ບ້ານຊຳເຕີຍ ສຸມໃສ່ການປູກໝາກໂມເປັນພືດລະດູແລ້ງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 14/01/2020 09:58:52 ຈຳ​ນວນ​​ຢ້ຽມ​ຊົມ 1775 ຄັ້ງ

ຕາມ​ການ​ລາຍ​ງານ​ຂອງ​ທ່ານ ເຄນ​ວັນ ແກ່ນ​ດວງ​ຈັນ ເລຂາ​ພັກ​ບ້ານ ນາຍບ້ານໆຊໍາ ​ເຕີຍ​ໃຫ້​ຮູ້​ວ່າ:  ບ້ານ​ຊໍາ​ເຕີຍ ເປັນ​ບ້ານ​ໜຶ່ງ​ທີ່​ນອນ​ຢູ່​ໃນ​ກຸ່ມ​ພັດທະນາ​ທ່າ​ແວ້ງ  ເມືອງ​ຄໍາ​ເກີດ ແຂວງ​ບໍລິ​ຄຳ​ໄຊ ມີ 106 ຫຼັງຄາ​ເຮືອນ 125 ຄອບຄົວ, ມີ​ພົນລະເມືອງ  536 ຄົນ  ຍິງ 229 ຄົນ  ອາຊີບ​ຕົ້ນຕໍ​ຂອງ​ປະຊາ    ຊົນແມ່ນ​ປູກ​ຝັງ​-​ລ້ຽງສັດ ແລະ ຄ້າຂາຍ​ເປັນ​ສໍາ​ຮອງ ປະຊາຊົນ​ສ່ວນ​ໃຫຍ່​ແມ່ນ​ຍັງ​ຢຶດ​ຖື​ການ​ດໍາ​ລົງ​ຊີວິດ​ແບບ​ຕິດ​ພັນ​ກັບທໍາ​ມະ​ຊາດ; ບ້ານ​ມີ​ເນື້ອ​ທີ່​ທໍາ​ການ​ຜະລິດ​ທັງ​ໝົດ 56 ເຮັກ​ຕາ ໃນ​ນັ້ນ ມີ​ເນື້ອທີ່​ນາ 30 ເຮັກ​ຕາກວ່າ​, ສະມັດຖະ​ພາບ​ເຂົ້າ​ໄດ້ 3,8-4 ໂຕນ​ຕໍ່​ເຮັກ​ຕາ,  ເນື້ອທີ່​ສວນ 20 ກວ່າ​ເຮັກ​ຕາ ໃນ​ນັ້ນ​ໄດ້​ປູກ​ໝາກໂມ, ໝາກແຕງ, ມັນຕົ້ນ, ໝາກຖົ່ວ, ໝາກ​ເພັດ, ຜັກ​ກາດ ແລະ  ພືດ​ລົ້ມ​ລຸກ​ອີກ​ຈໍາ​ນວນ​ໜຶ່ງ;  ປັດຈຸ​ບັບ  ປະຊາຊົນບ້ານ ​ຊໍາ​ເຕີຍ​ແມ່ນ​ໄດ້​ສຸມ​ໃສ່​ການປູກ ​ພືດ​ລະດູແລ້ງ​ເປັນຕົ້ນ​ແມ່ນ​ໝາກໂມ​ທີ່​ສາມາດ​ສ້າງ​ລາຍ​ຮັບ​ຢ່າງ​ຫຼວງຫຼາຍ​ໃຫ້​ແກ່​ປະຊາ​ຊົນ.
ການ​ປູກ​ໝາກໂມ​ແມ່ນ​ເລີ່ມ​ລົງມື​ປູກ​ໃນ​ທ້າຍ​ເດືອນພະ ຈິກ​ເປັນຕົ້ນ​ມາ  ຫຼັງ​ຈາກ​ເກັບ​ກ່ຽວ​ເຂົ້ານາ​ປີ​ສໍາ​ເລັດ​ແລ້ວກໍ ໄດ້​ຫັນ​ເອົາ​ເນື້ອທີ່​ນາປີ​ມາ​ເປັນ​ເນື້ອທີ່​ປູກ​ໝາກໂມ  ໃນ​ເນື້ອທີ່ 10 ​ເຮັກ​ຕາກວ່າ; ແນວ​ພັນ​ໝາກໂມ​ແມ່ນ​ຊື້​ມາ​ຈາກ​ທ້ອງ​ຕະຫຼາດ 1 ປ໋ອງ​ ສາມາດ​ກ້າ​ໄດ້ 4.500-5.000 ເບ້ຍ, ໄລຍະເວ ລາ​ການ​ເກັບ​ກ່ຽວ​ຜົນຜະລິດ​ແມ່ນ 5-6 ເດືອນ  ຊຶ່ງ​ໜຶ່ງ​ເຮັກ​ຕາ​ຜົນ​ຜະລິດ​ສາມາດ​ຂາຍ​ໄດ້​ເຖິງ 35-40 ລ້ານ​ກີບ  ທີ່​ສາມາດ​ສ້າງ​ລາຍ​ຮັບ​ຢ່າງ​ຫຼວງ​ຫຼາຍ​ໃຫ້​ແກ່​ປະຊາຊົນ​ຕໍ່​ປີ ນອກຈາກ​ການ​ປູກ​ພືດ​ແລ້ວ​ປະຊາຊົນ​ພາຍ​ໃນ​ບ້ານ​ຍັງ​ໄດ້​ລ້ຽງສັດ​ຕື່ມ​ອີກ​ເຊັ່ນ: ຄວາຍ​-​ງົວ 700 ກວ່າ​ໂຕ, ໝູ 80 ກວ່າ​ໂຕ ແລະ ສັດ​ປີກ​ອີກ 500 ກວ່າ​ໂຕ; ສະເລ່ຍ​ລາຍ​ຮັບ​ຂອງ​ປະຊາຊົນ​ໃນ​ໜຶ່ງ ​ປີ​ຈາກ​ການ​ຜະລິດ ແລະ ສັດ ລ້ຽງ ໄດ້ 2 ລ້ານ 5 ແສນ ຫາ 3 ລ້ານ​ກີບ ຕໍ່​ຄົນ​ຕໍ່​ປີ.
(ຂ່າວ: ທິນນະກອນ) 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110