ຫົວ​ຂໍ້ : ກອງປະຊຸມລັດຖະມົນຕີຕ່າງປະເທດອາຊຽນ ແບບວົງແຄບ ທີ່ຍ່າຈ່າງ ສສ ຫວຽດນາມ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/01/2020 10:47:27 ຈຳ​ນວນ​ຜູ້​ເຂົ້າ​ຢ້ຽມ​ຊົມ 446 ຄັ້ງ

     ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ໄດ້​ນໍາ​ພາຄະ​ນະ​ຜູ້​ແທນ ຂອງ  ສປປ ລາວ ເຂົ້າ​ຮ່ວມ​ກອງ​ປະຊຸມ​ລັດຖະມົນຕີ​ຕ່າງປະເທດ​ອາ​ຊຽນ ແບບ​ວົງ​ແຄບ ຊຶ່ງເປັນ​ກອງ​ປະຊຸມ​ທຳອິດ​ໃນ​ການ​ເປັນ​ປະທານ​ອາ​ຊຽນ ຂອງ ສສ ຫວຽດນາມ, ຈັດ​ຂຶ້ນ​ໃນ​ວັນ​ທີ 17 ມັງກອນ 2020 ທີ່ຍ່າ​ຈ່າງ ສສ ຫວຽດນາມ ພາຍ​ໃຕ້​ຄໍາ​ຂວັນ: “ອາ​ຊຽນ ທີ່​ໜຽວ​ແໜ້ນ ແລະ ຕອບ​ສະໜອງ​ຕໍ່​ສະພາບ​ການ (Cohesive and Responsive ASEAN)”.
     ກອງ​ປະຊຸມ ໄດ້​ຮັບ​ຊາບ​ຄວາມ​ຄືບ​ໜ້າ​ຂອງ​ການຈັດຕັ້ງ​ປະຕິບັດ​ບັນ​ດາ​ຄໍາ​ຕົກລົງ​ຂອງ​ຜູ້​ນໍາ​ອາ​ຊຽນ​ໃນ​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 34 ແລະ 35 ຜ່ານ​ມາ ກໍ​ຄື​ການຈັດຕັ້ງ​ປະຕິບັດ​ບັນດາ​ເອກະສານ​ແຜນ​ແມ່​ບົດ ສໍາ​ລັບ ສາມ​ເສົາ​ຄໍ້າ​ປະຊາ​ຄົມ​ອາ​ຊຽນ 2025, ແຜນ​ງານ​ຂໍ້​ລິ​ເລີ່ມ​ເພື່ອ​ການ​ເຊື່ອມ​ໂຍງ​ອາ​ຊຽນ ສະບັບ​ທີ III ແລະ ແຜນ​ແມ່​ບົດ​ວ່າ​ດ້ວຍ​ການ​ເຊື່ອມ​ຈອດ​ອາ​ຊຽນ 2025.
     ກອງ​ປະຊຸມ ໄດ້​ປຶກສາ​ຫາລື ແລະ ຮັບ​ຊາບ ບັນດາ​ຂໍ້​ລິ​ເລີ່ມ​ບຸລິ​ມະ​ສິດ ສໍາ​ລັບ​ການ​ເປັນ​ປະທານ​ອາ​ຊຽນ ສົກ​ປີ 2020 ຂອງ ສສ ຫວຽດ ນາມເຊັ່ນ: 1). ການ​ຮັດ​ແໜ້ນຄວາມ​ສາມັກຄີ ແລະ ຄວາມເປັນ​ເອກະ​ພາບ​ຂອງ​ອາ​ຊຽນ, ສົ່ງເສີມ​ຄວາມ​ເປັນ​ແກນກາງ ແລະ ປະກອບສ່ວນ​ໃນ​ການ​ຮັກສາ​ສັນຕິພາບ ແລະ ສະຖຽນ​ລະ​ພາບ​ຂອງ​ພາກ​ພື້ນ; 2). ເພີ່ມ​ທະວີ​ການ​ເຊື່ອມ​ໂຍງ ແລະ ເຊື່ອມ​ຈອດ​ອາ​ຊຽນ, ເພີ່ມ​ປະສິດທິພາບ​ໃຫ້​ແກ່​ເສດຖະກິດ ແລະ ປະ ຊາ​ຄົມ​ອາ​ຊຽນ​ໃຫ້​ສາມາດ​ປັບ​ຕົວ ແລະ ຮັບ​ມື​ກັບ​ການ​ປະຕິວັດ​ອຸດສາຫະກຳ 4.0 ແລະ ເສດຖະກິດ ດີ​ຈີ​ຕອນ; 3). ສົ່ງເສີມ​ເອກະລັກ​ຂອງ​ອາ​ຊຽນ ແລະ ສ້າງ​ຄວາມ​ຮັບ​ຮູ້​ໃຫ້​ແກ່​ປະຊາຊົນ​ອາ​ຊຽນ ກ່ຽວ​ກັບ​ປະຊາ​ຄົມ​ອາ​ຊຽນ​ໃຫ້​ຫຼາຍ​ຂຶ້ນ; 4). ເພີ່ມ​ທະວີ​ການ​ຮ່ວມ​ມື​ກັບ​ບັນດາ​ປະເທດ​ຄູ່​ຮ່ວມ​ມື​ໃນ​ໂລກ ເພື່ອ​ສັນຕິພາບ, ສະຖຽນ​ລະ​ພາບ ແລະ ການ​ພັດທະນາ​ແບບ​ຍືນ​ຍົງ; ແລະ 5). ເພີ່ມ​ທະວີ​ຄວາມ​ອາດ​ສາມາດ ແລະ ປະສິດທິພາບ​ຂອງ ສະ​ຖາ​ບັນ​ອາ​ຊຽນ. ກອງ​ປະຊຸມ​ໄດ້​ເຫັນ​ດີ​ມອບ​ໃຫ້​ຂະແໜງການ​ກ່ຽວຂ້ອງ ນຳໄປ​ປຶກສາ​ຫາລື​ລາຍ​ລະອຽດ​ບັນດາ​ຂໍ້​ລິ​ເລີ່ມ​ບຸ​ລິ​ມະ​ສິດ​ດັ່ງກ່າວ ເພື່ອ​ຈັດ​ຕັ້ງ​ປະຕິບັດ​ຕໍ່​ໄປ. ນອກ​ນັ້ນ, ກອງ​ປະຊຸມ​ຍັງ​ໄດ້​ແລກປ່ຽນ​ຄຳ​ຄິດ​ເຫັນ ກ່ຽວ​ກັບ​ທິດ​ທາງ​ໃນຕໍ່ໜ້າ​ຂອງ​ການ​ສ້າງ​ປະຊາ​ຄົມ​ອາ​ຊຽນ ເປັນຕົ້ນ​ແມ່ນ​ການ​ທົບ​ທວນ​ກາງ​ສະໄໝ​ການຈັດຕັ້ງ​ປະຕິບັດ​ວິໄສ​ທັດ​ປະຊາ​ຄົມ​ອາ​ຊຽນ 2025.
ກອງ​ປະຊຸມ ຍັງ​ໄດ້​ປຶກ ສາ​ຫາລື ກ່ຽວ​ກັບ​ການ​ຮ່ວມ​ມືລະຫວ່າງ ອາ​ຊຽນ ກັບ​ພາຍ​ນອກ ໂດຍ​ສະເພາະ ໄດ້​ປຶກສາ​ຫາລື​ກ່ຽວ​ກັບ​ການ​ກະກຽມ​ໃຫ້​ແກ່​ການ​ຈັດ​ກອງ​ປະຊຸມ​ສະເຫຼີມສະຫຼອງ​ການ​ຮ່ວມ​ມື ອາ​ຊຽ​ນ-​ນິວ​ຊີ​ແລນ ຄົບຮອບ 45 ປີ, ກອງ​ປະຊຸມ​ສຸດ​ຍອດ​ສະໄໝ​ພິເສດ ອາ​ຊຽນ-​ສະຫະລັດ​ອາ​ເມ​ຣິ​ກາ ທີ່​ຄາດ​ວ່າ​ຈະ​ຈັດ​ຂຶ້ນ​ໃນ​ເດືອນ​ມີນາ 2020 ທີ່​ສະຫະລັດ​ອາ​ເມ​ຣິ​ກາ. ໃນ​ໂອກາດ​ນີ້, ບັນດາ​ລັດຖະມົນຕີ​ຕ່າງປະເທດ​ອາ​ຊຽນ ຍັງ​ໄດ້​ແລກປ່ຽນ​ຄວາມ​ຄິດ​ເຫັນ ກ່ຽວ​ກັບ​ບັນຫາ​ພາກ​ພື້ນ ແລະ ສາກົນ ທີ່​ພົ້ນ​ເດັ່ນ ແລະ ມີ​ຄວາມ​ສົນໃຈ​ຮ່ວມ​ກັນ ເປັນຕົ້ນ​ແມ່ນ​ບັນຫາ​ທີ່​ເປັນ​ສິ່ງ​ທ້າ​ທາຍ​ຕໍ່​ສັນຕິພາບ ແລະ ສະຖຽນ​ລະ​ພາບ​ຂອງ​ພາກ​ພື້ນ ແລະ ຂອງ​ໂລກ, ສົງຄາມ​ການ​ຄ້າ ລະຫວ່າງ ປະເທດ​ມະຫາ​ອຳນາດ, ບັນຫາ​ການ​ກໍ່​ການ​ຮ້າຍ, ສະພາບ​ຄວາມ​ເຄັ່ງ​ຕຶງ​ຢູ່​ຕາເວັນ​ອອກ​ກາງ, ໄພ​ພິບັດ​ທໍາ​ມະ​ຊາດ ແລະ ອື່ນໆ.
     ໃນ​ກອງ​ປະຊຸມ​ຄັ້ງ​ນີ້ ທ່ານ​ ສະເຫຼີມ​ໄຊ ກົມ​ມະ​ສິດ ໄດ້​ເນັ້ນ​ຢໍ້າ​ເຖິງ​ຄວາມ​ສໍາ​ຄັນ ຂອງ​ການ​ຮ່ວມ​ມື​ເພື່ອ​ຮັດ​ແຄບ​ຄວາມ​ແຕກ​ໂຕນ​ທາງ​ດ້ານ​ການ​ພັດທະນາ ລະຫວ່າງ ປະເທດ​ສະມາຊິກ​ອາ​ຊຽນ ແລະ ການ​ເຊື່ອມ​ຈອດ​ພາກ​ພື້ນ ເພື່ອ​ຫຼຸດຜ່ອນ​ຄວາມ​ແຕກ​ໂຕນ​ດ້ານ​ການ​ພັດທະນາ​ໃນ​ອາ​ຊຽນ, ໂດຍ​ສະເພາະ​ການ​ກະກຽມ​ແຜນ​ວຽກ​ເພື່ອ​ການ​ເຊື່ອມ​ໂຍງ​ອາ​ຊຽນ ສະບັບ​ທີ IV  ເພື່ອ​ປ່ຽນ​ແທນ​ແຜນ​ວຽກ​ສະບັບ​ທີ III ທີ່​ຈະ​ສິ້ນ​ສຸດ​ການຈັດຕັ້ງ​ປະຕິບັດ​ໃນ​ປີ 2020 ນີ້. ໃນ​ຂະນະ​ດຽວ​ກັນ, ອາ​ຊຽນ​ຄວນ​ສືບຕໍ່​ສົ່ງເສີມ​ບົດບາດ​ຄວາມ​ເປັນ​ແກນ​ກາງຂອງ​ຕົນ​ໃນ​ການ​ພົວພັນ​ກັບ​ພາຍ​ນອກ ແລະ ໃນ​ໂຄງ​ສ້າງ​ພາກ​ພື້ນ​ທີ່​ພວມ​ຜັນ​ແປ. (ຂ່າວ: ກົມ​ການ​ຂ່າວ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110