ວິທະຍຸກະຈາຍສຽງຫວຽດນາມລາຍງານວ່າ: ກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ ມີແຜນການເປີດຄືນບັນດາການເຄື່ອນໄຫວທ່ອງທ່ຽວສາກົນຕາມຂັ້ນຕອນ.

ຂ່າວລະບຸວ່າ: ວັນທີ 18 ເມສາຜ່ານມາ, ທ່ານ ເລຈີ໊ແທັງ ປະທານຄະນະມະການປະຊາຊົນ ແຂວງກວ້າງນາມ ໃຫ້ຮູ້ວ່າ: ແຂວງກວ້າງນາມ ໄດ້ສົ່ງເອກະສານລົງທະບຽນໄປຍັງກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ ເພື່ອຂໍອະນຸຍາດນຳໃຊ້ທົດລອງກົນໄກ “Passport ວັກຊິນ”.

ທ່ານ ເລຈີ໊ແທັງ ກ່າວວ່າ: ຖ້າໄດ້ຮັບການຮອບຮອງເອົາຈາກລັດຖະບານ, ແຂວງກວ້າງນາມ ຈະກາຍເປັນແຂວງທຳອິດໃນທົ່ວປະເທດ ທີ່ນຳໃຊ້ທົດລອງກົນໄກ “Passport ວັກຊິນ”. ທາງແຂວງຈົດທະບຽນທົດລອງຄັ້ງທີ 1, ແມ່ນຕ້ອນຮັບແຂກທ່ອງທ່ຽວ ສ.ເກົາຫຼີ, ທັງປະຕິບັດ ແລະ ຖອດຖອນບົດຮຽນ ເພື່ອປະຕິບັດຄັ້ງທີ 2, ເປີດກ້ວາງໄປຍັງບາງຕະຫຼາດສາກົນອື່ນໆອີກ. ແຂກທ່ອງທ່ຽວເຂົ້າ ຫວຽດນາມ ໂດຍບັນດາບໍລິສັດທ່ອງທ່ຽວສາກົນຈັດຕັ້ງຕາມຖ້ຽວ, ແຕ່ລະຄົນລ້ວນແຕ່ຕ້ອງມີ Passport ວັກຊິນ ແລະ ໜັງສືຢັ້ງຢືນຂອງອົງການການແພດ ດ້ວຍຜົນກວດເຊື້ອໄວຣັດ ໂຄວິດ-19 ເປັນລົບ.

ກ່ອນໜ້ານັ້ນ, ທ່ານ ຫງວຽນວັນຮຸ່ງ ລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວ ຫວຽດນາມ ໃຫ້ຮູ້ວ່າ: ກະຊວງວັດທະນະທໍາ, ກິລາ ແລະ ການທ່ອງທ່ຽວ ມີແຜນການເປີດຄືນບັນດາການເຄື່ອນໄຫວທ່ອງທ່ຽວສາກົນຕາມຂັ້ນຕອນ. ໃນນັ້ນ, ໄລຍະທົດລອງແຕ່ເດືອນ ກໍລະກົດ ຫາ ເດືອນກັນຍາ ປີ 2021 ຈະສຸມໃສ່ຜະລິດຕະພັນການທ່ອງທ່ຽວ, ພັກຜ່ອນບຳລຸງສຸຂະພາບຢູ່ທະເລ ແລະ ການທ່ອງທ່ຽວ-ຕີກອບ ສຳລັບແຂກທ່ອງທ່ຽວມາຈາກ ສ.ເກົາຫຼີ.