ຫວ່າງ​ແລ້ວນີ້, ຢູ່ຜາມໄຊຂອງກອງບັນຊາການທະຫານແຂວງ​ບໍ​ລິ​ຄຳ​ໄຊ ໄດ້ຈັດພິທີດໍ​າເນີນການປ່ອນບັດເລືອກ ຕັ້ງ ເອົາສະມາຊິກສະພາແຫ່ງຊາດ (ສ​ສ​ຊ) ຊຸດທີ lX ປະຈໍ​າເຂດເລືອກຕັ້ງທີ 11 ແຂວງບໍລິຄຳໄຊ ແລະ ສະມາຊິກສະພາປະ ຊາຊົນແຂວງ (ສ​ສ​ຂ) ຊຸດທີ ll ໂດຍ​ການເປັນປະທານຂອງທ່ານ ພົຈວ ຈວງຈັນ ລາດຊະວົງ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງທະຫານແຂວງ, ມີຄະນະກຳມະການເລືອກຕັ້ງຂັ້ນແຂວງ, ອະນຸກຳມະ ການ ຮັບຜິດຊອບຫີບບັດ, ຄະນະກອງບັນຊາການ, ຫ້ອງການປ້ອງກັນຊາດ-ປ້ອງກັນຄວາມສະຫງົບແຂວງ ແລະ ກົມ ກອງອ້ອມຂ້າງເຂົ້າຮ່ວມປ່​ອນ​ບັດ​ຢ່າງ​ເປັນ​ຂະ​ບວນ.

ທ່ານ ພົຈວ ຈວງຈັນ ລາດຊະວົງ ໄດ້ກ່າວເປີດພິທີປ່ອນບັດຢ່າງເປັນທາງການ, ພ້ອມທັງອະທິບາຍວິທີຂີດບັດ ແລະ ຂັ້ນຕອນຕ່າງໆໃນການປ່ອນບັດໃຫ້ຖືກຕາມລະບຽບຫຼັກການເປັນຕົ້ນ:  ສ​ສ​ຊ ຊຸດທີ lX ປະຈໍ​າເຂດເລືອກຕັ້ງທີ 11 ແຂວງບໍລິຄຳໄຊ ມີຜູ້ລົງຮັບສະໝັກເລືອກຕັ້ງ 10 ທ່ານ ໃນນັ້ນໃຫ້ເລືອກເອົາ 7 ທ່ານ ສ່ວນ 3 ທ່ານທີ່ບໍ່ເອົາ ແມ່ນໃຫ້ຂີດຂ້າອອກ ແລະ ສ​ສ​ຂ ຊຸດທີ ll ປະ​ຈຳ​ເຂດ​ເລືອກ​ຕັ້ງ​ເມືອງ​ປາກ​ຊັນມີຜູ້ລົງຮັບສະໝັກເລືອກຕັ້ງ 6 ທ່ານ. ໃນນັ້ນ, ໃຫ້ເລືອກເອົາ 4 ທ່ານ, ສ່ວນ 2 ທ່ານທີ່ບໍ່ເອົາ ແມ່ນໃຫ້ຂີດຂ້າອອກ. ພ້ອມນີ້, ທ່ານຍັງຮຽກຮ້ອງໃຫ້ທຸກ​ສະ​ຫາຍທີ່ເຂົ້າຮ່ວມປ່ອນບັດໃນຄັ້ງນີ້ ຈົ່ງໃຊ້ສິດປະຊາທິປະໄຕຂອງຕົນເຂົ້າໃນການປ່ອນບັດເລືອກຕັ້ງ ດ້ວຍຄວາມ ຮັບຜິດຊອບສູງ ແລະ ເປັນເຈົ້າການໃນການປະຕິບັດລະບຽບຫຼັກການ ຂອງການປ່ອນບັດໃຫ້ຖືກຕ້ອງເຂັ້ມງວດ ເພື່ອຮັບປະກັນໃຫ້ໄດ້ 300%.

ຂ່າວ​ໃຫ້​ຮູ້​ອີກວ່າ: ໃນວັນ​ດຽວ​ກັນ​ນີ້, ຢູ່ກອງພັນ 617 ແລະ ກອງຮ້ອຍທະຫານຊາຍແດນ 251 ທະຫານແຂວງບໍລິຄຳໄຊ,  ກອງບັນຊາການທະຫານ ເມືອງທ່າພະບາດ ກໍໄດ້ຈັດພິທີດຳເນີນການປ່ອນບັດເລືອກຕັ້ງເອົາ ສ​ສ​ຊ ຊຸດທີ IX ແລະ  ສ​ສ​ຂ ຊຸດທີ II ​ເຊັ່ນດຽວ​ກັນ.

(ຂ່າວ-ພາບ: ສີ​ທອງ)