ຫົວ​ຂໍ້ : ສະກຸນເງິນໃນອາຊີແຂງຄ່າສົ່ງຜົນລົບຕໍ່ການສົ່ງອອກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 17/01/2020 09:26:50 ຈຳ​ນວນ​ຜູ້​ເຂົ້າ​ຢ້ຽມ​ຊົມ 419 ຄັ້ງ

    ສະກຸນ​ເງິນ​ໃນ​ອາຊີ​ສ່ວນ​ໃຫຍ່​ແຂງ​ຄ່າ​ນັບ​ຕັ້ງແຕ່​ທ້າຍ​ປີ​ທີ່​ຜ່ານ​ມາ ແລະ ຄາດ​ວ່າ ປີ 2020, ຄ່າ​ເງິນ​ໃນ​ອາຊີ ຈະແຂງ​ ຄ່າ​ຂຶ້ນ ຈາກ​ປັດ​ໄຈ​ໜູນ​ຫຼັກໆ ​ຄື: ຄວາມ​ສ່ຽງ​ທາງ​ດ້ານ​ເສດ ຖະກິດ​ໂລກ ເລີ່ມ​ຫຼຸດ ລົງ​ຄວາມ ​ຂັດ​ແຍ້ງ​ທາງ​ດ້ານ​ການ​ຄ້າລະ ຫວ່າງ ອາ​ເມ​ຣິ​ກາ​-​ຈີນ ມີ​ທ່າ​ ອ່ຽງ​ດີ​ຂຶ້ນ, ເຮັດ​ໃຫ້​ຄວາມ​ເຊື່ອ​ໝັ້ນນັກ​ລົງທຶນ​ກັບ​ຄືນ​ມາ. 
    ສະກຸນ​ເງິນ​ຕ່າງໆ​ຂອງ​ບັນດາ​ປະເທດ​ໃນ​ພາກ​ພື້ນ​ອາຊີ​ທີ່​ແຂງ​ຄ່າ​ຂຶ້ນ ເມື່ອ​ທຽບ​ກັບ​ສະກຸນ​ເງິນ​ໂດລາ ອາດຈະ​ສົ່ງ​ຜົນ​ເສຍ​ຕໍ່​ການ​ສົ່ງ​ອອກ​ຂອງ​ອາຊີ, ເຮັດ​ໃຫ້​ບໍລິສັດ​ສົ່ງ​ອອກ​ໃນ​ອາຊີ​ມີ​ກໍາ​ໄລ​ຫຼຸດ​ລົງ ຈາກ ການ ສົ່ງ​ສິນຄ້າ​ໄປ​ຂາຍ​ໃນ​ຕະ ຫຼາດ​ໂລກ. ສະກຸນ​ເງິນ​ຫຼາຍ​ປະເທດ​ໃນ​ອາຊີ ມີຄ່າ​ສູງ​ຂຶ້ນ ເມື່ອ​ທຽບໃສ່​ເງິນ ໂດ​ລາ ນັບ​ຕັ້ງແຕ່​ທ້າຍ​ປີ 2019 ເປັນຕົ້ນ​ມາ ລວມ​ເຖິງ​ເງິນ​ເຢນ​ຂອງ​ຍີ່ປຸ່ນ, ເງິນ​ຣິງ​ກິດ​ຂອງ​ມາ​ເລ​ເຊຍ, ເງິນ​ຣູ​ເປຍ​ຂອງ​ອິນ​ໂດ​ເນ​ເຊຍ, ເງິນ​ໂດ​ລາ​ສິງກະໂປ ແລະ ເງິນ​ບາດ​ໄທ. ສາເຫດ​ໜຶ່ງ​ທີ່​ເຮັດ​ໃຫ້​ຄ່າ ເງິນ​ຕ່າງໆ ໃນ​ອາຊີ ແຂງ​ຄ່າ​ຂຶ້ນ​ນັ້ນ ເປັນ​ເພາະ​ເສດຖະກິດ​ຂອງ​ຫຼາຍ​ປະເທດ​ໃນ​ອາຊີ ຟື້ນ​ຕົວຢ່າງ​ເຂັ້ມແຂງ ຈາກ​ວິ​ກິດ​ເສດຖະກິດ​ໂລກ. ຂະນະ​ດຽວ​ກັນ, ປະເທດ​ທີ່​ພັດທະນາ​ເຊັ່ນ: ອາ​ເມ​ຣິ​ກາ ແລະ ຫຼາຍ ປະເທດ ໃນ​ເອີ​ຣົບ ຍັງ​ຄົງ​ປະສົບ​ກັບ​ບັນຫາ​ເສດຖະກິດ​ຟື້ນ​ຕົວ​ຊ້າ.
     ສະເພາະ​ອາຊີ​ຕາເວັນ​ອອກ​ສ່ຽງ​ໃຕ້, ໃນ​ໄລຍະ​ນີ້​ມີ​ເງິນ​ທຶນ​ໄຫຼ​ເຂົ້າ​ມາ​ຢ່າງ​ຫຼວງ​ຫຼາຍ. ຂະນະ​ທີ່​ຜົນ ຜະລິດ ໂດຍ​ລວມ​ເພີ່ມ​ສູງ​ຂຶ້ນ​ຢ່າງ​ວ່ອງ​ໄວ. ຢ່າງໃດ​ກໍ​ຕາມ, ນັກ​ເສດຖະສາດ​ຫຼາຍຄົນ​ໄດ້​ກ່າວ​ເຕືອນ​ວ່າ: ການ​ທີ່​ສະກຸນ​ເງິນ​ໃນ​ອາຊີ​ແຂງ​ຄ່າ​ຂຶ້ນ ກຳລັງ​ສົ່ງ​ຜົນ​ທາງ​ດ້ານ​ລົບ​ຕໍ່​ພາກ​ການ​ສົ່ງ​ອອກ​ຂອງ​ອາຊີ ເນື່ອງຈາກ​ທີ່​ຜ່ານ​ມາ​ຫຼາຍ​ປະເທດ​ໃນ​ອາຊີ ອາໄສ​ການ​ສົ່ງ​ອອກ​ເປັນ​ຫຼັກ​ໃນ​ການ​ກະ​ຕຸ້ນ​ການຈະເລີນ​ເຕີບ​ໂຕ ເສດຖະກິດ, ອາໄສ​ຄວາມ​ໄດ້​ປຽບ​ຈາກ​ອັດຕາການ​ ແລກປ່ຽນ​ທີ່​ຕ່ຳ​ກວ່າ. ຂໍ້​ໄດ້​ປຽບ​ທີ່​ກ່າວ​ມາ​ນັ້ນ, ກໍາ​ລັງຈະ​ສູນຫາຍ​ໄປ ເພາະວ່າ​ຄ່າ​ເງິນ​ທີ່​ແຂງ​ຂຶ້ນ ໄດ້​ສົ່ງ​ຜົນ​ໃຫ້​ສິນຄ້າ​ທີ່​ສົ່ງ​ໄປ​ຂາຍ​ຕ່າງປະເທດ ມີ​ລາຄາສູງຂຶ້ນ, ປະກອບ​ກັບ  ​ການ​ຕະຫຼາດ​ທີ່​ສຳຄັນ​ຄື: ປະ ເທດ​ທີ່​ພັດທະນາ​ແລ້ວ ຍັງບໍ່​ ຟື້ນ​ໂຕ​ເຕັມ​ສ່ວນ, ບັນຫາ​ຂອງ ບັນດາຜູ້​ສົ່ງ​ອອກ ຈຶ່ງເລີ່ມປະ ກົດ​ຂຶ້ນ​ຢ່າງ​ຊັດ​ເຈນ.
ນັກ​ເສດຖະສາດ​ມີ​ຄວາມ​ເຫັນ​ພ້ອມ​ກັນ​ວ່າ: ປະເທດ​ຕ່າງໆ ໃນ​ອາຊີ ຈະ​ປະ​ເຊີນກັບ​ ການ​ແຂ່ງຂັນ​ທີ່​ຮຸນ​ແຮງ​ຂຶ້ນ ແລະ ຖ້າ​ຫາກ​ອັດຕາ​ແລກປ່ຽນ​ຍັງ​ຄົງ​ສູງ​ແບບ​ນີ້​ໄປ​ເລື້ອຍໆ ຈະ​ເຮັດ​ໃຫ້​ເກີດ​ບັນຫາໃຫຍ່​ຕໍ່ ຜູ້​ສົ່ງ​ອອກ​ໄດ້. ທະນາຄານ​ແຫ່ງ​ປະເທດ​ໄທ​ລະບຸ​ວ່າ: ການ​ໄຫຼ​ເຂົ້າຂອງ​ເງິນ​ທຶນ ແມ່ນ​ປັດ​ໄຈ​ສຳຄັນ​ທີ່​ເຮັດໃຫ້​ຄ່າ​ເງິນ​ບາດ​ແຂງ​ຄ່າ​ຂຶ້ນ ເມື່ອ​ທຽບ​ກັບ​ເງິນ​ໂດ​ລາ ແລະ ພາກ​ການ​ສົ່ງ                                                      ​ອອກ​ຂອງ​ໄທ​ກໍ​ຈະຫົດໂຕລົງ ຫຼັງ​ຈາກ​ທີ່​ເຕີບ​ໂຕ​ຢ່າງ​ຕໍ່​ເນື່ອງ. ບັນດາ​ນັກ​ເສດຖະສາດ​ສ່ວນ​ໃຫຍ່​ໄດ້​ຄາດ​ຄະເນ​ວ່າ: ພາກ​ການສົ່ງອອກ​ຂອງ​ຫຼາຍ​ປະ                                             ເທດ​ໃນ​ອາຊີ ທີ່​ສະກຸນ​ເງິນ​ແຂງ​ຄ່າຕ້ອງ​ພົບ​ກັບ​ບັນຫາ​ຂອງ ຜົນ​ກຳໄລ​ຫຼຸດລົງ​ໃນ​ໄລຍະ​ບໍ່​ເທົ່າໃດ​ເດືອນ​ຂ້າງ​ໜ້າ, ຈາກ​ນັ້ນ​ອາດ​ຈະ​ພົບ​ກັບ​ບັນຫາ​ການ​ ວ່າງ​ງານ ແລະ ອັດຕາ​ການ ຈະເລີນ​ເຕີບໂຕ​ທີ່​ອາດ​ຈະ​ຫຼຸດ​ລົງ​ທົ່ວ​ອາ​ຊີ. ສ່ວນ​ເງິນ​ຢວນ​ຂອງ​ຈີນ ທີ່​ມີ​ທ່າ​ອ່ຽງ​ແຂງ​ຄ່າ​ຂຶ້ນອາດ​ຈະ​ເຮັດໃຫ້ຄ່າ​ເງິນ​ໃນ​ພາກ​ພື້ນ​ໂດຍ​ລວມ​ແຂງ​ຄ່າ​ຂຶ້ນ, ເນື່ອງ​ຈາກ​ສົງຄາມ​ການ​ຄ້າ ລະຫວ່າງ ອາ​ເມ​ຣິ​ກາ ແລະ ຈີນ ມີ​ທ່າ​ອ່ຽງ​ຫຼຸດ​ລົງ ຄວາມ​ເຊື່ອ​ໝັ້ນ​ຂອງ​ນັກ​ລົງທຶນ​ໃນ​ລະດັບ​ໂລກ​ປັບ​ຕົວ​ດີ​ຂຶ້ນ ຈຶ່ງ​ເຮັດ​ໃຫ້​ເງິນ​ຢວນ ມີ​ທ່າ​ອ່ຽງ​ແຂງ​ຄ່າ​ຂຶ້ນ.
ປັດ​ໄຈ​ສ່ຽງ​ທາງ​ດ້ານ​ເສດ ຖະກິດ​ທົ່ວ​ໂລກ​ຫຼຸດ​ລົງ, ເຮັດ​ໃຫ້​ທ່າ​ອ່ຽງ​ເງິນ​ທຶນ​ເຄື່ອນ​ຍ້າຍ ໄຫຼ​ກັບເຂົ້າ​ສູ່ຕະຫຼາດ​ເກີດ​ໃໝ່​ໃນ​ອາ​ຊີ. ຂະນະ​ທີ່​ກໍລະນີ ອັງກິດ ຖອນ​ອອກ​ຈາກ​ສະຫະພາບ​ເອີ​ຣົບ, ພາຍຫຼັງ​ພັກ ອະນຸ​ຮັກ ນິຍົມ​ຊະນະ​ການ​ເລືອກ​ຕັ້ງ ເຮັດ​ໃຫ້​ຄວາມ​ສ່ຽງ​ຕໍ່​ເສດຖະກິດ​ໂລກ ໃນ​ປີ 2020 ຫຼຸດ​ລົງ, ຄວາມ ເຊື່ອ​ໝັ້ນ​ນັກ​ລົງທຶນ​ຈຶ່ງ​ເພີ່ມ​ຂຶ້ນ ແລະ ມີ​ເງິນ​ທຶນ​ໄຫຼ​ເຂົ້າ​ສູ່​ເສດຖະກິດ​ຕະຫຼາດ​ເກີດ​ໃໝ່.
    ສິງກະໂປ ຮັບ​ມື​ກັບ​ບັນຫາ​ເງິນ​ໂດ​ລາ​ສິງກະໂປ​ແຂງ​ຄ່າ​ດ້ວຍ​ການ​ດຳເນີນ​ມາດ​ຕະການ​ ການ​ຜ່ອນຄາຍ​ນະໂຍບາຍ​ທາງ​ການ​ເງິນ ຖື​ວ່າ​ເປັນ​ການ​ຫຼຸດ​ຄ່າ​ເງິນ​ໂດ​ລາ​ສິງກະໂປ ເປັນ​ຄັ້ງ​ທຳອິດ​ໃນ​ຮອບ 3 ປີ, ສົ່ງ​ຜົນ​ໃຫ້​ຄ່າ​ເງິນ​ໂດ​ລາ ຢູ່​ທີ່ 1 ໂດ​ລາ​ຕໍ່ 1,37 ໂດ​ລາ​ສິງ​ກະ​ໂປ. ສິງກະໂປ​ໃຊ້​ລະບົບ​ກະ​ຕຸ້ນ​ຄ່າ​ເງິນ ເພື່ອ​ກຳນົດ​ອັດຕາ​ແລກປ່ຽນ ຊຶ່ງ​ເປັນ​ເຄື່ອງມື​ຫຼັກ​ໃນ​ການ​ສ້າງ​ຄວາມ​ສົມ​ດູນ ລະຫວ່າງ ອັດຕາ​ເງິນ ເຟີ້​ຈາກ​ຕ່າງປະເທດ ແລະ ການ​ເຕີບ​ໂຕ​ທາງ​ດ້ານ​ເສດ​ຖະ​ກິດ. ການ​ເຮັດ​ໃຫ້​ສະກຸນເງິນ​ອ່ອນ​ຄ່າລົງ​ ຈະຊ່ວຍສົ່ງເສີມ​​ໃນ​ການ​ແຂ່ງຂັນ​ຂອງ​ທຸລະ​ກິດ​ພາຍ​ໃນ​ປະເທດ, ເນື່ອງ​ຈາກ​ສິນ ຄ້າ​ນໍາ​ເຂົ້າ ຈະ​ມີ​ລາຄາ​ສູງ​ຂຶ້ນ. ຂະນະ​ດຽວ​ກັນ ກໍ​ເພີ່ມ​ຄວາມ​ຕ້ອງການ​ຂອງ​ສິນຄ້າ ແລະ ການ​ບໍລິການ ໃນ​ສິງກະໂປ ຫຼາຍ​ຂຶ້ນ​ອີກ​ດ້ວຍ ຊຶ່ງ​ຈະ​ສົ່ງ​ຜົນ​ດີ​ຕໍ່​ທຸລະ​ກິດ​ການທ່ອງທ່ຽວ​ຂອງ​ສິງ​ກະ​ໂປ.
    ທະນາຄານ​ກາງຂອງ​ສິງກະໂປ ​ໄດ້​ຄາດ​ຄະເນ​ວ່າ: ປີ​ນີ້ ການ​ເຕີບ​ໂຕ​ທາງ​ດ້ານ​ເສດຖະກິດຂອງປະເທດ​ຈະ​ດີ​ຂຶ້ນ​ໃນ​ລະດັບ​ປານ​ກາງ. ເຖິງ​ວ່າ​ລະດັບ​ຂອງ​ພາກ​ການ​ຜະ ລິດ​ພາຍໃນ​ປະເທດ​ຈະ​ຍັງ​ຕໍ່າ ກວ່າ. ຂະນະ​ທີ່​ບົດ​ລາຍ​ງານ​ການ​ວິເຄາະ​ຈາກທະນາຄານ​ຣາ​ໂບ​ແບັງ ໄດ້​ຄາດ​ຄະເນ​ວ່າ: ສະກຸນ​ເງິນ​ຣູ​ປີ ຂອງ​ອິນ​ເດຍ ຈະ​ເປັນ​ສະກຸນ​ເງິນ​ອາຊີ​ທີ່​ປັບ​ຕົວ​ດີ​ທີ່​ສຸດ​ໃນ​ປີ​ນີ້. ສ່ວນ​ທາງ​ດ້ານ​ນັກ​ວິເຄາະ​ຈາກ​ຫຼາຍ ສຳນັກ​ໄດ້​ຄາດ​ຄະເນ​ວ່າ: ເງິນ​ຣູ​ປີ ຈະ​ຍັງ​ຄົງ​ອ່ອນ​ຄ່າ​ລົງ​ຕໍ່​ໄປ. ທ່ານ ຮິ​ວ​ໂກ ເອີ​ເຄນ ຫົວໜ້າ​ນັກ​ເສດ​ຖະສາດ​ສາກົນ​ຂອງ​ທະນາ ຄານ ຣາ​ໂບ​ແບັງ ຊີ້​ໃຫ້​ເຫັນ​ວ່າ: ເສດຖະກິດ​ຂອງ​ອິນ​ເດຍ ໄດ້​ຜ່ານ​ພົ້ນ​ໄລຍະ ຮ້າຍ ແຮງ​ທີ່​ສຸດ​ແລ້ວ ຊຶ່ງ​ເຈົ້າ​ໜ້າທີ່​ຂອງ​ອິນ​ເດຍ ບໍ່​ໄດ້​ມີ​ທ່າ​ອ່ຽງ​ທີ່​ຈະ​ໃຊ້​ການ​ອ່ອນ​ຄ່າ​ຂອງ​ເງິນ​ຣູ​ປີ ເພື່ອຊຸກ ຍູ້​ການຂະຫຍາຍຕົວ​ທາງ​ດ້ານ​ເສດ​ຖະ​ກິດ. ທ່ານ ເອີ​ເຄນ ກ່າວ​ຕື່ມ​ວ່າ: ເສດຖະກິດ​ອິນ​ເດຍ ໄດ້​ປະເຊີນ​ກັບ​ຄວາມ​ຫຍຸ້ງຍາກ​ສັບສົນ​ໃນ​ປີ​ທີ່​ຜ່ານ​ມາ. ຂະນະ​ທີ່​ປະເທດ​ອື່ນໆ​ໃນ​ອາຊີ ຍັງ​ອາດ​ຈະ​ປະ​ເຊີນ​ກັບວິ​ກິດ​ການ ທີ່​ຄາດ​ບໍ່​ເຖິງ. ນອກຈາກ​ນີ້, ທ່ານ ເອີ​ເຄນ ຍັງ​ໄດ້​ຄາດ​ຄະເນ​ວ່າ: ສະກຸນ​ເງິນ​ຣູ​ປີ ອາດ​ຈະ ອ່ອນ​ຄ່າ ລົງ​ບໍ່​ເຖິງ 1% ໃນ​ປີ​ນີ້. ຂະນະ​ທີ່​ສະກຸນ​ເງິນ​ຣູ​ເປຍ​ຂອງ​ອິນ​ໂດ​ເນ​ເຊຍ ອາດ​ຈະ​ຫຼຸດ​ລົງ​ເຖິງ 7%. ສ່ວນ​ເງິນ​ບາດ​ຂອງ​ໄທ ອາດ​ຈະ​ຫຼຸດ​ລົງ​ເຖິງ 11% ແລະ ເງິນ​ຣິງ​ກິດ​ຂອງ​ມາ​ເລ​ເຊຍ ອາດ​ປັບ​ຕົວ​ຫຼຸດ​ລົງ 9%. ພ້ອມ​ກັນ​ນັ້ນ, ທ່ານ ເອີ​ເຄນ ຍັງ​ໄດ້​ຊີ້​ບອກ​ວ່າ: ການ​ທີ່​ນັກ​ລົງທຶນ​ຫຼຸດ​ຄວາມ​ກັງວົນ ກ່ຽວ​ກັບ​ຄວາມ ຂັດ​ແຍ້ງ ລະຫວ່າງ ອາ​ເມ​ຣິ​ກາ ແລະ ອີ​ຣານ ຈະ​ເປັນ​ປັດ​ໄຈ​ໜູນ​ໃຫ້​ເງິນ​ຣູ​ປີ​ຟື້ນ​ໂຕ​ຂຶ້ນ. 
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110