ໃນ​ວັນ​ທີ 6 ເມສາຜ່ານມາ, ແຂວງເຊກອງ​ ໄດ້​ຈັດ​ກອງປະຊຸມສະຫຼຸບຖອດຖອນບົດຮຽນກ່ຽວ​ກັບການກະກຽມ ແລະ ການດໍາເນີນການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ​ໂດຍມີ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ປະທານຄະນະກໍາມະການເລືອກຕັ້ງຂັ້ນແຂວງ ພ້ອມດ້ວຍປະທານ-ຮອງປະທານ, ບັນດາທ່ານຄະນະກໍາ ມະການເລືອກຕັ້ງຂັ້ນແຂວງ-ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ຜູ້​ເຂົ້າ​ຮ່ວມໄດ້​ປະກອບ​ຄໍາ​ເຫັນ ເພື່ອ​ແລ​ກປ່ຽນ​ບົດຮຽນ​ຊຶ່ງກັນ ​ແລະ ​ກັນ, ພ້ອມ​ທັງສະຫຼຸບຕີລາຄາກ່ຽວກັບການກະກຽມ ແລະ ການດໍາເນີນການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ທີ່ຢູ່ໃນຂອບເຂດຄວາມຮັບຜິດຊອບຂອງແຕ່ລະອະນຸກໍາມະການ ໂດຍບັນດາຄໍາເຫັນທີ່​ນໍາມາ​ປຶກສາ​ຫາລືກັນ​ຄັ້ງ​ນີ້ແມ່ນຈະເປັນຂໍ້ມູນໃຫ້ແກ່ການປັບປຸງບົດສະຫຼຸບຕີລາຄາໃຫ້ມີເນື້ອໃນຄົບ ຖ້ວນ, ຊັດເຈນ ແລະ ເປັນບົດຮຽນໃຫ້ແກ່ການປັບປຸງກົດໝາຍ, ນິຕິກໍາລຸ່ມກົດໝາຍກ່ຽວກັບການກະກຽມ ແລະ ການດໍາເນີນການເລືອກຕັ້ງ ສສຊ ແລະ ສສຂ ໃນຕໍ່ໜ້າ.

ໂອກາດ​ດັ່ງກ່າວ, ທ່ານ​ ເຫຼັກໄຫຼ ສີວິໄລ ​ ໄດ້​ສະແດງຄວາມຂອບໃຈ ແລະ ຊົມເຊີຍທຸກພາກ ສ່ວນທີ່ໄດ້ຮ່ວມການກະກຽມ ແລະ ດໍາເນີນການເລືອກຕັ້ງ ຈົນ​ໄດ້​ຮັບຜົນສໍາເລັດຕາມຄາດໝາຍ, ພ້ອມ​ທັງຮຽກຮ້ອງ​ໃຫ້ຜູ້ເຂົ້າຮ່ວມກອງປະຊຸມ ຈົ່ງຍົກສູງຄວາມຮັບຜິດຊອບການເມືອງຂອງຕົນ ເຂົ້າໃນການຄົ້ນ ຄວ້າ ແລະ ປະກອບຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີ, ດ້ານອ່ອນ ກໍຄືບັນດາສາເຫດທີ່ ພາໃຫ້ມີດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ໃນແຕ່ລະບັນຫາ, ພ້ອມທັງສະເໜີມາດຕະການ ແລະ ວິທີການແກ້ໄຂ ເພື່ອເປັນບົດຮຽນທີ່ດີໃຫ້ແກ່ການກະກຽມການເລືອກຕັ້ງໃນຊຸດຕໍ່ໄປ ເປັນຕົ້ນການ ເພີ່ມທະວີການນໍາພາ-ຊີ້ນໍາຂອງຄະນະພັກແຕ່ລະຂັ້ນຕໍ່ວຽກງານເລືອກຕັ້ງ ແລະ ການອອກນິຕິກໍາຕ່າງໆ ເພື່ອເປັນບ່ອນອີງແກ່ການປະຕິບັດວຽກງານຂອງຄະນະກຳມະການເລືອກຕັ້ງຂັ້ນຕ່າງໆ; ຄວາມຮັບຜິດ ຊອບຂອງຄະນະພັກ, ອົງການປົກຄອງ ແລະ ຄະນະກໍາມະການເລືອກຕັ້ງແຕ່ລະຂັ້ນ ໃນການຄັດ ເລືອກເປົ້າໝາຍຜູ້ສະໝັກຮັບເລືອກຕັ້ງ;  ການໂຄສະນາປຸກລະດົມຂະບວນການ;  ການໂຄສະນາພົບປະກັບຜູ້ມີສິດປ່ອນບັດເລືອກຕັ້ງ; ການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ; ການນໍາໃຊ້ງົບປະມານ ແລະ ວຽກງານອື່ນໆ ທີ່ກ່ຽວກັບການກະກຽມ ແລະ ການດໍາເນີນການເລືອກຕັ້ງ.

(ຂ່າວ-ພາບ: ສັນຍາ)