ຫົວ​ຂໍ້ : ລມຕ ກະຊວງຍຸຕິທຳຕ້ອນຮັບທູດອາເມຣິກາ ເຂົ້າຢ້ຽມອຳລາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 17/01/2020 09:15:29 ຈຳ​ນວນ​ຜູ້​ເຂົ້າ​ຢ້ຽມ​ຊົມ 462 ຄັ້ງ

     ທ່ານ ໄຊ​ສີ ສັນຕິ​ວົງ ລັດຖະມົນຕີ ກະຊວງຍຸຕິ​ທຳ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ​ອຳ​ລາ​ຂອງ​ທ່ານ​ ນາງ ​ເຣ​ນາ​ບິດ​ເຕີ ເອກ​ອັກ​ຄະ​ລັດ​ຖະ​ທູດ​ອາເມຣິກາ​ ປະຈຳ​ລາວ​ເມື່ອ​ວັນ​ທີ 15 ມັງກອນ​ ຜ່ານ​ມາ ທີ່​ກະຊວງ​ຍຸຕິ​ທຳ​ ໃນ​ໂອກາດ​ທີ່​ຈະ​ສຳເລັດ​ການ​ປະຕິບັດ​ໜ້າທີ່​ທາງ​ການ​ທູດ​ຢູ່​ລາວ​ໃນ​ເດືອນ​ມັງກອນ 2020.
     ໃນ​ໂອກາດ​ນີ້, ທ່ານ​ ໄຊ​ສີ ສັນ​ຕິ​ວົງ ກໍໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ຂອງ​ທ່ານ​ທູດ​ອາເມຣິກາ​ໃນ​ການ​ປະຕິບັດ​ໜ້າທີ່​ການ​ທູດ​ຢ່າງ​ຫ້າວຫັນ​ຢູ່ ສປປ​ ລາວ  ຊຶ່ງ​ເປັນ​ການ​ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ເສີມ​ສ້າງ​ສາຍ​ພົວພັນ​ມິດຕະພາບ​ອັນ​ດີງາມ​ລະຫວ່າງ​ສອງ​ປະເທດ​ລາວ​-​ອາເມຣິກາ​ໃຫ້​ມີ​ການ​ຂະຫຍາຍຕົວ​ຍິ່ງໆ ຂຶ້ນ ພ້ອມ​ນັ້ນ​ທ່ານ​ຍັງໄດ້​ ສະແດງ​ຄວາມ​ຂອບໃຈຕໍ່ລັດ ຖະບານ​ອາເມຣິກາ​ທີ່ໄດ້ໃຫ້ ການ​ສະໜັບສະໜູນ​ຊ່ວຍ ເຫຼືອລາວ​ໂດຍ​ສະເພາະ​ແມ່ນ​ກະຊວງ​ຍຸຕິ​ທຳ​ຂອງ​ລາວ​ໃນ​ການ​ສະໜັບສະໜູນ​ສ້າງ​ເວັບ​ໄຊ​ຈົດໝາຍເຫດ​ທາງ​ລັດ​ຖະ​ການ​ຂອງ​ກະຊວງ​ຍຸຕິ​ທຳ, ການ​ປັບປຸງ​ຮ່າງ​ກົດໝາຍ​ວ່າ​ດ້ວຍ​ການ​ແກ້​ໄຂ​ຂໍ້​ຂັດ​ແຍ່ງ​ທາງ​ດ້ານ​ເສດຖະກິດ​ ແລະ​ ອື່ນໆ​ອີກ​ເພື່ອ​ປະກອບສ່ວນ​ເຂົ້າ​ໃນ​ການ​ພັດທະນາ​ປະເທດ​ໃນ​ໄລຍະ​​ຜ່ານ​ມາ, ພ້ອມ​ທັງ​ອວຍພອນ​ໃຫ້​ທ່ານ​ທູດ​ຈົ່ງ​ເດີນທາງ​ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ ແລະ ​ປະສົບ​ຜົນສຳເລັດ​ໃນ​ໜ້າທີ່​ວຽກ​ງານ​ໃໝ່​ຂອງ​ທ່ານ.
     ໃນ​ໂອກາດ​ນີ້, ທ່ານ​ນາງ​ເຣ​ນາ​ບິດ​ເຕີ​ ກໍ​ໄດ້​ສະແດງ​ຄວາມ​ຂອບໃຈ​ມາ​ຍັງ​ທ່ານ​ ໄຊສີ  ສັນ​ຕິ​ວົງ  ທີ່​ອຳນວຍ​ຄວາມ​ສະດວກ​ດ້ານ​ຕ່າງໆ ໃຫ້​ແກ່​ການເຄື່ອນໄຫວ​ວຽກ​ງານ​ດ້ານ​ການ​ທູດ​ຈົນ​ປະສົບ​ຜົນສຳເລັດ​ຢ່າງ​ຈົບງາມ ແລະ ຢືນຢັນ​ວ່າ​ຈະ​ສືບຕໍ່​ຊຸກຍູ້​ການ​ພົວພັນ​ຮ່ວມ​ມື​ອັນ​ດີງາມ​ລະຫວ່າງ​ສອງ​ປະເທດ​ອາ​ເມ​ຣິ​ກາ​-​ລາວ​ໃຫ້​ມີ​ການ​ເຕີບ​ໃຫຍ່​ຂະຫຍາຍຕົວ ແລະ​ ໄດ້​ຮັບ​ຜົນສຳເລັດ​ຢ່າງ​ຕໍ່​ເນື່ອງ.
(ຂ່າວ​-​ພາບ: ພູ​ວັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110