ຫົວ​ຂໍ້ : ຜູ້ນຳ ຫວຽດນາມ ສຸມໃສ່ຄຸ້ມຄອງເສດຖະກິດ ໃຫ້ສຳເລັດຜົນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 17/01/2020 09:24:57 ຈຳ​ນວນ​ຜູ້​ເຂົ້າ​ຢ້ຽມ​ຊົມ 417 ຄັ້ງ

     ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ປະທານ​ປະເທດ​ຫວຽດນາມ ໄດ້​ສະເໜີ​ວ່າ: ປີ 2020, ສືບຕໍ່​ສຸມ​ໃສ່​ຍູ້​ແຮງ​ການ​ສ້າງ​ລະບອບ​ລະບຽບ​ການ​ກ່ຽວ​ກັບ​ການ​ຄຸ້ມ​ຄອງ​ເສດ ຖະກິດ - ສັງຄົມ ແລະ ການ​ປ້ອງ​ກັນ, ຕ້ານ​ການ​ສໍ້​ລາດ​ບັງ​ຫຼວງ​ໃຫ້​ສຳ​ເລັດ.
     ຂ່າວ​ລາຍ​ງານ​ວ່າ: ວັນ​ທີ 15 ມັງກອນ​ຜ່ານ​ມາ, ຢູ່​ຮ່າ​ໂນ້ຍ, ຄະນະ​ຊີ້​ນຳ​ສູນ​ກາງ​ກ່ຽວ ກັບ​ການ ປ້ອງ​ກັນ, ຕ້ານ​ການ​ສໍ້​ລາດ​ບັງ​ຫຼວງ ໄດ້​ຈັດ​ຕັ້ງ​ກອງ​ປະຊຸມ​ເທື່ອ​ທີ 17 ພາຍ​ໃຕ້​ການ​ເປັນ​ປະທານຂອງ ທ່ານ ຫ​ງວຽນ​ຝູ​ຈ້ອງ ເລຂາທິການ​ໃຫຍ່ ປະທານ​ປະເທດ​ຫວຽດ ນາມ, ເພື່ອ​ກວດກາ, ຕີ​ລາຄາ​ໝາກ ຜົນ​ແຫ່ງ ການເຄື່ອນໄຫວ​ໃນ​ປີ 2019; ປຶກສາ​ຫາລື, ປະກອບ​ຄຳ​ເຫັນ​ກ່ຽວ​ກັບ​ທິດ​ທາງ, ໜ້າທີ່​ຈຸດສຸມ​ວຽກ​ງານ​ປີ 2020. 
     ຂ່າວ​ລະບຸ​ວ່າ: ໃນ​ວາ​ລະດໍາເນີນ​ກອງ​ປະຊຸມ, ທ່ານ ຫ​ງວຽນ​ຝູ​ຈ້ອງ ເນັ້ນ​ໜັກ​ວ່າ: ປີ 2020 ແມ່ນ​ປີ​ທີ່​ມີ​ຫຼາຍ​ເຫດການ​ໃຫຍ່​ຂອງ​ປະເທດ​ຊາດ, ພິເສດ​ແມ່ນ​ດຳເນີນ​ກອງ ປະຊຸມ​ໃຫຍ່​ອົງຄະ​ນະ​ພັກ ທຸກ​ຂັ້ນ, ກ້າວ​ໄປ​ເຖິງ​ກອງ​ປະຊຸມ​ໃຫຍ່​ຄັ້ງ​ທີ 13 ຂອງ​ພັກ​ກອມ​ມູ​ນິດ​ຫວຽດນາມ. ຈັດ​ຕັ້ງ​ກອງ ປະຊຸມໃຫຍ່​ເປັນ​ຢ່າງ​ດີ​ທີ່​ສຸດ, ການ​ປ້ອງ​ກັນ​ຕ້ານ​ການ​ສໍ້​ລາດ​ບັງ​ຫຼວງ​ກໍ່​ດີ. ການ​ປ້ອງ​ກັນ​ຕ້ານ​ການ​ສໍ້​ລາດບັງ​ຫຼວງດີ, ການ​ເລືອກ​ເອົາ​ບຸກ​ຄະລາ​ກອນ​ດີ, ກອງ​ປະຊຸມ​ໃຫຍ່​ຈະ​ປະສົບ​ຜົນ​ສໍາ​ເລັດ​ຢ່າງ​ຈົບ​ງາມ. ຕ້ອງ​ສືບຕໍ່ ເສີມ​ຂະຫຍາຍ​ໝາກຜົນ​ຂອງ​ປີ 2019 ຢ່າງ​ບໍ່​ຢຸດ​ຢັ້ງ.
     ພ້ອມ​ກັນ​ນັ້ນ, ທ່ານ ຫ​ງວຽນ​ຝູ​ຈ້ອງ ໄດ້​ສະເໜີ​ວ່າ: ປີ 2020, ສືບຕໍ່​ສຸມ​ໃສ່​ຍູ້​ແຮງ​ການ​ສ້າງ​ລະບອບລະບຽບການ​ກ່ຽວ​ກັບ​ການ​ຄຸ້ມ​ຄອງ​ເສດຖະກິດ - ສັງຄົມ ແລະ ການ​ປ້ອງ ກັນ, ຕ້ານ​ການ​ສໍ້​ລາດ​ບັງຫຼວງ​ໃຫ້​ສຳເລັດ; ສືບຕໍ່​ຄົ້ນຄວ້າ, ສະເໜີ​ບັນດາ​ແຜນ​ນະໂຍບາຍ, ການ​ກຳນົດ​ທິດ​ໃຫຍ່​ກ່ຽວກັບ​ການ ປ້ອງ​ກັນ, ຕ້ານ​ການ​ສໍ້​ລາດ​ບັງ​ຫຼວງ​ທີ່​ລະບຸ​ໃນ​ບັນດາ​ຮ່າງ​ເອກະສານ​ກອງ​ປະຊຸມ​ໃຫຍ່​ຄັ້ງ​ທີ 13 ຂອງ​ພັກ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110