ຫົວ​ຂໍ້ : ສະຖານທູດຈີນ ສະຫຼອງບຸນປີໃໝ່ ປະຈຳຊາດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/01/2020 10:50:54 ຈຳ​ນວນ​ຜູ້​ເຂົ້າ​ຢ້ຽມ​ຊົມ 663 ຄັ້ງ

      ສະຖານ​ເອກ​ອັກ​ຄະ​ລັດ​ຖະ​ທູດ ແຫ່ງ ສປ ຈີນ ປະຈຳ ສປປ ລາວ ໄດ້​ຈັດ​ງານ​ລ້ຽງ​ສະເຫຼີມສະຫຼອງ​ບຸນປີໃໝ່​​ປະ​ຈຳ​ຊາດຈີນ (ບຸນ​ກຸດ​ຈີນ) ຂຶ້ນ​ໃນ​ຕອນ​ຄໍ່າວັນ​ທີ 17 ມັງກອນ ຜ່ານ​ມາ ທີ່​ໂຮງແຮມ​ດອນ​ຈັນພາ​ເລດ ນະຄອນຫຼວງ​ວຽງ​ຈັນ ໂດຍ​ມີ ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່ ປະທານ​ສະມາຄົມ​ມິດຕະພາບ ລາວ - ຈີນ, ທ່ານ ນາງ ເຂັມ​ມະນີ ພົນ​ເສນາ ລັດຖະມົນຕີ​ກະຊວງ​ອຸດສາຫະກຳ ແລະ ການ​ຄ້າ ປະທານ​ຄະນະ​ກຳມະການ​ຮ່ວມ​ມື ລາວ - ຈີນ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ ຢ່າງ​ຄຶກ​ຄື້ນ.
     ໃນ​ພິ​ທີ ທ່ານ ຈ່ຽງ ຈ້າຍ​ ​ຕ່ົງ ເອກ​ອັກ​ຄະ​ລັດ​ຖະ​ທູດ​ວິສາມັນ​ຜູ້​ມີ​ອຳນາດ​ເຕັມ​ແຫ່ງ ສປ ຈີນ ປະຈຳ ສປປ ລາວ ໄດ້​ກ່າວອວຍ​ພອນ​ປີ​ໃໝ່​ໃຫ້​ການ​ນຳ​ພັກ​-ລັດ ຈີນ-ລາວ  ແລະ ຜູ້​ເຂົ້າ​ຮ່ວມ​ເນື່ອງ​ໃນ​ວັນ​ບຸນ​ດັ່ງ​ກ່າວ​ແລ້ວ, ທ່ານ​ທູດ​ກໍ​ໄດ້​ຍົກ​ໃຫ້​ເຫັນ​ວ່າ: ໃນ​ປີຜ່ານມາ, ສປ ຈີນ ໄດ້​ສະເຫຼີມສະຫຼອງ​ວັນ​ສະຖາປະນາ​ປະເທດ​ຄົບຮອບ 70 ປີ ຢ່າງ​ຍິ່ງ​ໃຫຍ່ ແລະ ໃນ​ໂອກາດ​ປີ​ໃໝ່​ສາກົນ​ຜ່ານ​ມາ ​ທ່ານປະທານ ສີ ຈິ້ນ ຜິງ ໃຫ້​ຮູ້ ລວມ​ຍອດ​ຕະ​ລິດ​ຕະ​ພັນ​ພາຍ​ໃນ​ຂອງ ສປ ຈີນ ໄດ້​ບັນລຸ​ເຖິງ 99.000 ຕື້​ຢວນ ຫຼື ເທົ່າ​ກັບ 14.000 ຕື້​ໂດ​ລາ, ສະເລ່ຍ​ຕໍ່​ຫົວ​ຄົນ ບັນລຸ​ເຖິງ 10.276 ໂດ​ລາ ໂດຍ​ມີ​ອັດຕາ​ການ​ເຕີບ​ໂຕ​ທາງ​ດ້ານ​ເສດຖະກິດ ໃນ​ປີ 2019 ຜ່ານ​ມາ ບັນລຸ 6,1% ໄດ້​ຕາມ​ເປົ້າ​ໝາຍ​ທີ່​ວາງ​ໄວ້ ຊຶ່ງ​ໄດ້​ກວມ​ເອົາ 16% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ​ທົ່ວ​ໂລກ ແລະ 30% ຂອງ​ການ​ປະກອບສ່ວນ​ພັດທະນາ​ເສດຖະກິດ​ໂລກ. ເຖິງ​ແມ່ນ​ວ່າ​ປະເທດ​ຈີນ​ຈະ​ເປັນ​ປະເທດ​ທີ່​ພັດທະນາ​ໄວ​ກໍ​ຕາມ ແຕ່​ກໍ​ຍັງ​ເປັນ​ປະເທດ​ທີ່​ກຳລັງ​ພັດທະນາ​ຢູ່ ຊຶ່ງ​ຍັງ​ຢູ່​ໃນ​ໄລຍະ​ຕົ້ນໆ​ຂອງ​ສັງຄົມ​ນິຍົມ. ສະນັ້ນ, ສປ ຈີນ ແລະ  ສປປ ລາວ ແມ່ນ​ຍັງ​ຕ້ອງ​ໄດ້​ຮ່ວມ​ມື​ກັນ ເພື່ອ​ຍາດ​ແຍ່ງ​ເອົາ​ຜົນສຳເລັດ​ອັນ​ໃຫຍ່​ຫຼວງ​ກວ່າ​ເກົ່າ.
     ພັກ​ປະຊາຊົນ ​ປະຕິວັດ​ລາວ ແລະ ພັກ​ກອມ​ມູ​ນິດ​ຈີນ ໄດ້​ສ້າງ​ສາຍ​ພົວພັນ​ໂດຍ​ກົງ​ນຳ​ກັນ​ໃນ​ປີ 1959 ແລະ ຕໍ່​ມາ​ສອງ​ປະເທດ ສປປ ລາວ ແລະ  ສປ ຈີນ ໄດ້​ສ້າງ​ສາຍ​ພົວພັນ​ການ​ທູດ​ໃນ​ວັນ​ທີ 25 ເມສາ 1961, ຈາກ​ນັ້ນ​ມາ ສາຍ​ພົວພັນ​ສອງ​ຝ່າຍ​ໄດ້​ຮັບ​ການ​ຊຸກຍູ້​ສົ່ງເສີມ ຍົກ​ລະດັບ​ຂຶ້ນ​ຢ່າງ​ຕໍ່​ເນື່ອງ ນັບ​ມື້​ນັບ​ເຂົ້າ​ສູ່​ລວງ​ເລິກ ແລະ ມີ​ໝາກຜົນ​ຕົວ​ຈິງ.
(ພາບ, ຂ່າວ: ສຸກ​ສະຫວັນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110