ຫົວ​ຂໍ້ : ສອງອົງການກວດກາລາວ-ຫວຽດນາມ ຮັດແໜ້ນການຮ່ວມມື

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 17/01/2020 09:18:17 ຈຳ​ນວນ​ຜູ້​ເຂົ້າ​ຢ້ຽມ​ຊົມ 496 ຄັ້ງ

     ວັນ​ທີ 15 ມັງກອນ ຜ່ານ​ມາ ໄດ້​ມີ​ພິທີ​ພົບ​ປະ​ແລກປ່ຽນ​ບົດຮຽນ​ຂັ້ນ​ວິຊາ​ການ ກ່ຽວ​ກັບ​ວຽກ​ງານ​ກວດກາ​ລັດ, ການ​ແກ້​ໄຂ​ຄໍາ​ຮ້ອງ​-ຄໍາ​ສະເໜີ, ການ​ສະກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ລະຫວ່າງ ອົງການ​ກວດກາ​ລັດຖະບານ ສປປ ລາວ ກັບ ຄະນະ​ກວດກາ​ລັດ​ໂຮ່​ຈິ​ມິນ ສສ ຫວຽດນາມ ທີ່​ຫ້ອງ​ປະຊຸມ ຄະນະ​ກວດກາ​ສູນ​ກາງ​ພັກ ນະຄອນຫຼວງ​ວຽງ​ຈັນ, ຝ່າຍ​ລາວ ນຳ​ໂດຍ​ທ່ານ ທຸມ​ມີ ທໍາ​ມະ​ວົງ ຫົວໜ້າ​ຫ້ອງການ ອົງການ​ກວດກາ​ລັດຖະບານ ສປປ ລາວ ຝ່າຍ​ຄະນະ​ກວດກາ​ລັດ​ນະຄອນ​ໂຮ່​ຈິ​ມິນ ສສ ຫວຽດນາມ ນໍາ​ໂດຍ​ທ່ານ ເຈິ່ນ ດິ່ງ ຈື໊ ຮອງ​ຫົວໜ້າ​ຫ້ອງການ  ຫົວໜ້າ​ຄະນະ​ຜູ້​ແທນ ຄະນະ​ກວດກາ​ລັດ​ນະຄອນ​ໂຮ່​ຈິ​ມິນ ພ້ອມ​ດ້ວຍ​ຄະ​ນະ.
     ໂອກາດ​ນີ້ ທ່ານ ທຸມ​ມີ ທໍາ​ມະ​ວົງ ໄດ້​ກ່າວ​ຕ້ອນຮັບ ຄະນະ​ກວດກາ​ລັດ​ນະຄອນ​ໂຮ່​ຈິ​ມິນ ສສ ຫວຽດນາມ​ພ້ອມ​ທັງ​ຕີ​ລາຄາ​ສູງ​ການ​ມາ​ຢ້ຽມຢາມ ແລະ ເຮັດ​ວຽກ​ໃນ​ຄັ້ງ​ນີ້ ແມ່ນ​ມີ​ຄວາມ​ໝາຍ​ສໍາ​ຄັນເປັນຢ່າງຍິ່ງ ເປັນ​ການ​ປະ ກອບສ່ວນ​ທີ່​ສຳຄັນ​ໃນ​ການ​ເພີ່ມ​ພູນ​ຄູນ​ສ້າງ ແລະ ສືບຕໍ່​ຜັນ​ຂະຫຍາຍ​ມູນເຊື້ອ ການ​ພົວພັນ​ມິດຕະພາບ​ຮ່ວມ​ມື​ຮອບດ້ານ ແລະ ຄວາມ​ສາມັກຄີ​ແບບ​ພິເສດ ລະຫວ່າງ​ສອງ​ພັກ, ສອງ​ລັດ, ປະຊາຊົນ 2 ຊາດ ລາວ​-​ຫວຽດນາມ, ຫວຽດນາມ-​ລາວ ໂດຍ​ສະ ເພາະແມ່ນ​ການ​ປະຕິບັດ​ບົດ​ບັນທຶກການພົວພັນ​ຮ່ວມ​ມື​ລະຫວ່າງ 2 ອົງການ​ກວດກາ ຂອງ 2 ພັກ 2 ລັດ ໃຫ້​ນັບ​ມື້​ກ້າວ​ສູ່​ລວງ​ເລິກ ພ້ອມ​ຂະຫຍາຍ​ເນື້ອ​ໃນ​ລົງ​ສູ່​ຂະແໜງການ​ກວດກາ​ຢູ່​ທ້ອງຖິ່ນ, ໂດຍ​ສະເພາະ​ແມ່ນ​ສົ່ງເສີມ​ໃຫ້​ບັນດາ​ແຂວງ​ທີ່​ມີ​ຊາຍ​ແດນ​ຕິດ​ຈອດ​ກັນ​ໄດ້​ໄປມາຫາສູ່​ແລກປ່ຽນ​ບົດຮຽນ​ຊຶ່ງ​ກັນ ແລະ ກັນ​ກ່ຽວ​ກັບ​ວຽກ​ງານ​ກວດກາ​ລັດ, ການ​ແກ້​ໄຂ​ຄໍາ​ຮ້ອງ​-ຄໍາ​ສະເໜີ, ການ​ສະກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ. ການ​ພົບ​ປະ​ແລກປ່ຽນ​ບົດຮຽນ​ຄັ້ງ​ນີ້ ທັງ​ສອງ​ຝ່າຍ​ໄດ້​​ຜັດ​ປ່ຽນ​ກັນ​ແຈ້ງ​ສະພາບ​ການຈັດຕັ້ງ​ປະຕິບັດ​ວຽກ​ງານ​ກ່ຽວ​ກັບ​ວຽກ​ງານ​ກວດກາ​ລັດ, ການ​ແກ້​ໄຂ​ຄໍາ​ຮ້ອງ​-ຄໍາ​ສະເໜີ, ການ​ສະກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ຈາກ​ນັ້ນ, ຕັ້​ງຄໍາ​ຖາມ​ເຈາະ​ຈີ້ມ​ບາງ​ບັນຫາ ທີ່​ຕ່າງ​ຝ່າຍ​ຕ່າງ​ໃຫ້​ຄວາມ​ສົນໃຈ ພ້ອມ​ທັງ​ສະເໜີຄວາມ​ຫຍຸ້ງຍາກ​ໃນ​ການ​ແກ້​ໄຂ​ວຽກ​ງານ​ດັ່ງກ່າວ ແລະ ວຽກ​ງານ​ຈຸດ​ສຸມ​ໃນ​ຕໍ່​ໜ້າ. ໂດຍ​ສະເພາະ​ຝ່າຍ​ລາວ ໄດ້​ຍົກ​ໃຫ້​ເຫັນ​ສະພາບ​ພາຍ​ໃນ​ປະເທດ​ໃນ​ໄລຍະ​ທີ່​ຜ່ານ​ມາ ແມ່ນ​ໄດ້​ພົບ​ກັບ​ສິ່ງ​ທ້າ​ທາຍ​ຫຼາຍ​ປະການ ແຕ່​ກໍ່​ຍັງ​ສືບຕໍ່​ມີ​ສະຖຽນ​ລະ​ພາບ​ທາງ​ດ້ານ​ການເມືອງ, ສັງຄົມ​ມີ​ຄວາມ​ສະຫງົບ ແລະ ເປັນ​ລະບຽບ​ຮຽບຮ້ອຍ​ໂດຍ​ພື້ນຖານ, ການ​ພັດທະນາ​ເສດ​ຖະ​ກິດ​-​ສັງຄົມ​ບັນລຸ​ຕາມ​ແຜນການ ແລະ ຄາດໝາຍ​ທີ່​ວາງ​ໄວ້​ເປັນ​ສ່ວນ​ຫຼາຍ, ລັດຖະບານ​ໄດ້​ມີ​ມາດ​ຕະການ​ຕົວ​ຈິງ ໃນ​ການ​ເກັບ​ລາຍ​ຮັບ ແລະ ຄຸ້ມ​ຄອງ​ລາຍ​ຈ່າຍ ແກ້​ໄຂ​ຄວາມ​ຫຍຸ້ງຍາກ​ທາງ​ດ້ານ​ການ​ເງິນ​-​ງົບປະມານ, ຊຳລະ​ຊະ​ສາງ​ໜີ້​ສິນ​ໂຄງການ​ລົງທຶນ​ຂອງ​ລັດ; ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ປັບປຸງ​ດີ​ຂຶ້ນ, ອັດຕາ​ຄວາມທຸກ​ຍາກ​ສືບຕໍ່​ຫຼຸດ​ລົງ, ອັດຕາ​ເຕີບ​ໂຕ​ຂອງ​ເສດຖະກິດ​ຂະຫຍາຍຕົວ​ຢ່າງ​ຕໍ່​ເນື່ອງ ໃນ​ລະດັບ 6,4%; ສະເລ່ຍ​ຕໍ່​ຫົວ​ຄົນ 2.683 ໂດ​ລາ; ການ​ຄຸ້ມ​ຄອງ​ບໍລິຫານ​ລັດ​ດ້ວຍ​ກົດໝາຍ​ໃນ​ຫຼາຍ​ຂະແໜງການ​ໄດ້​ຮັບ​ການ​ປັບປຸງ​ດີ​ຂຶ້ນ. ຈາກ​ນັ້ນ, ທ່ານ ເຈິ່ນ ດິ່ງ ຈື໊ ກໍໄດ້​ແຈ້ງ​ສະພາບ ກ່ຽວ​ກັບ​ວຽກ​ງານ​ກວດກາ​ລັດ, ການ​ແກ້​ໄຂ​ຄໍາ​ຮ້ອງ​-ຄໍາ​ສະເໜີ, ການ​ສະກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ສສ ຫວຽດນາມ ໃຫ້​ຝ່າຍ​ລາວ​ຊາບ.
     ໃນ​ໂອກາດ​ທີ່​ມາ​ຢຽມ​ຢາມ ແລະ ແລກ​ປ່ຽນ​ບົດຮຽນ​ກ່ຽວ​ກັບວຽກ​ງານ​ກວດກາ​ລັດ, ການ​ແກ້​ໄຂ​ຄໍາ​ຮ້ອງ​-ຄໍາ​ສະເໜີ, ການ​ສະກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ຢູ່ ສປປ ລາວ ທ່ານ ທຸມ​ມີ ທໍາ​ມະ​ວົງ ກໍ່​ໄດ້​ອວຍພອນ​ໃຫ້​ທ່ານ ເຈິ່ນ ດິ່ງ ຈື໊ ພ້ອມ​ດ້ວຍ​ຄະນະ​ຈົ່ງ​ມີ​ສຸຂະພາບ​ເຂັ້ມແຂງ, ປະສົບ​ຜົນ​ສໍາ​ເລັດ​ໃນ​ການ​ມາ​ຢ້ຽມຢາມ ເຮັດ​ວຽກ​ໃນ​ຄັ້ງ​ນີ້ ແລະ ໜ້າທີ່​ວຽກ​ງານ​ອັນ​ມີ​ກຽດ​ຂອງ​ຕົນ. ພ້ອມ​ທັງ​ອວຍພອນ​ໃຫ້​ສາຍ​ພົວພັນ ມິດຕະພາບຮ່ວມ​ມື​ຮອບດ້ານ ແລະ ຄວາມ​ສາມັກຄີ​ແບບ​ພິເສດ ລະຫວ່າງ​ສອງ​ພັກ ສອງ​ລັດ, ປະຊາຊົນ 2 ຊາດ ລາວ​-​ຫວຽດນາມ, ຫວຽດນາມ​-​ລາວ ທີ່​ມີ​ມູນເຊື້ອ  ໂດຍ​ສະເພາະ​ການ​ຮ່ວ​ມື​ໃນ​ຂົງເຂດ​ວຽກ​ງານກວດກາ​ລັດ ໃຫ້ແຕກ​ດອກ​ອອກ​ຜົນ​ຍິ່ງໆ​ຂຶ້ນ​ໄປ.
(ຂ່າວ: ກວດກາ​ສູນ​ກາງ, ພາບ: ບຸນ​ຕ່ອມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110