ຫົວ​ຂໍ້ : ຈີນ-ອາເມຣິກາ ລົງນາມຮ່ວມ ຂໍ້ຕົກລົງການຄ້າໄລຍະທີໜຶ່ງ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/01/2020 11:03:00 ຈຳ​ນວນ​ຜູ້​ເຂົ້າ​ຢ້ຽມ​ຊົມ 334 ຄັ້ງ

    ຂ່າວ​ຕ່າງປະເທດ​ລາຍ ງານວ່າ: ວັນ​ທີ 15 ມັງກອນ​ຜ່ານ​ມາ, ທ່ານ ໂດ​ໂນ ທຣຳ  ປະ ທານາທິບໍດີອາເມ​ຣິ​ກາ ແລະ ທ່ານ ຫຼິວ​ເຮີ ຮອງ​ນາຍົກລັດ ຖະມົນຕີ​ຈີນ ໄດ້​ລົງ​ນາມ​ຮ່ວມ​ກັນ ໃນ​ຂໍ້​ຕົກລົງ​ການ ຄ້າ​ໄລຍະ​ທີ​ໜຶ່ງ​ທີ່​ທຳ​ນຽບ​ຂາວ, ທ່ານ ໂດ​ໂນ ທຣຳ ກ່າວ​ວ່າ:  ຂໍ້​ຕົກລົງ​ດັ່ງກ່າວ​ເຖິງ ແມ່ນ​ວ່າ​ເປັນ​ພຽງ ຂັ້ນ​ຕອນ​ທຳອິດ ແຕ່​ເປັນ​ການ​ປູ​ທາງ​ທີ່​ຖືກຕ້ອງ​ສູ່​ການ​ກັບ​ຄືນ​ໄປ​ແກ້​ໄຂ​ຂໍ້​ພິພາດ ແລະ ສຳລັບ​ຊາວ​ອາເມ​ຣິ​ກາ ທຸກ​ພາກສ່ວນຂໍ້​ຕົກລົງ​ນີ້​ຈະ​ຊ່ວຍ​ເອີ້ນ​ຄືນ​ຄວາມ​ຍຸຕິ​ທຳ​ທາງ​ດ້ານ​ການ​ຄ້າ.
    ຂະນະ​ດຽວ​ກັນ, ທ່ານ ຫຼິວ​ເຮີ  ກ່າວ​ວ່າ: ການ​ຮ່ວມ​ມື​ຈະ​ນໍາ​ໄປ​ສູ່​ການ​ເດີນ​ຕາມ​ເສັ້ນທາງ​ ທີ່​ຖືກຕ້ອງ ແລະ ໄດ້​ອ່ານຈົດ ໝາຍ​ຂອງ​ທ່ານ ສີຈິ້ນຜິງ ປະທານ​ປະເທດ​ຈີນ ຊຶ່ງ​ມີ​ຂໍ້ ຄວາມ​ທີ່​ສຳຄັນ​ວ່າ: ລັດຖະ ບານ​ຈີນ ມີ​ຄວາມ​ຍິນດີ​ຕໍ່​ການ​ລົງ​ນາມ​ໃນ​ຂໍ້​ຕົກລົງ​ການ​ຄ້າ​ໄລຍະ​ເລີ່ມ​ຕົ້ນ, ເປັນ​ສັນຍານທີ່​ບົ່ງບອກ​ວ່າ: ອາ​ເມ​ຣິ​ກາ  ແລະ ຈີນ ຈະ​ເດີນ​ໜ້າ​ເຈລະຈາ  ເພື່ອ​ແກ້​ໄຂ​ຄວາມ​ຂັດ​ແຍ້ງ​ທາງ ​ດ້ານ​ການ​ຄ້າ​ຕໍ່​ໄປ. 
    ນອກຈາກ​ນັ້ນ, ທ່ານ ຫຼິວ​ເຮີ ແລະ ທ່ານ ໂດ​ໂນ ທຣຳ ໄດ້​ສະແດງ​ລາຍ​ເຊັນ​ຂອງ​ທັງ​ສອງ​ຝ່າຍ ໃນ​ຂໍ້​ຕົກລົງ ໂດຍ​ສາລະ​ສຳຄັນ​ຂອງ​ຂໍ້​ຕົກລົງ​ການ​ຄ້າ​ໄລຍະ​ທຳອິດ​ຄື: ຈີນ​ຈະ​ເພີ່ມ​ມູນ​ຄ່າ​ການ​ນຳ​ເຂົ້າ​ສິນຄ້າ ຈາກ​ອາ​ເມ​ຣິ​ກາ ລວມ​ທັງ​ຜະລິດ​ຕະ​ພັນ​ການ​ກະ​ສິ​ກໍາ ແລະ ສິນຄ້າ​ເຕັກ​ໂນ​ໂລ​ຊີ​ເພີ່ີມ​ອີກ 200.000 ລ້ານ​ໂດ​ລາ. ຈີນ ນຳ​ເຂົ້າ​ສິນຄ້າ​ຂອງ​ອາ​ເມ​ຣິ​ກາ ຄິດ​ເປັນ​ມູນ​ຄ່າ 186.000 ລ້ານ​ໂດ​ລາ ເມື່ອ​ ປີ 2017 ຊຶ່ງ​ເປັນ​ປີ​ທຳອິດ​ທີ່​ ທ່ານ ໂດ​ໂນ ທຣຳ ດຳລົງ​ຕຳ ແໜ່ງ​ປະ​ທາ​ນາ​ທິ​ບໍດີ. 
     ຈາກ​ມູນ​ຄ່າ​ການ​ເພີ່ມ​ການນຳ​ເຂົ້າ​ສິນຄ້າ​ແບ່ງ​ເປັນການ​ຊື້​ສິນຄ້າ​ກະ​ສິ​ກໍາ 32.000 ລ້ານ​ໂດ​ລາ, ສິນຄ້າ​ອຸດສາຫະກຳ 78.000 ລ້ານ​ໂດ​ລາ, ສິນຄ້າ​ພະລັງງານ 52.000 ລ້ານ​ໂດ​ລາ ແລະ ພາກ​ບໍລິການ 38.000 ລ້ານ​ໂດ​ລາ.
     ເຖິງ​ຢ່າງໃດ​ກໍ​ຕາມ, ການ​ທີ່​ຈີນ​ ຍັງ​ບໍ່​ທັນ​ໄດ້​ຍົກເລີກ​ກຳ ແພງ​ພາສີ​ສິນຄ້າການ​ກະ​ສິ​ກໍາ​ ຂອງອາ​ເມຣິ​ກາ ໝາຍ​ຄວາມ​ວ່າ: ຊາວ​ກະສິກອນ​ຂອງ​ອາ​ເມ​ຣິ​ກາ ຍັງ​ຄົງ​ຕ້ອງ​ຄຳນວນ​ການ​ສົ່ງ​ອອກ​ຕາມຄວາມຕ້ອງການ​ຂອງ​ລັດຖະບານ​ປັກ​ກິ່ງ​ຕໍ່​ໄປ ສົ່ງ​ຜົນ​ໃຫ້​ສັນຍາ​ການ​ຊື້​ຂາຍ​ຖົ່ວເຫຼືອງ​ລ່ວງ​ໜ້າທີ່​ຕະຫຼາດ    ຊິ​ຄາໂກ​ ປັບ​ໂຕ​ຫຼຸດ​ລົງ 0,4%. ທາງ​ດ້ານ​ເງື່ອນໄຂ​ທາງ​ການ​ຄ້າ​ທີ່​ອາ​ເມ​ຣິ​ກາ ຜ່ອນຜັນ​ໃຫ້​ຈີນ ລວມ​ເຖິງການ​ຫຼຸດ​ກຳແພງ​ ພາສີ​ຈາກ 15% ລົງ​ມາ​ຢູ່​ທີ່ 7,5%  ຕໍ່​ມູນ​ຄ່າ​ການ​ນຳ​ເຂົ້າ​ສິນຄ້າ​ຈາກ​ຈີນ 120.000 ລ້ານ ​ໂດ​ລາ ຊຶ່ງ​ອັດຕາ​ເດີມ​ເປັນ​ໄປ ​ຕາມມາດ​ຕະການ​ທີ່​ລັດຖະ ບານ ວໍ​ຊິ​ງຕັນ ບັງຄັບ​ໃຊ້​ເມື່ອ​ວັນ​ທີ 1 ກັນຍາ ຂອງ​ປີຜ່ານມາ ໂດຍ​ຂໍ້​ຕົກລົງ​ການ​ຄ້າ​ໄລຍະ​ທີ 1 ຈະ​ມີ​ຜົນ​ບັງຄັບ​ໃຊ້​ພາຍ​ໃນ 30 ວັນ​ຈາກ​ວັນ​ທີ່​ລົງ​ນາມເປັນຕົ້ນ​ໄປ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110