ໜັງສືພິມ ປະຊາຊົນ

ລັດຖະມົນຕີກະຊວງສາທາລະນະສຸກ ເຄື່ອນໄຫວຢ້ຽມຢາມ ໂຮງໝໍເມືອງທ່າແຕງ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 14/01/2020 10:20:01 ຈຳນວນຢ້ຽມຊົມ 841 ຄັ້ງ

ໃນໂອກາດເຂົ້າຮ່ວມກອງປະຊຸມປະຈຳປີຂອງພະແນກສາທາລະນະສຸກແຂວງ ເຊກອງ, ທ່ານ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ພ້ອມດ້ວຍຄະນະ ໄດ້ຕິດຕາມເຄື່ອນໄຫວຢ້ຽມຢາມ ໂຮງໝໍເມືອງທ່າແຕງ ແຂວງເຊກອງ ໃນວັນທີ 8 ມັງກອນ ຜ່ານມາ ໂດຍທ່ານ ກໍລະກັນບຸດສະບາ ຫົວໜ້າຫ້ອງການສາທາລະນະສຸກເມືອງ ທ່າແຕງ ພ້ອມດ້ວຍຄະນະໃຫ້ກຽດຕ້ອນຮັບ.
ການລົງເຄື່ອນໄຫວຢ້ຽມ ຢາມໂຮງໝໍເມືອງທ່າແຕງ ຄັ້ງນີ້ ລັດຖະມົນຕີກະຊວງສາທາລະນະສຸກໄດ້ພົບປະຄະນະນໍາ ແລະ ພະນັກງານແພດໝໍ ເພື່ອສືບຕໍ່ຜັນຂະຫຍາຍການຮ່ວມມືດ້ານວິຊາການທີ່ມີແລ້ວນັ້ນໃຫ້ກວ້າງຂວາງ ແລະ ມີປະສິດທິພາບຫຼາຍຂຶ້ນກວ່າເກົ່າ ໂດຍສະເພາະດ້ານການບໍລິການຂອງພະນັກງານແພດໝໍໃຫ້ພໍ່ແມ່ປະຊາຊົນບັນດາເຜົ່າ ທີ່ມາໃຊ້ບໍລິການຢູ່ໂຮງໝໍເມືອງ ກໍຄືການໃຫ້ກຳລັງໃຈແພດໝໍ ແລະ ຄົນເຈັບ, ກວດກາເບິ່ງອຸປະກອນການແພດໃນການຮອງຮັບໃຫ້ແກ່ການບໍລິການປະຊາຊົນໃນຕໍ່ໜ້າ.
ໂອກາດນີ້, ທ່ານລັດຖະ ມົນຕີກະຊວງສາທາລະນະສຸກໄດ້ສະແດງຄວາມຍ້ອງຍໍຊົມເຊີຍຄະນະນໍາສາທາລະນະສຸກທັງຂັ້ນແຂວງ ແລະ ເມືອງ ພ້ອມດ້ວຍພະນັກງານແພດໝໍ ທີ່ໄດ້ເອົາໃຈໃສ່ຕໍ່ໜ້າທີ່ວຽກງານວິຊາສະເພາະຂອງຕົນຢ່າງຕັ້ງໜ້າໃນແຕ່ລະໄລຍະ ໂດຍເນັ້ນໃສ່ການບໍລິການປະຊາຊົນຄົນເຈັບທີ່ເຂົ້າມາບໍລິການປິ່ນປົວຢູ່ໂຮງໝໍ ແລະ ອຸປະກອນການແພດ ໂດຍມີເປົ້າໝາຍ ເພື່ອຍົກລະດັບບຸກຄະລາກອນ ຫຼື ພະນັກງານແພດໝໍໃຫ້ມີຄວາມຮູ້, ຄວາມສາມາດສູງຂຶ້ນ ແລະ ມີຄວາມ ຊ່ຽວຊານໃນວຽກງານດັ່ງກ່າວ, ຂະນະດຽວກັນນັ້ນ ຍັງໄດ້ປຶກສາຫາລືຄວາມເປັນໄປໄດ້ໃນການຮ່ວມມືຄົ້ນຄວ້າວິໄຈວຽກງານສາທາລະນະສຸກລະຫວ່າງເມືອງ, ແຂວງ ແລະ ກະຊວງໃຫ້ໄດ້ຮັບຜົນດີ ເພື່ອຊອກວິທີຊ່ວຍຄົນເຈັບພາຍໃນທ້ອງຖິ່ນໃຫ້ສອດຄ່ອງຕາມແຜນຍຸດ ທະສາດ ແລະ ພັດທະນາໃຫ້ເກີດຜົນສູງສຸດ. (ຂ່າວ-ພາບ: ພອນ ບຸນອຸທິດ)