ຫົວ​ຂໍ້ : ທ່ານນາງ ສູນທອນ ໄຊຍະຈັກ ຕ້ອນຮັບ ທູດອາເມຣິກາ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 15/01/2020 09:27:42 ຈຳ​ນວນ​ຜູ້​ເຂົ້າ​ຢ້ຽມ​ຊົມ 364 ຄັ້ງ

   ໃນ​ຕອນ​ເຊົ້າ​ຂອງ​ວັນ​ທີ 14 ມັງກອນ 2020 ຢູ່​ທີ່​ສໍາ​ນັກ​ງານ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ, ທ່ານນາງ ສູນ​ທອນ ໄຊ​ຍະ​ຈັກ ຫົວໜ້າ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ ປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ອໍາ​ລາຂອງ ທ່ານ ນາງ ເຣ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ​ວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ ສ. ອາ​ເມ​ຣິ​ກາ ປະ​ຈໍາ ສປປ ລາວ.
ໃນ​ການ​ພົບ​ປະ, ທ່ານ ນາງ ສູນ​ທອນ ໄຊ​ຍະ​ຈັກ ໄດ້​ສະແດງ​ຄວາມ​ຊົມເຊີຍ​ຕໍ່​ຜົນ​ສໍາ​ເລັດ​ຂອງ​ທ່ານ​ທູດ​ອາ​ເມ​ຣິ​ກາ ໃນ​ການ​ປະຕິບັດ​ໜ້າທີ່​ການ​ທູດ​ຢ່າງ​ຫ້າວຫັນ​ຢູ່ ສປປ ລາວ ເປັນ​ເວລາ​ສອງ​ປີ​ກ່​ວາ ຊຶ່ງ​ເປັນ​ການ​ປະກອບສ່ວນ​ອັນ​ສໍາ​ຄັນ​ເຂົ້າ​ໃນ​ການ​ເສີມ​ສ້າງ​ສາຍ​ພົວພັນ​ອັນ​ດີງາມ ລະຫວ່າງ ສອງ​ປະເທດ ລາວ​-​ອາ​ເມ​ຣິ​ກາ ໃຫ້​ມີ​ການ​ຂະຫຍາຍຕົວ ໂດຍ​ສະເພາະ ໄດ້​ຊຸກຍູ້​ການ​ຮ່ວມ​ມື​ໃນ​ດ້ານ UXO ແລະ ການ​ຊອກ​ຄົ້ນ​ຊາກ​ກະດູກ​ຂອງ​ທະຫານ​ອາ​ເມ​ຣິ​ກາ​ທີ່​ຫາຍ​ສາບ​ສູນ​ໃນ​ສົງຄາມ​ຢູ່​ລາວ ແລະ ການ​ຮ່ວມ​ມື​ໃນ​ບັນດາ​ໂຄງການ ແລະ ຂະແໜງການ​ຂອງ ສປປ ລາວ; ໄດ້​ສະແດງ​ຄວາມ​ຂອບໃຈ​ຕໍ່​ລັດຖະບານ​ອາ​ເມ​ຣິ​ກາ​ທີ່​ໄດ້​ໃຫ້ການ​ສະ ໜັບສະໜູນ ແລະ ຊ່ວຍເຫຼືອ​ລາວ ເພື່ອ​ປະກອບສ່ວນ​ເຂົ້າ​ໃນ​ການ​ພັດທະນາ​ປະເທດ​ຊາດ ໃນ​ໄລຍະ​ຜ່ານ​ມາ ພ້ອມ​ທັງ​ອວຍພອນ​ໃຫ້​ທ່ານ​ທູດ​ຈົ່ງ​ເດີນທາງ​ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ ແລະ ປະສົບ​ຜົນສຳເລັດ​ໃນ​ໜ້າທີ່​ວຽກ​ງານ​ໃໝ່​ຂອງ​ທ່ານ​ທູດ.
   ໃນ​ໂອກາດ​ນີ້, ທ່ານ ນາງ ເຣ​ນາ ບິດ​ເຕີ ກໍໄດ້​ສະແດງ ຄວາມ​ ຂອບໃຈ​ມາ​ຍັງ​ພັກ ແລະ ລັດຖະບານ​ລາວ ແລະ ຄະນະ​ພົວພັນ​ຕ່າງປະເທດ​ສູນ​ກາງພັກ ທີ່​ໃຫ້ການ​ສະໜັບສະໜູນ,  ການ​ຮ່ວມ​ມື ແລະ ອຳ​ນວຍ​ຄວາມ​ສະດວກ​ດ້ານ​ຕ່າງໆ ໃຫ້​ແກ່​ການເຄື່ອນໄຫວ​ວຽກ​ງານ​ການ​ທູດ ຈົນ​ປະສົບ​ຜົນ​ສໍາ​ເລັດ​ຢ່າງ​ຈົບງາມ ແລະ ຢືນຢັນ​ວ່າຈະ​ສືບຕໍ່​ຊຸກຍູ້​ການ​ພົວພັນ​ຮ່ວມ​ມື​ອັນ​ດີງາມ ລະຫວ່າງ ສອງ​ປະເທດ ອາ​ເມ​ຣິ​ກາ​-​ລາວ ໂດຍ​ສະເພາະ ການ​ຮ່ວມ​ມື ຊ່ວຍເຫຼືອ​ບັນດາ​ໂຄງການ ແລະ ຂະແໜງການ​ຕ່າງໆຂອງ​ ສອງ​ຝ່າຍ ໃຫ້​ມີ​ການ​ເຕີບ​ໃຫຍ່​ ຂະຫຍາຍຕົວ ແລະ ໄດ້​ຮັບ ຜົນສຳ​ເລັດ​ຢ່າງ​ຕໍ່​ເນື່ອງ, ປະ ກອບສ່ວນ​ເຂົ້າ​ໃນ​ການ​ນໍາ​ເອົາ​ປະເທດ​ລາວ​ຫຼຸດ​ພົ້ນ​ອອກ​ຈາກ​ສະຖານະ​ດ້ອຍ​ພັດທະນາ​ໃນ​ຕໍ່​ໜ້າ.  (ຂ່າວ: ຄະນະ​ພົວພັນ​ຕ່າງ ປະເທດ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110