ຫົວ​ຂໍ້ : ອະນຸກຳມະການໂຄສະນາ ແລະ ຂະບວນການ ຄັ້ງທີ XI ຂອງພັກ ຊີ້ນຳວຽກງານຢູ່ສະຫວັນນະເຂດ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 17/01/2020 09:11:32 ຈຳ​ນວນ​ຜູ້​ເຂົ້າ​ຢ້ຽມ​ຊົມ 452 ຄັ້ງ

ອະນຸ​ກຳມະການ​ໂຄສະ ນາ ແລະ ຂະບວນ​ການ (ອຄຂ) ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ ຄັ້ງ​ທີ XI ຂອງ​ພັກ ນຳ​ໂດຍ​ທ່ານ  ໄຊ​ສົມ​ພອນ ພົມວິຫານ  ກຳມະການ​ກົມ​ການເມືອງ​ສູນ​ກາງ​ພັກ ປະທານ​ສູນ​ກາງ​ແນວ​ລາວ​ສ້າງ​ຊາດ (ສນຊ) ປະທານ ອຄຂ ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ ຄັ້ງ​ທີ XI ຂອງ​ພັກ ໄດ້​ເຂົ້າ​ຮ່ວມ​ກອງ​ປະຊຸມ​ພົບ​ປະ​ໂອ້​ລົມ​ຕໍ່​ອົງຄະ​ນະ​ພັກ​ແຂວງ, ອົງການ​ຈັດ​ຕັ້ງ​ມະຫາຊົນ, ສະຫະພັນ​ນັກຮົບ​ເກົ່າ​ແຂວງ​ສະຫວັນ​ນະ​ເຂດ  ເມື່ອ​ຕອນ​ເຊົ້າ​ຂອງ​ວັນ​ທີ 16 ມັງ​ກອນຜ່ານ​ມາ ທີ່​ຫ້ອງວ່າການ​ປົກຄອງ​ແຂວງ   ຊຶ່ງ​ມີ​ທ່ານ ສັນຕິພາບ ພົມວິຫານ ກຳມະການ​ສູນ​ກາງ​ພັກ ເລຂາ​ພັກ​ແຂວງ ເຈົ້າແຂວງ​ສະຫວັນ​ນະ​ເຂດ ພ້ອມ​ດ້ວຍ​ການຈັດຕັ້ງ​ທຸກ​ຂັ້ນ​ຂອງ​ແຂວງ​ເຂົ້າ​ຮ່ວມ​ຮັບ​ຟັງ.
ກ່ອນ​ອື່ນ, ທ່ານ ສັນຕິພາບ ພົມວິຫານ ໄດ້​ລາຍ​ງານ​ຜົນ​ການຈັດຕັ້ງ​ປະຕິບັດ​ແຜນ​ພັດ ທະນາ​ເສດ​ຖະ​ກິດ​-​ສັງຄົມ​ຂອງ​ແຂວງ ໃນ​ປີ 2019 ຜ່ານ​ມາ ໂດຍ​ຍົກ​ໃຫ້​ເຫັນ​ຜົນງານ 14 ວຽກ​ໃຫຍ່​ຄື: ວຽກ​ງານ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ, ການ​ພັດທະນາ​ຊົນນະບົດລຶບ ລ້າງ​ຄວາມທຸກ​ຍາກ, ດ້ານ ​ເສດຖະກິດ​ມະຫາ​ພາກ, ການ ຈັດຕັ້ງ​ການ​ລົງທຶນ​ຂອງລັດ, ແຜນ​ງົບປະມານ 2019, ການ​ປູກ​ພືດ ແລະ ລ້ຽງສັດ, ດ້ານອຸດ ​ສາ​ຫະ​ກຳ​-​ການ​ຄ້າ, ການ​ກໍ່ ສ້າງ​ພື້ນຖານ​ໂຄງ​ລ່າງ, ດ້ານວັດ ທະນະ​ທຳ​-​ສັງຄົມ, ການ​ສົ່ງ ເສີມ​ການທ່ອງທ່ຽວ, ຂົງເຂດ​ດ້ານ​ລັດ​-​ຍຸຕິ​ທຳ, ວຽກ​ງານ​ແນວ​ລາວ​ສ້າງ​ຊາດ, ອົງການ​ຈັດ​ຕັ້ງ​ມະຫາຊົນ, ວຽກ​ງານ​ກໍ່ສ້າງ​ພັກ​-​ພະນັກງານ ແລະ ການ​ຟື້ນ​ຟູ​ໄພພິບັດ​ຫຼັງ​ນ້ຳ​ຖ້ວມ.
ໃນ​ການ​ໂອ້​ລົມ​ກ່ອນ​ອື່ນ ທ່ານ ໄຊ​ສົມ​ພອນ ພົມວິຫານ   ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ​ຕໍ່​ຄວາມ​ພະ ຍາຍາມ,  ຄວາມ​ສູ້​ຊົນ​ຂອງ​ການ​ນຳ​ແຂວງທີ່​ໄດ້​ບຸກ​ບືນ​ສູ້​ຊົນ​ຈັດ​ຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ ຕິດ​ພັນ​ກັບ​ບັນດາ​ວຽກ​ງານ​ຂະແໜງການ​ຂອງ​ແຂວງ, ສູນ​ກາງດ້ວຍ​ຜົນສຳເລັດເຮັດ​ໃຫ້​ວຽກ​ງານ​ທຸກ​ດ້ານ​ໄດ້​ຮັບ​ການ​ພັດທະນາ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ຍົກ​ລະດັບ​ໄປ​ສູ່​ຄຸນ​ນະ​ພາບ​ທີ່​ດີ​ຂຶ້ນ, ພື້ນຖານ​ໂຄງ​ລ່າງ​ກໍ​ໄດ້​ຮັບ​ການ​ປັບປຸງ​ດີ​ຂຶ້ນ. ອັນ​ສຳຄັນ​ແມ່ນ​ຍັງ​ຮັກສາ​ໄດ້​ຄວາມ​ສະຫງົບ, ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ​ໂດຍ​ພື້ນ​ຖານ. ອີງໃສ່​ປີ 2020 ມີ​ຫຼາຍ​ວຽກ​ທີ່​ສຳຄັນ, ດັ່ງນັ້ນ ປະທານ ສນຊ ກໍ​ໄດ້​ໃຫ້​ທິດ​ຊີ້​ນຳ​ແກ່​ການ​ນຳ​ແຂວງ ຈົ່ງ​ນຳ ໄປ​ຄົ້ນຄວ້າ​ຈັດ​ຕັ້ງ​ປະຕິບັດໃຫ້​ ມີ​ຜົນສຳເລັດ, ໃນ​ນັ້ນໃຫ້​ສືບຕໍ່​ສູ້​ຊົນ​ຈັດ​ຕັ້ງ​ປະຕິບັດແຜນ​ພັດ ທະນາ​ເສດ​ຖະ​ກິດ​-​ສັງຄົມແຫ່ງ ​ຊາດ ປະຈຳ​ປີ 2020 ກໍຄື​ ຈັດ​ຕັ້ງ​ຜັນ​ຂະຫຍາຍ​ມະຕິ 9 ສະ ໄໝ​ທີ X ຂອງ​ພັກ​ເຮົາໃຫ້​ມີ​ຜົນ​ສຳ​ເລັດ. ສືບຕໍ່ຫັນພະນັກງານ​ລົງ​ກໍ່ສ້າງຮາກຖານ ​ການເມືອງຕິດ​ພັນ​ກັບ​ການພັດທະນາ​ຊົນນະ ບົດ​ລຶບລ້າງຄວາມທຸກຍາກ. ກະ ກຽມ​ຄວາມ​ພ້ອມດຳເນີນກອງ​ ປະຊຸມໃຫຍ່ 3 ຂັ້ນໃຫ້​ມີ​ຜົນ ສຳເລັດ, ເອົາໃຈໃສ່​ວຽກ​ງານ​ໂຄສະນາ  ແລະ  ຂະບວນ​ການ​ໃຫ້​ເປັນ​ຂະບວນ​ກວ້າງຂວາງ, ຈັດ​ຕັ້ງ​ໂຄສະນາ​ປາຖະກະຖາ​ມູນເຊື້ອ​ຂອງພັກ, ຂອງ​ຊາດ, ຂອງ​ອົງການ ສນຊ ແລະ ຂອງ​ອົງການ​ຈັດຕັ້ງມະຫາຊົນ​ໃຫ້​ກວ້າງຂວາງ​ມີ​ຜົນ​ສຳ​ເລັດ. ຖື​ສຳຄັນ​ການ​ເຕົ້າໂຮມ​ຄວາມ​ສາມັກຄີ​ບັນດາເຜົ່າ, ສຶກສາ​ອົບຮົມ​ປະຊາຊົນບັນດາເຜົ່າ, ຄົນ​ຮຸ່ນໜຸ່ມ​ໃຫ້​ເຂົ້າໃຈ​ແຈ້ງ​ທາງ​ດ້ານ​ແນວທາງ​ນະໂຍ ບາຍ​ຂອງ​ພັກ​ເຮົາ, ໃນ​ນັ້ນ ໃຫ້​ເອົາໃຈໃສ່​ວຽກ​ງານ​ສາສະໜາ ໂດຍ​ໃຫ້​ແຂວງ, ເມືອງ, ບ້ານເກັບ​ກຳ​ຂຶ້ນ ໂຕ​ເລກ​ສະຖິຕິ​ນັກບວດ, ສາ ສະໜາ​ຈານ, ນັກ​ສອນ​ສະພາ​ ຕ່າງໆ.
ຕອນ​ເຊົ້າ​ຂອງ​ວັນ​ດຽວ​ກັນ,  ກ່ອນ​ເຂົ້າ​ຮ່ວມ​ກອງ​ປະຊຸມທ່ານ  ໄຊ​ສົມ​ພອນ ພົມວິຫານ  ພ້ອມ​ຄະນະກໍ​ໄດ້​ໄປ​ວາງ​ກະຕ່າ​ດອກ​ໄມ້​ທີ່​ອະນຸສອນ​ສະຖານປະທານ ໄກສອນ ພົມວິຫານ ຂອງ​ແຂວງ ເພື່ອ​ສະແດງ​ຄວາມ​ຮູ້​ບຸນຄຸນ​ຂອງ​ການ​ນຳ​ຮຸ່ນ​ປັດຈຸບັນ​ຕໍ່ ທ່ານ​ປະທານ​ທີ່​ເປັນ​ຜູ້​ສ້າງຕັ້ງ​ກອງທັບ​ປະຊາຊົນ​ລາວ, ເປັນ​ຜູ້​ປະກາດ​ສ້າງຕັ້ງ​ພັກ ປປ ລາວ, ເປັນ​ຜູ້ນຳ​ພາ​ການ​ປະຕິວັດ​ຊາດ ປະຊາທິປະໄຕ ຈົນ​ຍາດ​ໄດ້​ອຳນາດ​ອະທິປະ​ໄຕ ແລະ ຜືນ​ແຜ່ນດິນ​ອັນ​ຄົບ​ຖ້ວນ​ມາສູ່​ປວງ​ຊົນ​ລາວ​ທັງ​ຊາດ ໃນ​ວັນ​ທີ 2 ທັນວາ 1975 ແລະ ເປັນ​ຜູ້​ລິ​ເລີ່ມ​ແນວທາງ​ປ່ຽນແປງ​ໃໝ່​ຮອບດ້ານ​ຢູ່​ປະເທດ​ເຮົາ ໃນ​ປີ 1986. 
(ລູກ​ເຂົ້າໜຽວ ລາຍ​ງານ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110