ໜັງສືພິມ ປະຊາຊົນ

ນາຍົກ ຊີ້ແຈງ 5 ຈຸດສຳຄັນຕໍ່ການພັດທະນາ ເສດຖະກິດ - ສັງຄົມ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 24/03/2021 10:25:32 ຈຳນວນຢ້ຽມຊົມ 2718 ຄັ້ງ

ທ່ານ ພັນຄຳ ວິພາວັນ ນາຍົກລັດຖະມົນຕີໄດ້ ຊີ້ແຈງ 5 ຈຸດສຳຄັນທີ່ຍັງບໍ່ທັນບຸກທະລຸໃນການພັດທະນາເສດຖະກິດ-ສັງຄົມ, ຂະນະທີ່ເສດຖະກິດຂອງປະເທດເຮົາ ເປັນເສດຖະ ກິດຂະໜາດນ້ອຍ ແລະ ມີຄວາມບອບບາງສູງ.

ກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ IX ໃນວັນທີ 23 ມີນາ 2021 ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ພັນຄຳ ວິພາວັນ ນາຍົກລັດຖະ ມົນຕີໄດ້ຂຶ້ນຊີ້ແຈງ ຕໍ່ ສະມາຊິກສະພາແຫ່ງຊາດ (ສສຊ).

ທ່ານ ພັນຄຳ ວິພາວັນ ໄດ້ກ່າວວ່າ: ການປະກອບຄຳຄິດຄຳເຫັນຂອງບັນດາທ່ານ ສສຊ ໄດ້ສະແດງໃຫ້ເຫັນເຖິງຄວາມເອົາໃຈໃສ່ຄວາມເປັນຫ່ວງເປັນໄຍຂອງສະມາຊິກສະພາແຫ່ງຊາດຕໍ່ການປະຕິບັດໜ້າທີ່ຂອງລັດຖະບານໃນການແກ້ໄຂບັນ ຫາຕ່າງໆ ຢູ່ໃນການພັດທະນາເສດຖະກິດ-ສັງຄົມກໍຄື ແຜນງົບປະມານແຫ່ງລັດໃນຕໍ່ໜ້າ, ລັດຖະບານ ຂໍຮັບເອົາຄຳເຫັນດັ່ງກ່າວ ເພື່ອນຳໄປພິຈາລະນາປັບປຸງເປັນແຜນລະອຽດ ແລະ ມີຄວາມພະຍາຍາມສູງທີ່ສຸດ, ແຕ່ຜ່ານຄຳຄິດຄຳເຫັນຂອງບັນດາຜູ້ແທນກໍຄືຄະນະປະຈຳສະພາແຫ່ງຊາດໄດ້ຊ່ວຍໃຫ້ພວກເຮົາເບິ່ງເຫັນພາບລວມກ່ຽວກັບການພັດທະນາເສດຖະກິດສັງຄົມ ກໍຄືການຈັດ ຕັ້ງປະຕິບັດແຜນງົບປະມານຂອງພວກເຮົາມີ 5 ຈຸດຄື:

ຈຸດທີ 1) ເຫັນວ່າແຜນການພວກເຮົາຍັງບໍ່ທັນບຸກທະລຸແທ້, ພວກເຮົາຍັງກະຈຸກຢູ່ໃນໂຕເລກອັດຕາການຂະຫຍາຍຕົວຂອງຈີດີພີເປັນຫຼັກ, ພວກເຮົາຍັງບໍ່ທັນຂ້າມບຸກທະລຸຂອງການຂະຫຍາຍຕົວຢ່າງມີຄຸນນະພາບ, ການບຸກທະລຸໄປສູ່ການຂະຫຍາຍຕົວຂອງຈີດີພີຢ່າງມີຄຸນນະພາບຕ້ອງສ້າງວຽກເຮັດງານທຳ ແລະ ກະຈາຍຄວາມຮັ່ງມີໃຫ້ແກ່ປະຊາຊົນບັນດາເຜົ່າຢ່າງທົ່ວເຖິງ.

ຈຸດທີ 2) ເສດຖະກິດຂອງພວກເຮົາໃນປັດຈຸບັນ ຊຶ່ງສ່ວນຫຼາຍເປັນເສດຖະກິດນອກລະ ບົບມີຂະໜາດໃຫຍ່ກວ່າເສດ ຖະກິດໃນລະບົບ, ເສດຖະກິດນອກລະບົບໝາຍວ່າເສດຖະ ກິດຜະລິດເປັນສິນຄ້າ ຖ້າວ່າການຜະລິດເປັນສິນຄ້າຕ້ອງມີຄວາມຍືນຍົງ, ມີຕະຫຼາດຈຳ ໜ່າຍ ແຕ່ເສດຖະກິດປັດຈຸບັນ ເປັນເສດຖະກິດທຳມະຊາດ ກະແຈກກະຈາຍ ເພິ່ງຕົນເອງພໍໃຜ ລາວ ຊຶ່ງສະພາບແບບນີ້ ບໍ່ຄວນປ່ອຍປະໃຫ້ເປັນແບບນີ້ຕໍ່ໄປ.

ຈຸດທີ 3) ກົດໝາຍ ແລະ ລະບຽບການທາງດ້ານການຄ້າ, ການເງິນ, ພາສີ, ອາກອນ ຍັງມີອັນບໍ່ສອດຄ່ອງກັບພາກປະຕິບັດຕົວຈິງກໍຄືນິຕິກຳບໍ່ສອດຄ່ອງກັບພຶດຕິກຳ.

ຈຸດທີ 4) ບາງຂະແໜງ ການຂອງພາກລັດບໍ່ກຳໄດ້ ແລະ ບໍ່ເຂົ້າໃຈເຖິງກົນໄກເສດ ຖະກິດໃໝ່ ແລະ ການເຊື່ອມໂຍງກັບພາກພື້ນເຮັດໃຫ້ບໍ່ສາ ມາດອອກຂໍ້ກຳນົດ ອອກລະບຽບການໃນການຄຸ້ມຄອງສົ່ງເສີມ ຫຼື ຈຳກັດການເຄື່ອນໄຫວດຳ ເນີນທຸລະກິດຂອງນັກທຸລະກິດທັງພາຍໃນ ແລະ ຕ່າງປະເທດ.

ຈຸດທີ 5) ພວກເຮົາມີປະ ຫວັດ ຄວາມຊິນເຄີຍຕໍ່ການເພິ່ງພາການຊ່ວຍເຫຼືອຈາກພາຍນອກ, ມີແນວຄິດເອື່ອຍອີງ ຂໍການຊ່ວຍເຫຼືອສະຫຼຸບພວກເຮົາແມ່ນມີແນວຄິດເອື່ອຍອີງ ໃນຫ້າຈຸດດັ່ງກ່າວ ພວກເຮົາຈະຕ້ອງພ້ອມກັນຄົ້ນຄວ້າ ແລະ ແກ້ໄຂຊ່ວຍກັນ.

ທ່ານນາຍົກລັດຖະມົນຕີ ກ່າວອີກວ່າ: ເສດຖະກິດຂອງລາວເຮົາ ຍັງເປັນເສດຖະກິດຂະໜາດນ້ອຍ ແລະ ມີຄວາມບອບບາງໃນລະດັບສູງຕໍ່ສະ ພາບການປ່ຽນແປງຂອງພາຍນອກ, ມູນຄ່າ ຈີດີພີ ຂະໜາດນ້ອຍ, ຕະຫຼາດພາຍໃນຈຳ ກັດ, ມີການເອື່ອຍອີງໃສ່ບາງຂະແໜງການ ໂດຍສະເພາະແມ່ນເອື່ອຍອີງໃສ່ຂະແໜງຊັບ ພະຍາກອນທຳມະຊາດ ເປັນຫຼັກ, ແຕ່ການຜະລິດພາຍໃນຍັງມີໜ້ອຍ, ພ້ອມກັນນັ້ນກໍມີໜີ້ສິນຫຼາຍ, ມີຄວາມຈຳກັດດ້ານນະວັດຕະກຳໃນການສ້າງມູນຄ່າເພີ່ມ ແລະ ຄວາມສາມາດແຂ່ງຂັນຂອງພາກທຸລະກິດ ຍັງຈຳກັດ, ນີ້ຄືຄວາມຈິງທີ່ຜູ້ນຳ ຫຼື ຜູ້ກຳນະໂຍບາຍຕ້ອງຍອມຮັບໃຫ້ໄດ້ເຖິງສະພາບທີ່ເປັນຢູ່ ເພື່ອຊອກຫາວິທີທາງແກ້ໄຂໄປພ້ອມໆກັນ.

(ຂ່າວ+ພາບ: ຊຳນານ)

ຕ້ອງການລົງໂຄສະນາ ຄລິກເພື່ອເບິ່ງລາຍລະອຽດ

ສະໜັບສະໜູນໂດຍ:

ກຸ່ມບໍລິສັດພອນສັກ ຈຳກັດ

ຕ້ອງການລົງໂຄສະນາ ຄລິກເພື່ອເບິ່ງລາຍລະອຽດ