ຫົວ​ຂໍ້ : ປີ 2019 ເສດຖະກິດແຂວງໄຊຍະບູລີ ຂະຫຍາຍຕົວ 8%

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 16/01/2020 10:21:38 ຈຳ​ນວນ​ຜູ້​ເຂົ້າ​ຢ້ຽມ​ຊົມ 494 ຄັ້ງ

ທ່ານ ເພັງ​ນິ​ລັນ ຄໍາ​ພັນ​ເພັງ ຮອງ​ເຈົ້າແຂວງໄຊ​ຍະ​ບູ​ລີ ຜູ້​ຊີ້​ນໍາ​ວຽກ​ງານ​ເສດຖະກິດ​ຂອງ​ແຂວງ​ໄດ້​ແຈ້ງ​ໃຫ້​ຮູ້​ວ່າ: ຕະຫຼອດ​ໄລຍະ 1 ປີຜ່ານມາ​ແຂວງໄຊ​ຍະ​ບູ​ລີ ແມ່ນ​ພົບ​ກັບ​ໄພພິບັດ​ທາງ​ທໍາ​ມະ​ຊາດ​ເຊັ່ນ: ໄພ​ແຫ້ງແລ້ງ, ແຜ່ນດິນ​ໄຫວ, ການ​ລະບາດ​ຂອງ​ບົ້ງ​ທໍາ​ລາຍ​ຜົນລະປູກ, ພະຍາດ​ອະຫິ​ວາ​ໝູ​ອາ​ຟຣິ​ກາ ແລະ ອື່ນໆ ອັນ​ໄດ້​ສົ່ງ​ຜົນ​ສະທ້ອນ​ຕໍ່​ການ​ພັດທະນາ​ເສດ​ຖະ​ກິດ​-​ສັງຄົມ​ຂອງ​ແຂວງ​ໂດຍ​ກົງ, ແຕ່​ພາຍ​ໃຕ້​ການ​ຊີ້​ນໍາ-ນໍາ​ພາ​ຂອງ​ອົງການ​ປົກຄອງ​ທຸກ​ຂັ້ນ, ໄດ້​ເຮັດ​ໃຫ້​ແຂວງໄຊ​ຍະ​ບູ​ລີ ຍັງ​ສືບຕໍ່​ມີ​ສະຖຽນ​ລະ​ພາບ​ທາງ​ດ້ານ​ການເມືອງ, ສັງຄົມ​ມີ​ຄວາມ​ສະຫງົບ ແລະ ເປັນ​ລະບຽບ​ຮຽບຮ້ອຍ, ເສດຖະກິດ​ສືບຕໍ່​ຂະຫຍາຍຕົວ​ໃນ​ລະດັບ 8%, ຫຼຸດ​ແຜນທີ່​ວາງ​ໄວ້ 0,7% (ແຜນ​ວາງ​ໄວ້ 8,7%), ລວມ​ຍອດ​ມູນ​ຄ່າ​ຜະລິດ​ຕະ​ພັນ​ພາຍ​ໃນ 10.229 ຕື້​ກີບ, ຫຼຸດ​ແຜນ 449 ຕື້​ກີບ,  ສະເລ່ຍ​ຕໍ່​ຫົວ​ຄົນ​ໄດ້ 27,70 ລ້ານ​ກີບ ຫຼື ເທົ່າ​ກັບ 3.113 ໂດ​ລາ​, ໂຄງ​ປະກອບ​ເສດຖະກິດ​ໄດ້​ປ່ຽນແປງ​ໄປ​ຕາມ​ທິດ​ທີ່​ຕັ້ງໜ້າ​ເຊັ່ນ: ກະສິກຳ ຂະຫຍາຍຕົວ 3,2% ກວມ​ເອົາ 29%, ອຸດສາຫະກຳ ຂະຫຍາຍຕົວ 12,6% ກວມ​ເອົາ 36%  ແລະ ຂົງເຂດ​ການ​ບໍລິການຂະຫຍາຍຕົວ 5,2%, ກວມ​ເອົາ 35% ຂອງ GDP,  ສາມາດ​ຈັດ​ຕັ້ງ​ປະຕິບັດ​ລາຍ​ຮັບ​ໄດ້ 913,43 ຕື້​ກີບ ເທົ່າ​ກັບ 94,98% ຂອງ​ແຜນການ​ປີ, ທຽບໃສ່​ເວລາ​ດຽວ​ກັນ​ຂອງ​ປີຜ່ານມາ ເພີ່ມ​ຂຶ້ນ 5,81%, ສາມາດ​ປະຕິບັດ​ໂຄງການ​ລົງທຶນ​ຂອງ​ລັດ​ໄດ້​ທັງ​ໝົດ 360 ໂຄງການ ມູນ​ຄ່າ 40,65 ຕື້​ກີບ ເທົ່າ​ກັບ 99,68%, ທຶນ​ຊ່ວຍເຫຼືອ​ ແລະ ກູ້​ຢືມ 46 ໂຄງການ  ມູນ​ຄ່າ 9,52 ລ້ານ​ໂດ​ລາ​  ແລະ  ການ​ລົງທຶນ​ຂອງ​ເອກະ​ຊົນ​ພາຍ​ໃນ ແລະ ຕ່າງປະເທດ 11 ໂຄງການ ມູນ​ຄ່າ 9,30 ລ້ານ​ໂດ​ລາ​, ບັນດາ​ສາຂາ​ທະນາຄານ​ພາຍ​ໃນ​ແຂວງ​ສາມາດ​ລະດົມ​ເງິນ​ຝາກ​ໄດ້​ທັງ​ໝົດ 1.815,03 ຕື້​ກີບ ແລະ ປ່ອຍ​ສິນ​ເຊື່ອ​ໄດ້ 766,84 ຕື້​ກີບ, ການ​ຜະລິດ​ເຂົ້າ​ໃນ​ປີ 2019 ສາມາດ​ປະຕິບັດ​ໄດ້​ໃນ​ເນື້ອທີ່ 46.105,7 ເຮັກຕາ ຜົນ​ຜະລິດ​ໄດ້ 152.021,60 ໂຕນ, ປູກ​ພືດ​ສະບຽງ​ອາຫານ 29.469,16 ເຮັກຕາ  ຜົນ​ຜະລິດ​ໄດ້ 155.893,93 ໂຕນ, ໃນ​ນີ້​ມີ: ສາລີ​ຫວານ, ເຜືອກ​-​ມັນ, ໄມ້​ໃຫ້​ໝາກ ແລະ ພືດ​ຜັກ​ຕ່າງໆ, ການ​ປູກ​ພືດ​ເປັນ​ສິນຄ້າ​ມີ​ເນື້ອທີ່ 101.311 ກວ່າ​ເຮັກຕາ, ໃນ​ນີ້​ພືດ​ເສດຖະກິດ​ຫຼັກ​ແມ່ນ ສາລີ​ແຂງ ຜົນ​ຜະລິດ​ໄດ້ 189.343 ກວ່າ​ໂຕນ, ມັນຕົ້ນ ຜົນ​ຜະລິດ​ໄດ້ 872.385 ກວ່າ​ໂຕນ ແລະ ໝາກເດືອຍ ຜົນ​ຜະລິດ​ໄດ້ 62.082 ກວ່າ​ໂຕນ,  ການ​ລ້ຽງສັດ​ກໍໄດ້​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ, ສະເລ່ຍ​ການ​ຂະຫຍາຍຕົວ​ສະເພາະ ງົວ​-​ຄວາຍ ເທົ່າ​ກັບ 8,11%, ເຖິງ​ປັດຈຸ​ບັນ​ທົ່ວ​ແຂວງ​ມີ​ສັດລ້ຽງ​ທັງ​ໝົດ 4 ລ້ານ​ກວ່າ​ໂຕ, ໃນ​ນັ້ນ ຄວາຍ 66.561 ໂຕ, ງົວ 209.327 ໂຕ, ໝູ 182.338 ໂຕ, ແບ້ 24.162 ໂຕ ແລະ ສັດ​ປີກ​ເກືອບ 4 ລ້ານ​ໂຕ, ສາມາດ​ສົ່ງ​ອອກ​ສິນຄ້າ​ໄປ​ຕ່າງປະເທດ​ໄດ້​ທັງ​ໝົດ​ເກືອບ 34 ລ້ານ​ໂດ​ລາ​, ມູນ​ຄ່າ​ນໍາ​ເຂົ້າ 77 ລ້ານ​ກວ່າ​ໂດ​ລາ, ທົ່ວ​ແຂວງ​ມີ​ເສັ້ນທາງ​ຍາວ​ທັງ​ໝົດ 3.259,88 ກິໂລແມັດ, ໃນ​ນັ້ນ​ເສັ້ນທາງ​ປູຢາງ​ສອງ​ຊັ້ນ 999,94 ກິໂລແມັດ, ປູຢາງ​ຂົ້ວ 84,95 ກິໂລແມັດ, ເສັ້ນທາງ​ທຽວ​ໄດ້​ສອງ​ລະດູ 376 ບ້ານ, ລະດູ​ດຽວ 57 ບ້ານ, ມີ​ໄຟຟ້າ​ເຂົ້າ​ເຖິງ 432 ບ້ານ ເທົ່າ​ກັບ 100%, ຄອບ​ຄົວ​ໄດ້​ຊົມໃຊ້​ໄຟຟ້າ 76.738 ຄອບຄົວ ເທົ່າ​ກັບ 97,87%, ອັດຕາ​ການ​ເຂົ້າ​ຮຽນ​ຊັ້ນ​ປະຖົມ 99,6%, ມັດທະຍົມ​ຕົ້ນ 87,7%, ມັດ ທະຍົມ​ປາຍ 58,9%, ອັດຕາ​ການ​ຊົມໃຊ້​ວິດຖ່າຍ 92%, ຊົມ​ໃຊ້​ນໍ້າ​ສະອາດ 87%, ສັກ​ຢາ​ກັນ​ພະຍາດ ໃນ​ເດັກ​ລຸ່ມ 1 ປີ 39%, ອັດຕາ​ການ​ເກີດ​ລູກ​ມີ​ແພດ​ຊ່ວຍ 31%, ສ້າງ​ບ້ານ​ວັດ​ທະ​ນະ​ທໍາ​ໄດ້ 6 ບ້ານ, ມີ​ບໍລິສັດ​ທ່ອງ​ທ່ຽວ 13 ບໍລິສັດ, ມີ ໂຮງແຮມ 7 ແຫ່ງ, ເຮືອນ​ພັກ 173 ແຫ່ງ, ຣີ​ສອດ 6 ແຫ່ງ, ຮ້ານ​ອາຫານ 89 ຮ້ານ, ຮ້ານ​ບັນ​ເທິງ 22 ຮ້ານ ແລະ ຮ້ານ​ກິນ​ດື່ມ 33 ແຫ່ງ, ສາມາດ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ ແລະ ຜ່ານ​ແຂວງ 96.599 ຄົນ, ສ້າງ​ລາຍ​ຮັບ​ໄດ້ 5 ລ້ານ​ກວ່າ​ໂດ​ລາ​ ແລະ ສາມາດ​ລຶບ​ລ້າງ​ຄວາມທຸກ​ຍາກ​ຕາມ​ດໍາ​ລັດ 384/ລບ ຍັງ​ເຫຼືອ​ຄອບຄົວ​ທຸກ​ຍາກ 6.164 ຄອບຄົວ, ເທົ່າ​ກັບ 7,81% ຂອງ​ຄອບ​ຄົວ​ທັງ​ໝົດ. (ຂ່າວ​-​ພາບ​: ອຸ່ນ​ເຮືອນ ໂພທິ​ລັກ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110