ຫົວ​ຂໍ້ : ທູດຫວຽດນາມ ຈັດງານລ້ຽງສະຫຼອງປີໃໝ່

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 16/01/2020 09:17:57 ຈຳ​ນວນ​ຜູ້​ເຂົ້າ​ຢ້ຽມ​ຊົມ 425 ຄັ້ງ

     ສະຖານ​ເອກ​ອັກ​ຄະ​ລັດ​ຖະ​ທູດ ແຫ່ງ ສສ ຫວຽດ ນາມ ປະຈຳ ສປປ ລາວ ແລະ ສະມາຄົມ​ໃຫຍ່​ຊາວ​ຫວຽດນາມ​ຢູ່​ລາວ ໄດ້​ຈັດ​ງານ​ລ້ຽງບຸນ​ເຕັດ​ມິດຕະພາບ ຫວຽດນາມ - ລາວ ຕ້ອນຮັບ​ປີ​ໃໝ່ ຂອງ​ຊາວ​ຫວຽດນາມ ໃນ​ວັນ​ທີ 14 ມັງກອນ ຜ່ານ​ມາ ທີ່​ໂຮງແຮມ ເມືອງ​ແທັງ​ນະຄອນຫຼວງ​ວຽງ​ຈັນ ໂດຍ​ມີ ທ່ານ ສອນ​ໄຊ ສີ​ພັນ​ດອນ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ປະທານ​ຄະນະ​ກຳມະການ​ຮ່ວມ​ມື ລາວ - ຫວຽດນາມ, ທ່ານ ພົນ​ເອກ  ຈັນ​ສະໝອນ ຈັນ​ຍາ​ລາດ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ລັດຖະມົນຕີ​ກະຊວງ​ປ້ອງ​ກັນ​ປະເທດ ພ້ອມ​ດ້ວຍ​ບັນດາ​ການ​ນໍາ​ຂັ້ນ​ສູງ​ຂອງ​ລາວ​ເຂົ້າ​ຮ່ວມ.
    ທ່ານ ຫ​ງວຽນ ບ່າ ຮຸ່ງ ເອກ​ອັກ​ຄະ​ລັດ​ຖະ​ທູດ​ວິສາມັນ ຜູ້​ມີ​ອຳນາດ​ເຕັມ ແຫ່ງ ສສ ຫວຽດນາມ ປະຈຳ ສປປ ລາວ ໄດ້​ຂຶ້ນ​ກ່າວ​ໃນ​ງານ​ດັ່ງກ່າວວ່າ: ປີຜ່ານມາ, ພວກ​ເຮົາ​ມີ​ຄວາມ​ປິ​ຕິ​ຊົມຊື່ນ ເມື່ອ​ໄດ້​ເຫັນ​ວ່າ​ສາຍ​ພົວພັນ ແລະ ການ​ຮ່ວມ​ມື​ລະຫວ່າງ​ສອງ​ປະເທດ​ມີ​ສີສັນ​ອັນ​ສົດໃສ ດ້ວຍ​ຜົນງານ​ຫຼາຍ​ດ້ານ​ທີ່​ໜ້າ​ພາກພູມ​ໃຈ ເປັນຕົ້ນ​ການ​ຮ່ວມ​ມື​ໃນ​ຂົງເຂດ​ການເມືອງ, ການ​ຕ່າງປະເທດ, ປ້ອງ​ກັນ​ຊາດ - ປ້ອງ​ກັນຄວາມ ​ສະຫງົບ ແລະ ການ​ຮ່ວມ​ມື​ທາງ​ດ້ານ​ເສດຖະກິດ ກໍ​ມີ​ບາດ ກ້າວ​ຂະຫຍາຍຕົວ​ທີ່​ຕັ້ງໜ້າ, ບັນດາ​ໂຄງການ ທີ່​ມີ​ຄວາມ​ໝາຍ​ຍຸດທະສາດ​ຍາວ​ນານ, ເຊື່ອມ​ຈອດ​ສອງ​ພື້ນຖານ​ເສດ ຖະກິດ, ພິເສດ​ແມ່ນ​ການ​ພົບ​ປະ ລະ​ຫວ່າງ ​ກົມ​ການເມືອງ​ພັກ​ປະຊາຊົນ​ ປະຕິວັດ​ລາວ ແລະ  ພັກ​ກອມ​ມູ​ນິດ​ຫວຽດ ນາມ ແລະ ກອງ​ປະຊຸມ​ຄັ້ງທີ 42 ຂອງ​ຄະນະ​ກຳມະການ​ຮ່ວມ​ມື ຫວຽດນາມ - ລາວ ໄດ້​ບັນລຸ​ສັນຍາ​ສຳຄັນ​ຫຼາຍ​ສະບັບ ອັນ​ຈະ​ເປີດ​ສັກກະຫຼາດ​ໃໝ່​ໃນ​ການ​ຮ່ວມ​ມື ຊຶ່ງ​ເປັນ​ສັນຍານ​ບົ່ງ​ບອກ​ວ່າ ການ​ພົວພັນ​ຮ່ວມ​ມື​ລະຫວ່າງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ​ໃນ​ປີ 2020 ຈະ​ຟົດຟື້ນ, ມີ​ຫຼາຍ​ວຽກ​ງານ​ຈະ​ບັນລຸ​ໄດ້​ໝາກຜົນ​ອັນ​ຈົບ​ງາມ.
ໂອກາດ​ເຂົ້າ​ຮ່ວມ​ງານ​ດັ່ງກ່າວ, ທ່ານ ພົນ​ເອກ ຈັນ​ສະ ໝອນ ຈັນ​ຍາ​ລາດ ໄດ້​ຕາງໜ້າ​ໃຫ້​ພັກ - ລັດ​ຖະ​ບານ​ລາວ, ກອງ ທັບ ແລະ ປະຊາຊົນ​ລາວ ກ່າວ​ສະແດງ​ຄວາມ​ຂອບໃຈ​ຢ່າງ​ຈິງ​ໃຈ ແລະ ຮູ້​ບຸນຄຸນ​ຢ່າງ​ເລິກ ເຊິ່ງ​ຕໍ່​ພັກ - ລັດ, ກອງທັບ ແລະ ປະຊາຊົນ​ຫວຽດນາມ ອ້າຍ​ນ້ອງ ທີ່​ໄດ້​ໃຫ້ການ​ສະໜັບສະໜູນ ແລະ ຊ່ວຍເຫຼືອ​ອັນ​ໃຫຍ່​ຫຼວງ, ອວຍພອນ​ໃຫ້​ສາຍ​ພົວ​ພັນ​ມິດ ຕະພາບ​ທີ່​ຍິ່ງ​ໃຫຍ່, ຄວາມ​ສາ ມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ລາວ - ຫວຽດນາມ ໝັ້ນຄົງ​ທະ​ນົງ​ແກ່ນ ແລະ ສົດໃສ​ງົດ​ງາມ​ຕະຫຼອດ​ໄປ. 
ໃນ​ປີຜ່ານມາ, ການ​ຮ່ວມ​ມື​ດ້ານ​ການ​ຄ້າ ລະຫວ່າງ​ສອງ​ປະເທດ ບັນລຸ 1.038 ລ້ານ​ໂດ​ລາ ເພີ່ມ​ຂຶ້ນ 12,8% ເມື່ອ​​ທຽບໃສ່​ປີ 2018, ເປົ້າ​ໝາຍ​ສູ້​ຊົນ​ຂອງ​ສອງ​ລັດຖະບານ​ໃນ​ປີ​ນີ້ ແມ່ນ​ຈະ​ເຮັດ​ໃຫ້​ມູນ​ຄ່າ​ການ​ຄ້າ​ສອງ​ຝ່າຍ​ເພີ່ມ​ຂຶ້ນ 15% ໃນ​ຂະນະ​ທີ່​ປີຜ່ານມາ​ຫວຽດນາມ​ມີ​ການ​ພັດທະນາ​ທີ່​ໜ້າ​ປະທັບ​ໃຈ. ໃນ​ນັ້ນ, ລວມ​ຍອດ​ຜະລິດ​ຕະ​ພັນ​ພາຍ​ໃນ ມີ​ການ​ເຕີບ​ໂຕ​ໃນ​ລະດັບ 7,02% ສູງ​ກວ່າ ແຜນການ​ວາງ​ໄວ້, ລວມ​ຍອດ​ລາຍ​ຮັບ​ແຫ່ງ​ຊາດ​ບັນລຸ 266 ຕື້​ໂດ​ລາ ເພີ່ມ​ຂຶ້ນ 26 ຕື້​ໂດ​ລາ ເມື່ອ​ທຽບໃສ່​ປີ 2018, ສະເລ່ຍ​ລາຍ​ຮັບ​ຕໍ່​ຫົວ​ຄົນ​ບັນລຸ 2.800 ໂດ​ລາ ແລະ ອັດຕາ​ຄອບຄົວ​ທຸກ​ຍາກ​ຫຼຸດ​ລົງ​ຫຼາຍ ຍັງ​ເຫຼືອ​ພຽງ 4%.
  (ຂ່າວ - ພາບ: ສຸກ​ສະຫວັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110