ຜູ້ຮັບສະໝັກເລືອກຕັ້ງເປັນ​ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ (ສສຂ) ຊຸດທີ II ເຂດເລືອກຕັ້ງເມືອງສຸຂຸມາ ແຂວງ​ຈຳ​ປາ​ສັກ ນຳໂດຍທ່ານ ປອ ຄຳໄຕ ແກ້ວປະເສີດ ຮອງເລຂາພັກເມືອງ ປະທານກວດກາພັກ-ລັດເມືອງ ນໍ້າເບີ 1, ພ້ອມ​ດ້ວຍ​ຜູ້​ຮັບ​ສະ​ໝັກ​ເລືອກ​ຕັ້ງ ເປັນ ສ​ສ​ຂ ອີກ 5 ທ່ານ ໄດ້ສືບຕໍ່ລົງເຄື່ອນໄຫວພົບປະ ແລະ ໂຄສະນາຫາສຽງຢູ່ບ້ານກອກ ກຸ່ມ 6 ຂອງເມືອງສຸຂຸມາ ໃນ​ວັນ​ທີ 17 ກຸມ​ພາ​ຜ່ານ​ມາ ໂດຍມີເລຂາຄະນະພັກຮາກຖານກຸ່ມບ້ານ​ ພ້ອມດ້ວຍປະຊາຊົນເຂົ້າຮ່ວມ.

  ໃນພິທີີທ່ານ  ບຸນເຍືອງ ຮຸ່ງເຮືອງໄຊ ຮອງນາຍບ້ານໆກອກໄດ້ຂຶ້ນລາຍງານໂດຍຫຍໍ້ສະພາບກ່ຽວກັບການກະກຽມຄວາມພ້ອມໃສ່ບັ້ນເລືອກຕັ້ງ ສສຂ ປະຈຳເຂດເລືອກຕັ້ງເມືອງສຸຂຸມາໃຫ້ຮູ້ວ່າ: ປະ​ຊາ​ຊົນ​ບ້ານກອກ ສ່ວນ​ໃຫຍ່​ຢຶດ​ຖື​ການ​ກະ​ສິ​ກຳ​ເປັນ​ອາ​ຊີບ​ຕົ້ນ​ຕໍ ເຊັ່ນ: ປູກເຂົ້າ, ລ້ຽງສັດ, ປູກຜັກ ແລະ ພິເສດແມ່ນການຜະລິດເສັ້ນເຝີ ແລະ ຄ້າຂາຍ.

ສຳ​ລັບ​ການ​ກະ​ກຽມ​ການ​ເລືອກ​ຕັ້ງ, ຄະນະກຳມະການໜ່ວຍປ່ອນບັດໄດ້ກະກຽມຄວາມພ້ອມໃນການເລືອກຕັ້ງ ໂດຍ​ໃຫ້ຮັບປະກັນ 300%. ສຳ​ລັບກຸ່ມ 6 ມີ 2 ບ້ານຄື: ບ້ານກອກ ແລະ ບ້ານທາດ ດອນໄຊ, ບ້ານກອກ ມີພົນລະເມືອງທັງໝົດ 1.039 ຄົນ ຍິງ 552 ຄົນ ແລະ ຜູ້ມີສິດປ່ອນບັດຕົວຈິງ 489 ຄົນ ຍິງ 222 ຄົນ, ບ້ານທາດ ມີໜ້າປ່ອນບັດຕົວຈິງ 291 ຄົນ ຍິງ 113 ຄົນ.

ຫຼັງ​ຈາກ​ນັ້ນ​ຜູ້​ສະ​ໝັກ ສ​ສ​ຂ ໄດ້ແນະນໍາຕົນເອງຕະຫຼອດຮອດການເຄື່ອນໄຫວວຽກງານໃນໄລຍະຜ່ານຈົນເຖິງປັດຈຸບັນ, ພ້ອມ​ທັງກ່າ​ວ​ວ່າ: ຖ້າໄດ້ຮັບເລືອກຕັ້ງເປັນສະມາຊິກສະພາປະຊາຊົນຂັ້ນແຂວງແລ້ວ ຈະເອົາໃຈໃສ່ໃກ້ຊິດຕິດແທດກັບປະຊາຊົນ ເພື່ອນໍາເອົາແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດ ແລະ ກົດໝາຍມາຈັດຕັ້ງເຜີຍແຜ່ ແລະ ຈະ​ນຳ​ເອົາ ຄໍາສະ       ເໜີຂອງ​ປະ​ຊາ​ຊົນ​ໄປ​ສະ​ເໜີ​ຕໍ່​ສະ​ພາ​ປະ​ຊາ​ຊົນ​ແຂວງ ເພື່ອ​ໃຫ້​ພາກ​ສ່ວນ​ກ່ຽວ​ຂ້ອງ​ພິ​ຈາ​ລະ​ນາ​ແກ້​ໄຂ.

ຂ່າວ: ປັນຍາ ແກ້ວພິລົມ