ວັນທີ 2 ມີນານີ້ ທີ່ ໂຮງຮຽນທິດສະດີການເມືອງ-ການປົກຄອງແຂວງຫຼວງນໍ້າທາ ໄດ້ມີພິທີ ປິດຊຸດຝຶກອົບຮົມທິດສະດີການເມືອງ-ການປົກຄອງ ລະບົບ 45 ວັນ ຮຸ່ນທີ XV ໃຫ້ພະນັກງານຫຼັກ ແຫຼ່ງຂົງເຂດຊາວໜຸ່ມແຂວງຫຼວງນໍ້າທາ ໂດຍການເປັນປະທານຂອງ ທ່ານ ສິງໄຊ ວັນຄໍາ ກຳມະ ການພັກແຂວງ ອໍານວຍການໂຮງຮຽນທິດສະດີການເມືອງ-ການປົກຄອງແຂວງຫຼວງນໍ້າທາ, ມີທ່ານ ສິວິໄລ ປັນແກ້ວ ກຳມະການປະຈໍາພັກແຂວງ, ປະທານກວດກາພັກ-ລັດແຂວງ, ທ່ານ ວົງມະນີ ເພຶອປະຊາ ກຳມະການພັກແຂວງ ຄະນະບໍລິຫານງານຊາວໜຸ່ມແຂວງ, ພາກສ່ວນທີ່ກ່ຽວຂ້ອງ ຕະຫຼອດຮອດພະນັກງານຄູ-ອາຈານ ແລະ ນັກສຶກສາເຂົ້າຮ່ວມ.

ທ່ານ ແສງ ເຊືອຍສົມບັດ ຫົວໜ້າວິຊາການໂຮງຮຽນທິດສະດີການເມືອງ-ການປົກຄອງແຂວງ ໄດ້ຜ່ານການຈັດຕັ້ງປະຕິບັດການຮຽນ-ການສອນ​​​ ທິດ​ສະ​ດີກາ​ນ​ເມືອງ ​- ການ​ປົກຄອງ​ ລະບົບ ​45 ວັນ​ ຮຸ່ນ​ທີ XV ​ໃນ​ສົກຮຽນ 2020, ອີງຕາມຂໍ້ຕົກລົງສະບັບເລກທີ 609/ຈຂ, ລົງວັນທີ 20/10/ 2020 ວ່າດ້ວຍການອະນຸມັດໃຫ້ໂຮງຮຽນທິດສະດີການເມືອງ - ການປົກຄອງແຂວງຫຼວງນໍ້າທາ ເປີດຊຸດຝຶກອົບຮົມທິດສະດີການເມືອງ-ການປົກຄອງ ລະບົບ 45 ວັນ ໃຫ້ແກ່ພະນັກງານຫຼັກແຫຼ່ງຂົງ ເຂດຊາວໜຸ່ມແຂວງຫຼວງນໍ້າທາ ເພື່ອ​ສ້າງ​ໃຫ້​ພະນັກງານ​ຄຸ້ມ​ຄອງ, ພະນັກງານ​ນໍາພາ​ຮຸ່ນ​ສືບ​ທອດ​ ຢູ່​ບັນດາ​ພະ​ແນ​ກການ-ຫ້ອງການ​ຂອງ​ເມືອງ, ບັນດາ​ຂະ​ແໜງ​ການ​​ອ້ອມ​ຂ້າງ ໄດ້ມີ​ຄຸນສົມບັດ​ສິນ​ທໍາ​ປະຕິບັດ, ມີ​ຄວາມ​ຮູ້​ຄວາມ​ສາມາດ ​ໃນ​ການຈັດ​ຕັ້ງ​ປະຕິບັດ​ໜ້າ​ທີ່​ວຽກ​ງານ​ໃນ​ໄລຍະ​ໃໝ່. ການຝຶກອົບ ຮົມຄັ້ງນີ້, ເລີ່ມມາແຕ່ເດືອນພະຈິກ 2020 ມາຮອດເດືອນກຸມພາ 2021, ​ມີ​ນັກສຶກສາທັງໝົດ 58 ສະຫາຍ ຍິງ 13 ສະຫາຍ, ມີ 5 ວິຊາຄື: ວິຊາປັດຊະຍາມາກ-ເລນິນ ມີ 8 ບົດ, ວິຊາເສດ ຖະສາດການເມືອງ ມີ 10 ບົດ, ວິຊາລັດທິສັງຄົມນິຍົມວິທະຍາສາດ ມີ 8 ບົດ, ວິຊາກໍ່ສ້າງພັກ ມີ 5 ບົດ ແລະ ວິຊາບໍລິຫານສານ ແລະ ການປົກຄອງ ມີ 8 ບົດ; ລວມມີ 39 ບົດ, 192 ຊົ່ວໂມງ, 12 ໜ່ວຍກິດ. ຈາກການສຶກສາຄົ້ນຄວ້າຮໍ່າຮຽນຂອງນັກສຶກສາຜ່ານການສອບເສັງ ມີຜູ້ໄດ້ຄະແນນ A ກວມເອົາ 57,25% ລື່ນຄາດໝາຍຂອງແຜນການ 2,25%, ຄະແນນ B+ ກວມເອົາ 35,15% ລື່ນຄາດໝາຍຂອງແຜນການ 10,15%.

ໂອກາດນີ້ ທ່ານ ສິງໄຊ ວັນຄໍາ ກໍໄດ້ມອບໃບຢັ້ງຢືນໃຫ້ນັກສຶກສາ ທິດສະດີການເມືອງ-ການປົກຄອງ ລະບົບ 45 ວັນ ຮຸ່ນທີ XV. (ຂ່າວ-ພາບ: ກິ່ນນາລົມ)