນະຄະດີ ປະຈໍາສົກຮຽນ 2020 - 2021 ຂຶ້ນເມື່ອບໍ່ດົນມານີ້ ໂດຍການເຂົ້າຮ່ວມຂອງທ່ານ ຈັນທະວອນ ຕາງໜ້າຄະນະຫ້ອງການສຶກສາທິການ ແລະ ກິລາເມືອງ, ມີແຂກຖືກເຊີນເຂົ້າຮ່ວມ.

ທ່ານ ສູນທອນ ວຽງສີມາ ຜູ້ອຳນວຍການໂຮງຮຽນ ໄດ້ກ່າວເປີດການແຂ່ງຂັນຄັ້ງນີ້ຢ່າງເປັນທາງການ ວ່າ: ການແຂ່ງຂັນກິລາ - ສິລະປະວັນນະຄະດີຄັ້ງນີ້ ເປັນການປະຕິບັດຕາມແຜນການເຄື່ອນໄຫວ ປະຈໍາສົກຮຽນ 2020 - 2021 ຂອງໂຮງຮຽນ ມສ ຕົ້ນເຜິ້ງ, ເປັນການປະຕິບັດຕາມເນື້ອໃນຂໍ້ແຂ່ງ ຂັນຂອງກະຊວງສຶກສາທິການ ແລະ ກິລາວາງອອກ ຕາມ 3 ລັກສະນະ, 5 ຫຼັກມູນຂອງການສຶກສາ, ເປັນການເສີມສ້າງທັກສະດ້ານກິລາ - ສິລະປະວັນນະຄະດີ ເຮັດໃຫ້ນັກຮຽນມີຄວາມຮັກມັກ ໃນການຫຼິ້ນກິລາ, ອອກກໍາລັງກາຍ, ຫ່າງໄກຈາກຢາເສບຕິດ ແລະ ໃຊ້ເວລາວ່າງໃຫ້ເປັນປະໂຫຍດ. ເພື່ອຮັກສາມູນເຊື້ອ ໂຮງຮຽນຕົວແບບພະລະ ແລະ ສິລະປະສຶກສາ. ການແຂ່ງຂັນດັ່ງກ່າວ, ໄດ້ແບ່ງອອກ 5 ສີຄື: ສີແດງ, ສີເຫຼືອງ, ສີຂຽວ, ສີຂາວ, ສີຟ້າ ແລະ ສີສົ້ມ ຊຶ່ງແຕ່ລະສີປະກອບມີນັກຮຽນໃນຫຼາຍຊັ້ນຮຽນ ໂດຍມີການຈັບສະຫຼາກວ່ານັກຮຽນຄົນໃດຈະໄດ້ຢູ່ສີໃດ ເພື່ອໃຫ້ນັກຮຽນແຕ່ລະຊັ້ນໄດ້ ຮູ້ຈັກກັນເຮັດໃຫ້ມີ ຄວາມສາມັກມິດຕະພາບ ລະຫວ່າງນັກຮຽນ ແລະ ຄູ-ອາຈານແຕ່ລະຊັ້ນພາຍໃນໂຮງຮຽນ ແລະ ມີຄະນະຄູ-ອາຈານຮັບຜິດຊອບນໍາພາແຕ່ລະສີ.

ຈາກນັ້ນ, ກໍໄດ້ເລີ່ມປະກວດແຂ່ງສິລະປະວັນນະຄະດີ ແລະ ແຂ່ງຂັນກິລາປະເພດຕ່າງໆ ເປັນນັດທຳອິດ ດ້ວຍບັນຍາກາດຄຶກຄື້ນມ່ວນຊື່ນໄປດ້ວຍສຽງຊົມສຽງເຊຍຂອງຜູ້ຊົມຜູ້ເຊຍໃນແຕ່ລະສີ ຊຶ່ງການແຂ່ງຂັນແຕ່ລະປະເພດຈະໄດ້ດຳເນີນໄປຜ່ານເຂົ້າສູ່ແຕ່ລະຮອບ ຄາດວ່າຈະເຖິງຮອບຊີງຊະນະເລີດ ຫຼື ສຳເລັດການແຂ່ງຂັນໃນກາງເດືອນມີນາ 2021 ນີ້.

(ພາບ - ຂ່າວ: ອຸໄທ ພູມມາ).