ຫົວ​ຂໍ້ : ຫວຽດນາມ - ຈີນ ຮັກສາມູນເຊື້ອມິດຕະພາບອັນດີງາມ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/01/2020 11:00:22 ຈຳ​ນວນ​ຜູ້​ເຂົ້າ​ຢ້ຽມ​ຊົມ 282 ຄັ້ງ

      ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 16 ມັງກອນ​ຜ່ານ​ມາ, ເນື່ອງ​ໃນ​ໂອກາດ​ບຸນ​ປີໃໝ່​ປະຈຳ​ຊາດ ປີ 2020 ແລະ ສະເຫຼີມສະຫຼອງ  70 ປີ​ ແຫ່ງ​ວັນ​ສ້າງຕັ້ງ​ສາຍ           ພົວພັນທາງ​ການ​ທູດຫວຽດ ນາມ - ຈີນ (18/1/1950 - 18/1/2020) , ທ່ານ ຫ​ງວຽນ​ຝູ​ຈ້ອງ ເລຂາທິການ​ໃຫຍ່ ປະ ທານ​ປະເທດ​ຫວຽດນາມ ແລະ ທ່ານ ສີ​ຈິ້ນ​ຜິງ ເລຂາທິການ​ໃຫຍ່ ປະທານ​ປະເທດ​ຈີນ ໄດ້​ມີ​ການເຈ​ລະຈາ​ກັນ​ຜ່ານ​ທາງ​ໂທລະ​ສັບ.
      ຂ່າວ​ລະບຸ​ວ່າ: ໃນ​ການໂອ້​ ລົມ​ສົນທະນາ, ທ່ານ ຫ​ງວຽນ​ຝູ​ຈ້ອງ ໄດ້​ສະແດງ​ຄວາມ​ຊົມ ເຊີຍ​ພັກ, ລັດຖະບານ ແລະ ປະຊາຊົນ​ຈີນ ກ່ຽວ​ກັບ​ບັນດາ​ຜົນງານ​ໃນ​ການ​ສ້າງສາ ແລະ ພັດທະນາ​ປະເທດ​ຊາດ, ລົງ​ເລິກ​ໃນ​ການ​ປະຕິ​ຮູບ​ເປີດ​ປະຕູ​ສູ່​ພາຍ​ນອກ​ໃນ​ໄລຍະ​ທີ່​ຜ່ານ​ມາ. ພ້ອມ​ກັນ​ນັ້ນ, ທ່ານ  ຫ​ງວຽນ​ຝູ​ຈ້ອງ ໄດ້​ອວຍພອນ​ປະຊາຊົນ​ຈີນ  ເນື່ອງ​ໃນ​ໂອກາດ​ບຸນປີໃໝ່​ປະຈຳ​ຊາດ ປີ 2020 ແລະ ໄດ້​ຢືນຢັນ​ເຖິງສາຍ​ພົວ ພັນມິດຕະພາບ ແລະ ການ​ຮ່ວມມື​ຍຸດທະສາດ​ຮອບດ້ານ ແມ່ນ​ສອດຄ່ອງ​ກັບ​ຄວາມມຸ້ງ ​ຫວັງ ແລະ ຜົນ​ປະໂຫຍດ​ພື້ນ ຖານ​ຂອງ​ປະຊາຊົນ 2 ປະເທດ.  ທ່ານ ຫ​ງວຽນ​ຟູ​ຈ້ອງ ກ່າວ​ຕື່ມ​ວ່າ: 2 ຝ່າຍ ຄວນຮັກສາມູນເຊື້ອ​ມິດຕະພາບ​ອັນ​ດີງາມ, ເພີ່ມທະວີ​ການ​ພົວພັນແລກ ປ່ຽນ​ປະຊາຊົນ, ສ້າງ​ພື້ນຖານ ສັງຄົມ ໃຫ້​ໝັ້ນຄົງ​ໜັກ​ແໜ້ນ​ໃຫ້​ແກ່​ການ​ພົວພັນ 2 ຝ່າຍ, ຢຶດໝັ້ນມາດ​ຕະການ​ແກ້​ໄຂ​ໂດຍ​ສັນຕິ​ວິທີ ສຳລັບ​ບັນດາ​ບັນຫາ​ທີ່​ຍັງ​ຄົງ​ຄ້າງ​ໃນ​ສາຍ​ພົວພັນ ລະຫວ່າງ 2 ປະເທດ, ບົນ​ພື້ນຖານ​ຄວາມ​ຮັບ​ຮູ້​ລວມ ຂອງ​ການ​ນໍາ​ຂັ້ນ​ສູງ 2 ປະ​ເທດ ສອດຄ່ອງ​ກັບ​ກົດໝາຍ​ສາ​ກົນ.
       ສ່ວນ ທ່ານ ສີ​ຈິ້ນ​ຜິງ ກໍ​ໄດ້​ອວຍພອນ​ປະຊາຊົນ​ຫວຽດ ນາມ ເນື່ອງ​ໃນ​ໂອກາດ​ບຸນປີ ໃໝ່​ປະຈຳ​ຊາດ ປີ 2020,   ຊົມ ເຊີຍ​ບັນດາ​ຜົນງານ​ທີ່​ຍິ່ງ​ໃຫຍ່​ ທີ່​ປະຊາຊົນ​ຫວຽດນາມ​ບັນລຸ​ໄດ້ໃນ​ໄລຍະ​ທີ່​ຜ່ານ​ມາ. ທ່ານ ສີ​ຈິ້ນ​ຜິງ ຢືນຢັນ​ວ່າ: ພັກ, ລັດ ຖະບານ ແລະ ປະຊາຊົນ​ຈີນ ຖື​ ເປັນ​ສຳຄັນ​ສາຍ​ພົວພັນ​ຖານ​ບ້ານ​ໃກ້​ເຮືອນຄຽງ​ມິດຕະພາບ​ທີ່​ເປັນ​ມູນເຊື້ອ​ກັບ​ຫວຽດນາມ, ຈີນ ພ້ອມ​ແລ້ວ​ຈະ​ຮ່ວມ​ກັບ​ພັກ, ລັດຖະບານ ແລະ ປະຊາ ຊົນຫວຽດນາມ ເພີ່ມ​ທະວີ​ຄວາມ​ໄວ້​ເນື້ອ​ເຊື່ອ​ໃຈ​ທາງ​ດ້ານ​ການເມືອງ, ຊຸກຍູ້​ການ​ຮ່ວມ​ມື​ຢ່າງ​ມີ​ປະສິດ ທິ​ຜົນ ໃນ​ບັນດາ​ຂົງເຂດ ນຳ​ມາ​ຊຶ່ງ​ຜົນ​ປະໂຫຍດ​ໃຫ້​ແກ່ ປະຊາຊົນ 2 ປະ​ເທດ. ທ່ານ ສີ​ຈິ້ນ​ຜິງ ຢືນຢັນວ່າ: ຈີນ ຕັ້ງໜ້າ​ສະໜັບສະ ໜູນ ​ຫວຽດນາມ ເຮັດ​ສຳເລັດ​ໜ້າທີ່​ເປັນ​ກຳມະການ​ບໍ່​ຖາວອນ​  ສະພາ​ຄວາມ​ໝັ້ນຄົງ ສປຊ ໃນ​ອາຍຸ​ການ 2020 - 2021 ແລະ ເປັນ​ປະທານໝູນວຽນ​ອາ​ຊຽນ​ປີ 2020.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110