ຫົວ​ຂໍ້ : ທ່ານ ສະ¬ເຫຼີມໄຊ ກົມມະສິດ ຕ້ອນຮັບ ທູດອາເມຣິກາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 16/01/2020 09:20:02 ຈຳ​ນວນ​ຜູ້​ເຂົ້າ​ຢ້ຽມ​ຊົມ 487 ຄັ້ງ

     ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ອໍາ​ລາ​ຂອງ ທ່ານ ນາງ ຣີ​ນາ ບິດ​ເຕີ (Rena Bitter) ເອກ​ອັກ​ຄະ​ລັດ​ຖະ​ທູດ ສະຫະລັດ ອາ​ເມ​ຣິ​ກາ ປະ​ຈໍາ ສປປ ລາວ ໃນ​ວັນ​ທີ 14 ມັງກອນ​ນີ້ ທີ່​ກະຊວງ​ການ​ຕ່າງປະເທດ, ໃນ​ໂອກາດ​ໄດ້​ສຳເລັດ​ການ​ປະຕິບັດ​ໜ້າທີ່​ການ​ທູດ​ປະຈຳ​ຢູ່ ສປປ ລາວ. 
ທ່ານ ສະເຫຼີມ​ໄຊ ກົມ​ມະ​ສິດ ໄດ້​ຕີ​ລາຄາ​ສູງ​ຕໍ່​ການ​ປະກອບສ່ວນ​ອັນ​ສຳຄັນ​ຂອງ​ທ່ານ​ທູດ​ໃນ​ການ​ເປັນ​ຂົວ​ຕໍ່​ລະຫວ່າງ ສປປ ລາວ ແລະ ສະຫະລັດ ອາ​ເມ​ຣິ​ກາ ຕະຫຼອດ​ໄລຍະ​ການ​ປະຕິບັດ​ໜ້າທີ່​ຢູ່ ສປປ ລາວ ໂດຍ​ສະເພາະ​ການ​ຊຸກຍູ້ ແລະ ສົ່ງເສີມ​ການ​ພົວພັນ​ຮ່ວມ​ມື​ສອງ​ຝ່າຍ​ໃນ​ດ້ານ​ຕ່າງໆ ເປັນຕົ້ນ​ແມ່ນ ການຈັດຕັ້ງ​ຜັນ​ຂະຫຍາຍ ການ​ເປັນ​ຄູ່​ຮ່ວມ​ມື​ແບບ​ກວມ​ລວມ ລາວ​-​ອາ​ເມ​ຣິ​ກາເຊັ່ນ: ຊຸກຍູ້​ການ​ແລກປ່ຽນ​ການ​ຢ້ຽມຢາມ ລະຫວ່າງ​ຄະນະ​ຜູ້​ແທນ​ຂອງ​ສະຫະລັດ ອາ​ເມ​ຣິ​ກາ ແລະ ສປປ ລາວ ໃນ​ຂະແໜງການ ແລະ ລະດັບ​ຕ່າງໆ; ປະສານ​ງານ​ໃນ​ການຈັດຕັ້ງ​ປະຕິບັດ​ບັນດາ​ໂຄງການ​ຮ່ວມ​ມື​ສອງ​ຝ່າຍ ໃນ​ຂອບ​ວຽກ​ງານ​ການ​ເກັບ​ກູ້​ລະເບີດ​ບໍ່​ທັນ​ແຕກ (UXO); ວຽກ​ງານ​ສາ​ທາ ລະນະ​ສຸກ ແລະ ໂພຊະ​ນາ​ການ; ດ້ານ​ການ​ສຶກສາ; ດ້ານ​ເສດຖະກິດ; ການ​ບັງຄັບ​ໃຊ້​ກົດໝາຍ ແລະ ອື່ນໆ.
    ທ່ານ​ລັດຖະມົນຕີ​ກະ ຊວງ​ການ​ຕ່າງປະເທດ ຍັງ​ໄດ້​ຕາງໜ້າ​ໃຫ້​ລັດຖະບານ ແລະ ປະຊາຊົນ​ລາວ ສະແດງ​ຄວາມ​ຂອບໃຈ​ຢ່າງ​ຈິງ​ໃຈ ຕໍ່​ຄວາມ​ພະຍາຍາມ ແລະ ການ​ຊ່ວຍເຫຼືອ ດ້ານ​ຕ່າງໆ ຂອງ​ທ່ານ​ທູດ ໃນ​ໄລຍະ​ທີ່​ຜ່ານ​ມາ ພ້ອມ​ທັງ​ຝາກ​ຄວາມ​ຫວັງ​ວ່າ ພາຍຫຼັງ​ເດີນທາງ​ກັບ​ຄືນ​ປະເທດ, ທ່ານ​ທູດ​ຈະ​ຍັງ​ສືບຕໍ່​ສະໜັບສະໜູນ ສປປ ລາວ ກໍ​ຄື​ການ​ສືບຕໍ່​ປະກອບສ່ວນ​ອື່ນໆ ເພື່ອ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື ລະຫວ່າງ​ສອງ​ປະເທດ ລາວ ແລະ ສະຫະລັດ ອາ​ເມ​ຣິ​ກາ ໃຫ້​ມີ​ໝາກຜົນ​ຍິ່ງໆ​ຂຶ້ນ​ໃນ​ອະນາຄົດ, ພ້ອມ​ທັງ​ອວຍພອນ​ໃຫ້​ທ່ານ​ທູດ  ຈົ່ງ​ເດີນທາງ​ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ ແລະ ປະສົບ​ຜົນສຳເລັດ​ໃນ​ໜ້າທີ່​ວຽກ​ງານ​ໃໝ່​ຂອງ​ທ່ານ.
(ຂ່າວ: ກະຊວງ​ການ​ຕ່າງປະເທດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110